Thursday, 30 June 2016

ನೆನೆಗುದಿಗೆ ಬಿದ್ದಿರುವ  ಯೋಜನೆಗಳಿಗೆ ಕಾಗೋಡು ಅವಧಿಯಲ್ಲಿ ಸಿಕ್ಕೀತೇ ಕಾಯಕಲ್ಪ?


 ಕಾಗೋಡು ತಿಮ್ಮಪ್ಪ ಜಿಲ್ಲಾ ಉಸ್ತುವಾರಿ ಸಚಿವರಾಗಿ ನೇಮಕವಾಗಿದ್ದಾರೆ. ಸಚಿವರಾದ ನಂತರ ನಾಳೆ ಪ್ರಥಮ ಬಾರಿಗೆ ಜಿಲ್ಲೆಗೆ ಬರಲಿದ್ದಾರೆ. ಈ ಸಂದರ್ಭದಲ್ಲಿ ಅವರಿಗೆ ಜಿಲ್ಲೆಯಲ್ಲಿ ನೆನೆಗುದಿಗೆ ಬಿದ್ದಿರುವ ಕೆಲವು ಪ್ರಮುಖ ಯೋಜನೆಗಳ ಬಗ್ಗೆ ನೆನಪು ಮಾಡಿಕೊಡುವ ಒಂದು ಯತ್ನ. ಕಾಗೋಡು ಜಿಲ್ಲೆಯವರೇ ಆಗಿರುವುದರಿಂದ ಮತ್ತು ಈ ಹಿಂದೆಯೂ ಉಸ್ತುವಾರಿ ಸಚಿವರಾಗಿರುವುದರಿಂದ ಜಿಲ್ಲೆಯ ಎಲ್ಲ ಸಮಸ್ಯೆಗಳ ಬಗ್ಗೆ ಅರಿವಿದೆ.  ಕೆಲವು ಯೋಜನೆಗಳು ಅನುಷ್ಠಾನಗೊಂಡು ಅರ್ಧಕ್ಕೆ ಸ್ಥಗಿತಗೊಂಡಿದ್ದರೆ, ಮತ್ತೆ ಕೆಲವು ಘೋಷಿತ ಯೋಜನೆಗಳು ಇಲ್ಲಿಯವರೆಗೂ ಕಾರ್ಯಗತವೇ ಗೊಂಡಿಲ್ಲ. ನಗರಕ್ಕೆ ಸಂಬಂಧಿಸಿದ ಮಹತ್ವದ ಯೋಜನೆಗಳ ಬಗ್ಗೆ ಜಿಲ್ಲಾ ಉಸ್ತುವಾರಿ ಸಚಿವರು ವಿಶೇಷ ಆಸಕ್ತಿ ವಹಿಸಬೇಕು. ಅಧಿಕಾರಿಗಳ ಸಭೆ ನಡೆಸಿ ಮಾಹಿತಿ ಕಲೆ ಹಾಕಬೇಕು. ಮುಖ್ಯಮಂತ್ರಿಗಳು ಸೇರಿದಂತೆ ಸಂಬಂಧಿಸಿದ ಸಚಿವರೊಂದಿಗೆ ಚರ್ಚಿಸಿ, ತಮ್ಮ ಅವಧಿಯಲ್ಲಿ ಈ ಯೋಜನೆಗಳ ಅನುಷ್ಠಾನಕ್ಕೆ ಅಗತ್ಯ ಕ್ರಮಕೈಗೊಳ್ಳಬೇಕು ಎಂಬುವುದು ಜಿಲ್ಲೆಯ ನಾಗರಿಕರ ಆಗ್ರಹ.


  ಕೇಂದ್ರ ಸರ್ಕಾರದ ಪ್ರತಿಷ್ಠಿತ ’ಸ್ಮಾರ್ಟ್ ಸಿಟಿ’ ಹಾಗೂ ’ಅಮೃತ್’ ಯೋಜನೆಗಳಡಿ ಸ್ಥಾನ ಪಡೆದುಕೊಳ್ಳುವ ಮೂಲಕ ಶಿವಮೊಗ್ಗ ನಗರ ಇಡೀ ದೇಶದ ಗಮನ ಸೆಳೆದಿದೆ. ಆದರೆ ನಗರಕ್ಕೆ ಸಂಬಂಧಿಸಿದಂತೆ ಹಲವು ಮಹತ್ವದ, ಜನೋಪಯೋಗಿ ಯೋಜನೆಗಳು ನಾನಾ ಕಾರಣಗಳಿಂದ ನೆನೆಗುದಿಗೆ ಬಿದ್ದಿವೆ. ಇದು ನಗರದ ಬೆಳವಣಿಗೆ ಹಾಗೂ ಅಭಿವೃದ್ಧಿಯ ಮೇಲೆ ಪರಿಣಾಮ ಬೀರಿದ್ದು, ನೂತನ ಜಿಲ್ಲಾ ಉಸ್ತುವಾರಿ ಸಚಿವ ಕಾಗೋಡು ತಿಮ್ಮಪ್ಪ ಈ ಯೋಜನೆಗಳ ಅನುಷ್ಠಾನಕ್ಕೆ ಚಿತ್ತ ಹರಿಸಬೇಕಾಗಿದೆ.
ವಿಮಾನ ನಿಲ್ದಾಣ:
ಹೊರವಲಯ ಸೋಗಾನೆ ಬಳಿ ನಿರ್ಮಿಸುತ್ತಿರುವ ವಿಮಾನ ನಿಲ್ದಾಣ ಕಾಮಗಾರಿಯು ಅಕ್ಷರಶಃ ಹಳ್ಳ ಹಿಡಿದಿದೆ ಎಂದರೇ ತಪ್ಪಾಗಲಾರದು. ಈಗಾಗಲೇ ಕಾಮಗಾರಿಗೆ ನೂರಾರು ಕೋಟಿ ರೂ. ವೆಚ್ಚ ಮಾಡಲಾಗಿದೆ. ಪ್ರಸ್ತುತ ತಾಂತ್ರಿಕ ಕಾರಣ, ಸರ್ಕಾರದ ನಿರ್ಲಕ್ಷ್ಯದಿಂದ ಕಾಮಗಾರಿ ಸ್ಥಗಿತಗೊಂಡಿದೆ. ಪ್ರಸ್ತುತ ನಡೆಸಲಾಗಿರುವ ಕೆಲಸ ಕೂಡ ಹಾಳಾಗುತ್ತಿದೆ. ಸದ್ಯದ ಸ್ಥಿತಿಗತಿ ಗಮನಿಸಿದರೆ ಯೋಜನೆ ಟೇಕಾಫ್ ಆಗುವ ಯಾವುದೇ ಲಕ್ಷಣಗಳು ಗೋಚರವಾಗುತ್ತಿಲ್ಲವಾಗಿದೆ.
ಈ ಹಿಂದೆ ಕೇಂದ್ರ ವಿಮಾನಯಾನ ಪ್ರಾಧಿಕಾರಕ್ಕೆ ಕಾಮಗಾರಿ ಹಸ್ತಾಂತರಿಸುವ ಚರ್ಚೆಯಿತ್ತು. ಕೇಂದ್ರ ವಿಮಾನಯಾನ ರಾಜ್ಯ ಸಚಿವರು ಕೂಡ ಶಿವಮೊಗ್ಗಕ್ಕೆ ಭೇಟಿಯಿತ್ತು ಪರಿಶೀಲನೆ ನಡೆಸಿದ್ದರು. ರಾಜ್ಯ ಸರ್ಕಾರ ಕೇಂದ್ರ ಸರ್ಕಾರದ ಸುಪರ್ದಿಗೆವಹಿಸಿದರೆ ಕಾಲಮಿತಿಯಲ್ಲಿ ಕಾಮಗಾರಿ ಪೂರ್ಣಗೊಳಿಸುವ ಭರವಸೆಯನ್ನು ಕೇಂದ್ರ ಸಚಿವರು ನೀಡಿದ್ದರು. ಆದರೆ ರಾಜ್ಯ ಸರ್ಕಾರ ಈ ನಿಟ್ಟಿನಲ್ಲಿ ಇಲ್ಲಿಯವರೆಗೂ ಯಾವುದೇ ನಿರ್ಧಾರ ಕೈಗೊಂಡಿಲ್ಲ. ಮತ್ತೊಂದೆಡೆ ಖಾಸಗಿ ಸಹಭಾಗಿತ್ವದಲ್ಲಿ ವಿಮಾನ ನಿಲ್ದಾಣ ಕಾಮಗಾರಿ ಕೈಗೆತ್ತಿಕೊಳ್ಳುವ ಚಿಂತನೆ ಕೂಡ ಸರ್ಕಾರ ನಡೆಸುತ್ತಿದೆ.
ಹೊರವರ್ತುಲ ರಸ್ತೆ:
 ನಗರದ ಭವಿಷ್ಯದ ಬೆಳವಣಿಗೆ, ವಾಹನ ಸಂಚಾರ ಗಮನದಲ್ಲಿಟ್ಟುಕೊಂಡು ಗುಜರಾತ್ ರಾಜ್ಯದ ಅಹಮದಬಾದ್ ಮಾದರಿಯಲ್ಲಿ 200 ಅಡಿ ಹೊರವರ್ತುಲ ರಸ್ತೆ ನಿರ್ಮಾಣ ಮಾಡುವ ಯೋಜನೆ ರೂಪಿಸಲಾಗಿದೆ. ಈ ಹಿಂದಿನ ಸರ್ಕಾರದ ಅವಧಿಯಲ್ಲಿ 400 ಕೋಟಿ ರೂ. ಅನುದಾನ ಕೂಡ ಮೀಸಲಿರಿಸಲಾಗಿತ್ತು. ಯೋಜನೆಗೆ ಸಂಬಂಧಿಸಿದಂತೆ ಜಿಲ್ಲಾಡಳಿತ ರಸ್ತೆ ಹಾದು ಹೋಗುವ ಸ್ಥಳಗಳ ಸರ್ವೇ ಪೂರ್ಣಗೊಳಿಸಿದೆ. ನಗರಾಭಿವೃದ್ದಿ ಪ್ರಾಧಿಕಾರದ ಮಹಾಯೋಜನೆಯಲ್ಲಿಯೂ ಅನುಮೋದಿಸಲಾಗಿದೆ.
ಆದರೆ ಇಲ್ಲಿಯವರೆಗೂ ಹೊರವರ್ತುಲ ರಸ್ತೆ ನಿರ್ಮಾಣ ಯೋಜನೆ ಕಾರ್ಯಗತಗೊಂಡಿಲ್ಲ. ಪ್ರಸ್ತುತ ಈ ಯೋಜನೆಯ ಅಂದಾಜು ವೆಚ್ಚ 1000 ಕೋಟಿ ರೂ.ಗಳ ಗಡಿ ದಾಟುವುದರಿಂದ ಸರ್ಕಾರ ಈ ಯೋಜನೆಯ ಅನುಷ್ಠಾನದತ್ತ ಗಮನಹರಿಸುವ ಗೋಜಿಗೆ ಹೋಗುತ್ತಿಲ್ಲ. ಮತ್ತೊಂದೆಡೆ ಲೋಕಸಭಾ ಸದಸ್ಯ ಬಿ.ಎಸ್.ಯಡಿಯೂರಪ್ಪರವರು ಈ ಯೋಜನೆಯನ್ನು ಕೇಂದ್ರ ಸರ್ಕಾರದ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಮೂಲಕ ಅನುಷ್ಠಾನಗೊಳಿಸುವುದಾಗಿ ಹೇಳಿದ್ದರು. ಆದರೆ ಇಲ್ಲಿಯವರೆಗೂ ಈ ಪ್ರಕ್ರಿಯೆಯೇ ಆರಂಭವಾಗಿಲ್ಲ.
ಸರ್ಕಾರಿ ಸಿಟಿ ಬಸ್:
ಈ ಹಿಂದಿನ ಕೇಂದ್ರ ಯುಪಿಎ ಸರ್ಕಾರದ ಅವಧಿಯಲ್ಲಿ ಶಿವಮೊಗ್ಗ ನಗರದಲ್ಲಿ 65 ಸರ್ಕಾರಿ ಸಿಟಿ ಬಸ್‌ಗಳ ಸಂಚಾರಕ್ಕೆ ಅನುಮತಿ ನೀಡಲಾಗಿದೆ. ಬಸ್‌ಗಳ ಖರೀದಿಗೆ, ಪ್ರತ್ಯೇಕ ಬಸ್ ಟರ್ಮಿನಲ್, ಡಿಪೋ, ವರ್ಕ್‌ಶಾಪ್‌ಗೆ ಅಗತ್ಯವಾದ ಅನುದಾನ ಕೂಡ ಬಿಡುಗಡೆ ಮಾಡಿದೆ. ಆದರೆ ಜಿಲ್ಲಾಡಳಿತ ಹಾಗೂ ಕೆ.ಎಸ್.ಆರ್.ಟಿ.ಸಿ. ಸಂಸ್ಥೆಯ ನಿರ್ಲಕ್ಷ್ಯದಿಂದ ಇಲ್ಲಿಯವರೆಗೂ ನಗರದಲ್ಲಿ ಸರ್ಕಾರಿ ಸಿಟಿ ಬಸ್‌ಗಳ ಸಂಚಾರ ಆರಂಭವಾಗಿಲ್ಲ.
ಈಗಾಗಲೇ ಈ ಯೋಜನೆಯಡಿ ಭದ್ರಾವತಿಯಲ್ಲಿ ಬಸ್ ಟರ್ಮಿನಲ್, ಡಿಪೋ ಕಟ್ಟಡ ಕಾಮಗಾರಿ ನಡೆಯುತ್ತಿದೆ. ಆದರೆ ಶಿವಮೊಗ್ಗ ನಗರದಲ್ಲಿ ಡಿಪೋ ನಿರ್ಮಾಣಕ್ಕೆ ಜಿಲ್ಲಾಡಳಿತ ಗುರುತು ಮಾಡಿರುವ ಜಾಗವನ್ನು ಇಲ್ಲಿಯವರೆಗೂ ಕೆ.ಎಸ್.ಆರ್.ಟಿ.ಸಿ. ಸಂಸ್ಥೆ ತನ್ನ ಸುಪರ್ದಿಗೆ ತೆಗೆದುಕೊಂಡಿಲ್ಲ. ಪ್ರತ್ಯೇಕ ಬಸ್ ಟರ್ಮಿನಲ್, ಡಿಪೋ ಕಟ್ಟಡ ನಿರ್ಮಾಣ ಕಾಮಗಾರಿ ಇಲ್ಲಿಯವರೆಗೂ ಆರಂಭವಾಗಿಲ್ಲ. ಲಕ್ಷಾಂತರ ನಾಗರಿಕರಿಗೆ ಅನುಕೂಲವಾಗುವ ಯೋಜನೆ ನೆನೆಗುದಿ ಬೀಳುವ ಹಂತದಲ್ಲಿದೆ.
ರಸ್ತೆ ಅಗಲೀಕರಣ:
ದಿನದಿಂದ ದಿನಕ್ಕೆ ನಗರದಲ್ಲಿ ಜನ-ವಾಹನ ಸಂಚಾರ ಹೆಚ್ಚಾಗುತ್ತಿದೆ. ಪ್ರಮುಖ ರಸ್ತೆಗಳ ಅಗಲೀಕರಣ, ಮೇಲ್ದರ್ಜೆಗೇರಿಸುವ ಪ್ರಕ್ರಿಯೆ ನಡೆಸುವುದು ತುರ್ತು ಅಗತ್ಯವಾಗಿದೆ. ಆದರೆ ಅನುದಾನದ ಕೊರತೆಯಿಂದ ರಸ್ತೆಗಳ ಅಗಲೀಕರಣ-ಮೇಲ್ದರ್ಜೆಗೇರಿಸುವ ಪ್ರಕ್ರಿಯೆಗೆ ಹಿನ್ನಡೆಯಾಗಿದೆ. ಕೆಲ ರಸ್ತೆಗಳ ಅಗಲೀಕರಣಕ್ಕೆ ಸೂಕ್ತ ಅನುದಾನ ಕೋರಿ ಜಿಲ್ಲಾಡಳಿತವು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿರುವ ಮಾಹಿತಿಯಿದ್ದು, ಸಂಬಂಧಿಸಿದ ಇಲಾಖಾ ಸಚಿವರು ಮಾತ್ರ ಇತ್ತ ಗಮನಹರಿಸಿಲ್ಲ.
  ಇನ್ನೂ ಎರಡು ಹೊಸ ಪೊಲೀಸ್ ಠಾಣೆಗಳ ಮಂಜೂರು, ಕೃಷಿ ವಿಶ್ವ ವಿದ್ಯಾಲಯ ಹಾಗೂ ಪಶು ವೈದ್ಯಕೀಯ ವಿದ್ಯಾಲಯಕ್ಕೆ ಅನುದಾನ, ರೈಲ್ವೆ ನಿಲ್ದಾಣದ ಬಳಿಯ ಹೊರವರ್ತುಲ ರಸ್ತೆ ವಿವಾದ ಪರಿಹಾರ, ಕೇಂದ್ರ-ರಾಜ್ಯ ಸರ್ಕಾರಗಳ ಸಹಭಾಗಿತ್ವದಲ್ಲಿ ಕೈಗೆತ್ತಿಕೊಂಡಿರುವ ಶಿವಮೊಗ್ಗ-ಹರಿಹರ ರೈಲ್ವೆ ಮಾರ್ಗ ನಿರ್ಮಾಣ ಮತ್ತು ರೈಲ್ವೆ ಮೇಲ್ಸೇತುವೆ ನಿರ್ಮಾಣಕ್ಕೆ ರಾಜ್ಯ ಸರ್ಕಾರದ ಪಾಲಿನೆ ಅನುದಾನ ದೊರಕಿಸಿಕೊಡುವುದು, ಆಶ್ರಯ ಯೋಜನೆಯಡಿ ನಿವೇಶನ ಕಲ್ಪಿಸುವುದು ಸೇರಿದಂತೆ ಹತ್ತು ಹಲವು ಮಹತ್ವದ ಯೋಜನೆಗಳಿಗೆ ಜಿಲ್ಲಾ ಉಸ್ತುವಾರಿ ಸಚಿವರು ಗಮನಹರಿಸಿ ಪರಿಹಾರ ಕಲ್ಪಿಸಲಿದ್ದಾರೆಯೇ ಎಂಬುವುದನ್ನು  ಕಾದು ನೋಡಬೇಕಾಗಿದೆ. 

Tuesday, 28 June 2016


ಮೂರೂ ಪಕ್ಷಗಳಿಗೂ ಭಿನ್ನಮತದ ರೋಗ


ಜೆಡಿಎಸ್, ಕಾಂಗ್ರೆಸ್, ಬಿಜೆಪಿಗೆ ಮುಂಗಾರಿನಲ್ಲಿ ಬರುವ ಅಂಟುಜಾಢ್ಯ ತಗುಲಿದೆ. ಆ ಪಕ್ಷದ ಮುಖಂಡರನ್ನು ಅದು ಬಲಿತೆಗೆದುಕೊಳ್ಳಲು ಹೊಂಚು ಹಾಕಿರುವಂತೆ ಒಂದು ಹಂತದಲ್ಲಿ ಕಂಡುಬಂತಾದರೂ ಅದು ಸಾಧ್ಯವಾಗಲಿಲ್ಲ. ಜೆಡಿಎಸ್ ಮತ್ತು ಕಾಂಗ್ರೆಸ್‌ನಲ್ಲಿ ಈಗ ಈವೈರಸ್ ದಾಳಿ ಹಿಮ್ಮೆಟ್ಟಿದಂತೆ ಕಂಡುಬರುತ್ತಿದೆ. ಬಿಜೆಪಿಯಲ್ಲಿ ಜಾಢ್ಯವೆಂಬ ಸಣ್ಣ ಬಿರುಕು ಮಾತ್ರ ಕಂಡುಬಂದಿದೆ. 



  ರಾಜ್ಯದಲ್ಲಿ ಮುಂಗಾರು ಆರಂಭವಾಗುತ್ತಿದ್ದಂತೆ ಡೆಂಗ್ಯೂ ಜ್ವರ ಹಲವು ಜಿಲ್ಲೆಗಳಲ್ಲಿ ಕಾಣಿಸಿಕೊಂಡಿದೆ. ಇದೇ ರೀತಿ ಭಿನ್ನಮತ ಎಂಬ ರೋಗವೂ ಮೂರು ಪ್ರಮುಖ ಪಕ್ಷಗಳಿಗೂ ತಗುಲಿದೆ. ಸದ್ಯ ರಾಜ್ಯದಲ್ಲಿ ಪ್ರಮುಖ ಸುದ್ದಿಯಲ್ಲಿರುವ ಈ ಭಿನ್ನಮತ ಎಂಬ ರೋಗ ತೊಲಗುವ ನಿರೀಕ್ಷೆ ಕಂಡುಬರುತ್ತಿಲ್ಲ. ಏಕೆಂದರೆ ಒಂದು ಪಕ್ಷದಿಂದ ಇನ್ನೊಂದು ಪಕ್ಷಕ್ಕೆ ಸಾಂಕ್ರಾಮಿಕವಾದಂತೆ ಕಂಡುಬರುತ್ತಿದೆ. ಜೆಡಿಎಸ್‌ನಲ್ಲಿ ಇದು ಉಲ್ಬಣಿಸಿ ವಿಕೋಪಕ್ಕೆ ಹೋಗಿ 8 ಶಾಸಕರನ್ನು ಅಮಾನತುಗೊಳಿಸಲಾಯಿತು. ಕಾಂಗ್ರೆಸ್‌ನಲ್ಲಿ ಕಳೆದ ವಾರದಿಂದ ಆರಂಭವಾಗಿದ್ದು, ಶಸ್ತ್ರಚಿಕಿತೆ ಇಲ್ಲದೆ ಗುಣಮುಖರನ್ನಾಗಿಸುವ ವೈದ್ಯರನ್ನು ಕಣಕ್ಕೆ ತರಲಾಗಿದೆ. ಇದರಿಂದ ಮತ್ತೆ ಚಿಗುರುವ ಲಕ್ಷಣ ಕಂಡುಬರುತ್ತಿಲ್ಲ. ಇನ್ನು ಬಿಜೆಪಿಯಲ್ಲಿ ಮೊನ್ನೆಯಷ್ಟೇ ಈ ರೋಗ ಲಕ್ಷಣ ಕಂಡುಬಂದಿದೆ. ಚಿಕ್ಕ ಪ್ರಮಾಣದಲ್ಲಿ ಕಂಡುಬಂದಿರುವುದರಿಂದ ಅದು ಅಲ್ಲಿಗೇ ಗುಣವಾಗುವುದೊ ಅಥವಾ ಉಲ್ಬಣಿಸುವುದೋ ಎನ್ನುವುದನ್ನು ಕಾದು ನೋಡಬೇಕಿದೆ.
ಜೆಡಿಎಸ್‌ನಲ್ಲಿ ವಿಧಾನಪರಿಷತ್ ಚುನಾವಣೆ, ರಾಜ್ಯಸಭಾ ಚುನಾವಣೆ ರೋಗ ಉಲ್ಬಣಿಸಲು ಕಾರಣವಾಯಿತು. ಅಡ್ಡಮತವನ್ನು ಹಾಕಿದವರು ದೇವೇಗೌಡ- ಕುಮಾರಸ್ವಾಮಿ ವಿರುದ್ದ ತೊಡೆತಟ್ಟಿ ಅಬ್ಬರಿಸಿದ್ದರು. ಮಾರನೆಯ ದಿನವೇ ಆ 8 ಶಾಸಕರನ್ನು ಅಮಾನತುಗೊಳಿಸಿ ಅದು ಸದ್ಯ ಗುಣವಾಗದಂತೆ ಮಾಡಿಕೊಂಡಿದ್ದಾರೆ. ಇದು ಹುಣ್ಣಾಗಿದೆ, ಆಗಾಗ ತುರಿಕೆಯಾಗುತ್ತ, ಅತ್ತ ಗುಣವಾಗದೆ, ಇತ್ತ ಹೆಚ್ಚಾಗದೆ ಕಾಡತೊಡಗಿದೆ.
ಕಾಂಗ್ರೆಸ್‌ನಲ್ಲಿ ಸಿದ್ದರಾಮಯ್ಯ ಜೂನ್ 19ರಂದು ಸಚಿವ ಸಂಪುಟ ವಿಸ್ತರಿಸಿದಾಕ್ಷಣದಿಂದ ಈ ರೋಗ ಅಂಟಿಕೊಂಡಿದೆ. ಕಳೆದ ವಾರವಿಡೀ ಸುದ್ದಿಮಾಡಿದ ರೋಗ ಕಳೆದ 2-3 ದಿನದಿಂದ ಸದ್ದಡಗುವಂತೆ ಕಂಡುಬರುತ್ತಿದೆ. ಸಚಿವ ಸ್ಥಾನದಿಂದ ಹೊರದಬ್ಬಲ್ಪಟ್ಟ ನಾಲ್ಕಾರು ಮುಖಂಡರು ಈ ರೋಗ ಉಲ್ಬಣಿಸುವಂತೆ ಮಾಡಲು ಸಾಕಷ್ಟು ಯತ್ನ ನಡೆಸಿದರು. ಆದರೆ ಇದು ಪಸರಿಸಲೇ ಇಲ್ಲ. ಆಪರೇಶನ್ ಅಗತ್ಯವಾಗಬಹುದೇನೋ ಎಂದು ಒಂದು ಹಂತದಲ್ಲಿ ಊಹಿಸಲಾಗಿತ್ತಾದರೂ ಹಾಗಾಗಲಿಲ್ಲ. ಪಕ್ಷದೊಳಗಿರುವ ಕೆಲವು ನಾಯಕರೆಂಬ ತಜ್ಞವೈದ್ಯರು ಸಕಾಲದಲ್ಲಿ ಚಿಕಿತ್ಸೆ ನೀಡಿ ರೋಗ ಬಾಧೆ ಕಡಿಮೆಯಾಗುವಂತೆ ಮಾಡಿದ್ದಾರೆ. ಹಾಗಂತ ಪೂರ್ತಿ ವಾಸಿಯಾಗಿಲ್ಲ. ಸದ್ಯದ ಮಟ್ಟಿಗೆ ಆಪರೇಶನ್ ಇಲ್ಲದೆ ಕಡಿಮೆ ಆಗಬಹುದೇನೋ ಎಂದೆನಿಸುತ್ತಿದೆ.
ಕಾಂಗ್ರೆಸ್‌ಗೆ ಬಂದ ರೋಗ ಕಡಿಮೆಯಾಗುವ ಹಂತ ಕಂಡುಬರುತ್ತಿರುವಂತೆ ಬಿಜೆಪಿಯಲ್ಲಿ ರೋಗದ ಲಕ್ಷಣಗಳು ಕಂಡುಬರತೊಡಗಿವೆ. ಯಡಿಯೂರಪ್ಪ ಅವರನ್ನು ರಾಜ್ಯ ಬಿಜೆಪಿ ಅಧ್ಯಕ್ಷರನ್ನಾಗಿಸಿದ ನಂತರ ಈ ರೋಗದ ವೈರಸ್ ಹುಟ್ಟಿಕೊಂಡಿತ್ತಾದರೂ ಒಳಗೊಳಗೇ ಕೆಲಸ ಮಾಡಲಾರಂಭಿಸಿತ್ತು. ಬಹುತೇಕ ಜನರು ಆಗಲೇ ಇದನ್ನು ಊಹಿಸಿದ್ದರು. ಅದು ಈಗ ನಿಜವಾಗತೊಡಗಿದೆ. ಯಡಿಯೂರಪ್ಪ ಯಾವತ್ತೂ ಜಾತೀಯತೆ ಮತ್ತು ಸ್ವಜನಪಕ್ಷಪಾತವನ್ನು ಮಾಡಿಕೊಂಡೇ ಬಂದವರು. ವೀರಶೈವರನ್ನು ಮಾತ್ರ ಓಲೈಸಿಕೊಳ್ಳಲು ಇನ್ನಿಲ್ಲದ ಕೆಲಸ ಮಾಡಿದರು. ತಾನಿಲ್ಲದೆ ಪಕ್ಷವೇ ಇಲ್ಲ ಎನ್ನುವ ವಾತಾವರಣವನ್ನು ಸೃಷ್ಟಿಸಿ, ಅದರ ಲಾಭ ಪಡೆಯುವವರು.
ಈಗ ಸಹ ರಾಜ್ಯ ಮತ್ತು ಜಿಲ್ಲಾ ಘಟಕವನ್ನು ಪುನರ‌್ರಚಿಸಲು ಹೋಗಿ ಯಡವಟ್ಟು ಮಾಡಿಕೊಂಡಿದ್ದಾರೆ.  ಇದು ಹಲವು ನಾಯಕರನ್ನು ರೊಚ್ಚಿಗೆಬ್ಬಿಸಿದೆ.
ಈಗ ಮತ್ತೆ ತನ್ನ ಜಾತಿ ಬಾಂಧವರನ್ನೇ ಮುಂದುಮಾಡಿಕೊಂಡು ಪಕ್ಷ ಕಟ್ಟಹೊರಟಿದ್ದಾರೆ. ಇಲ್ಲಿಯವರೆಗೆ ಪಕ್ಷಕ್ಕಾಗಿ ಶ್ರಮಿಸಿದವರನ್ನು, ಪಕ್ಷ ಕಟ್ಟಿದ ಹಿರಿಯರನ್ನು ನಿರ್ಲಕ್ಷಿಸಿದ್ದಾರೆ ಎಂಬ ಆರೋಪ ಹೊತ್ತುಕೊಂಡಿದ್ದಾರೆ. ಇದರಿಂದ ಆಕ್ರೋಶದ ಕಟ್ಟೆ ಸಣ್ಣದಾಗಿ ಒಡೆದಿದೆ, ಅಥವಾ ಬಿರುಕು ಕಂಡುಬಂದಿದೆ ಎನ್ನಬಹುದು. ಮೊನ್ನೆ ವಿಧಾನ ಪರಿಷತ್ ಪ್ರತಿಪಕ್ಷ ನಾಯಕ ಕೆ.ಎಸ್. ಈಶ್ವರಪ್ಪ ಇದನ್ನು ತೋಡಿಕೊಂಡಿದ್ದಾರೆ. ಈ ಮೂಲಕ ಮತ್ತೆ ಬಿಜೆಪಿಯಲ್ಲಿ ಭಿನ್ನಮತ ಕಾಣಿಸಿಕೊಳ್ಳಬಹುದು ಎಂಬ ಸೂಕ್ಷ್ಮ ಎಚ್ಚರಿಕೆಯನ್ನು ನೀಡಿದ್ದಾರೆ.
ಒಟ್ಟಾರೆ, ಭಿನ್ನಮತ ಎಂಬ ರೋಗ ಜೂನ್ ತಿಂಗಳಲ್ಲಿ ಒಂದರ ನಂತರ ಒಂದು ಪಕ್ಷಕ್ಕೆ ಈ ರೋಗ ತಗುಲಿದ್ದು ಮಾತ್ರ ವಿಶೇಷವೇ ಸರಿ. ಈ ಮೂರೂ ಪಕ್ಷಗಳಲ್ಲಿ ಭಿನ್ನಮತದ ವೈರಸ್ ಇನ್ನೂ ಇದೆ. ಅದು ಉಲ್ಬಣಿಸುವುದೋ, ಕಡಿಮೆಯಾಗುವುದೋ ಗೊತ್ತಿಲ್ಲ. ಆಯಾಯ ಪಕ್ಷದ ನಾಯಕರು ಆದಷ್ಟು ಶೀಘ್ರ ವೈರಸ್ ಓಡಿಸದಿದ್ದರೆ ಇಡೀ ಪಕ್ಷಕ್ಕೆ ಅದು ತಗುಲಿ ಇನ್ನಷ್ಟು ಅನಾಹುತ ಮಾಡುವ ಸಂಭವವಿದೆ.
ರೋಗ ಲಕ್ಷಣ ಕಂಡುಬಂದ ನಂತರ ಅದನ್ನು ಗುಣಪಡಿಸುವ ಕೆಲಸವನ್ನು ಸಂಬಂಧಿತರು ಮಾಡಬೇಕಿದೆ. ರೋಗ ಗುಣಪಡಿಸುವುದಕ್ಕಿಂತ ತಡೆಗಟ್ಟುವುದು ಒಳ್ಳೆಯದು ಎಂಬ ಗಾದೆಮಾತಿದೆ. ಅದನ್ನು ಬಿಜೆಪಿ ಹಿರಿಯರು ಅರ್ಥಮಾಡಿಕೊಂಡು ಕಾರ್ಯತತ್ಪರರಾದರೆ ರೋಗದಿಂದ ಪಕ್ಷವನ್ನು ಪಾರುಮಾಡಬಹುದು. ಈಗಷ್ಟೇ ದಾಳಿ ಇಟ್ಟಿರುವ ಭಿನ್ನಮತದ ವೈರಸ್ ಬಿಜೆಪಿಯ ಮೇಲೆ ಯಾವ ರೀತಿ ಪರಿಣಾಮ ಬೀರಲಿದೆ ಎನ್ನುವುದನ್ನು ಕಾದುನೋಡಬೇಕಿದೆ.



Monday, 27 June 2016

ಸ್ಮಾರ್ಟ್ ಸಿಟಿ ಯೋಜನೆ ಸಿದ್ಧತೆಗೆ ಐಡೆಕ್ ಸಂಸ್ಥೆಯ ನೆರವು


* ಎರಡನೆ ಹಂತದ ಸ್ಮಾರ್ಟ್ ಸಿಟಿ ಯೋಜನೆಯಲ್ಲಿ ಪಾಲ್ಗೊಳ್ಳಲು ಭರದ ಸಿದ್ಧತೆ
*ಯೋಜನೆ ರೂಪಿಸಲು  ಐಡೆಕ್ ಸಂಸ್ಥೆಯ ಸೇವೆ
* ಹಿಂದಿನ ಬಾರಿ ಪ್ರಸ್ತಾಪಿಸಲಾಗಿದ್ದ ಮೆಡಿಟೂರಿಸಂಗೆ ಖೊಕ್
* ಗುಂಡಪ್ಪ ಶೆಡ್ ಬಳಿ ಪರ್ಯಾಯ ನೈಸರ್ಗಿಕ ಚಿಕಿತ್ಸಾ ತಾಣ ಸ್ಥಾಪನೆ
* ತುಂಗಾ ಎಡದಂಡೆ ಕಾಲುವೆಯವರೆಗಿನ  ಅಂದಾಜು 1500 ಎಕ್ರೆ ಪ್ರದೇಶ ಅಭಿವೃದ್ಧಿಗೆ ನಿರ್ಧಾರ
* ರಿವರ್ ಫ್ರಂಟ್ ಡೆವಲಪ್‌ಮೆಂಟ್ ಯೋಜನೆ ಅಳವಡಿಕೆ
* ಕೆನಾಲ್ ಸೌರ ವಿದ್ಯುತ್ ಉತ್ಪದನಾ ಘಟಕ ಈ ಬಾರಿಯೂ ಪ್ರಸ್ತಾವ



ಶಿವಮೊಗ್ಗ: ಕೇಂದ್ರ ಸರಕಾರವು ಸ್ಮಾರ್ಟ್ ಸಿಟಿ ಯೋಜನೆಗಾಗಿ ನಡೆಸಿದ ಮೊದಲ ಹಂತದ ಸ್ಪರ್ಧೆಯಲ್ಲಿ ಆಯ್ಕೆಯಾಗಿರದ ಶಿವಮೊಗ್ಗ ಪಾಲಿಕೆ ಎರಡನೆಯ ಹಂತದ ಯೋಜನೆಯಲ್ಲಿ ಆಯ್ಕೆಯಾಗಲು ಸರ್ವಸಿದ್ಧತೆ ಆರಂಭಿಸಿದೆ. ಇದಕ್ಕಾಗಿ ಐಡೆಕ್ ಸಂಸ್ಥೆಯ ಸೇವೆ ಪಡೆಯಲಾಗುತ್ತಿದೆ.
2015ರ ನವೆಂಬರ್ 13ರಂದು ಮೊದಲ ಹಂತದ ಯೋಜನೆಗೆ ಅಂತಿಮ ರೂಪುರೇಶೆ ತಯಾರಿಸಿ ಕೇಂದ್ರ ಸರಕಾರಕ್ಕೆ ಕಳುಹಿಸಲಾಗಿತ್ತು. ಈಗ ಅದೇ ಅಂಕಿ-ಅಂಶಗಳನ್ನೊಳಗೊಡಂತೆ ಪೂರಕ ದಾಖಲಾತಿಯೊಂದಿಗೆ, ಕೆಲವು ಮಾರ್ಪಾಡುಗಳನ್ನು ಮಾಡಿ ಯೋಜನೆ  ಸಿದ್ಧಗೊಳಿಸಲಾಗುತ್ತಿದೆ.
ಈ ಬಾರಿ ಸಾರ್ವಜನಿಕ ವಲಯ, ವಾಣಿಜ್ಯ ವಲಯ ಮತ್ತು ವಸತಿ ಪ್ರದೇಶವನ್ನೊಳಗೊಂಡ ನಗರದ ಹೃದಯ ಭಾಗವನ್ನು ಪ್ರದೇಶಾಧಾರಿತ ಪ್ರಸ್ತಾವನೆಯಲ್ಲಿ ಆಯ್ದುಕೊಳ್ಳಲಾಗಿದೆ. ಇದು ಉತ್ತರದಲ್ಲಿ ರೈಲ್ವೆ ಹಳಿ, ದಕ್ಷಿಣದಲ್ಲಿ ಬಿ.ಎಚ್.ರಸ್ತೆ, ಪೂರ್ವದಲ್ಲಿ ತುಂಗಾನದಿಯ ಎಡ ಮತ್ತು ಬಲ ದಂಡೆಗಳನ್ನು ಒಳಗೊಂಡಿದೆ. ಪಶ್ಚಿಮದಲ್ಲಿ ತುಂಗಾ ಎಡದಂಡೆ ಕಾಲುವೆಯವರೆಗಿನ ಒಟ್ಟು ವಿಸ್ತಿರ್ಣ ಅಂದಾಜು 1500 ಎಕ್ರೆ ಪ್ರದೇಶವನ್ನು ಅಳವಡಿಸಿಕೊಳ್ಳಲಾಗಿದೆ. ಮೊದಲ ಹಂತದ ಯೋಜನೆಯಲ್ಲೂ ಇದೇ ವಿಸ್ತೀರ್ಣವನ್ನು ಅಳವಡಿಸಿಕೊಳ್ಳಲಾಗಿತ್ತು.
ಈ ಪ್ರದೇಶದೊಳಗೆ ಪುನರ್ನಿರ್ಮಾಣ ಯೋಜನೆಯಲ್ಲಿ ರಿವರ್ ಫ್ರಂಟ್ ಡೆವಲಪ್‌ಮೆಂಟ್‌ನ್ನು ಪ್ರಾಥಮಿಕವಾಗಿ ಆಯ್ಕೆಮಾಡಿಕೊಳ್ಳಲಾಗಿದೆ. ಕಳೆದ ಬಾರಿಯೂ ಇದನ್ನು ಪ್ರಸ್ತಾಪಿಸಲಾಗಿತ್ತು. ಆದರೆ ಈ ಹಂತಹಂತವಾಗಿ ಇದನ್ನು ಅಭಿವೃದ್ಧಿಪಡಿಸುವ ಬಗ್ಗೆ ಈ ಬಾರಿ ವಿವರಿಸಲಾಗಿದೆ.
ಇದರ ಜೊತೆಗೆ ಹಿಂದಿನ ಪ್ರಸ್ತಾವನೆಯಲ್ಲಿದ್ದ ಶಿವಪ್ಪ ನಾಯಕ ಅರಮನೆ ಅಭಿವೃದ್ಧಿ, ಕೊಳಚೆ ಪ್ರದೇಶಗಳ ಸಮಗ್ರ ಅಭಿವೃದ್ಧಿ, ಇನರ್ ಕೆನಾಲ್ ಡೆವಲಪ್‌ಮೆಂಟ್, ಹೊರವಲಯದ ಕೆನಾಲ್ ಸೌರ ವಿದ್ಯುತ್ ಉತ್ಪದನಾ ಘಟಕ, ಬಸ್ ನಿಲ್ದಾಣಗಳಲ್ಲಿ ಪೂರಕ ಅಭಿವೃದ್ಧಿಯ ಕಾಮಗಾರಿಗಳು ಮತ್ತು ಸಹಭಾಗಿ ಇಲಾಖೆಗಳ ಸಹಯೋಗದಲ್ಲಿ ವಿವಿಧ ಮೂಲಭೂತ ಸೌಕರ್ಯಗಳ ಅಭಿವೃದ್ಧಿ ಪ್ರಸ್ತಾವನೆಯನ್ನು ಮಂಡಿಸಲು ಯೋಜಿಸಲಾಗಿದೆ.
ಹಿಂದಿನ ಬಾರಿ ಪ್ರಸ್ತಾಪಿಸಲಾಗಿದ್ದ ಮೆಡಿಟೂರಿಸಂನ್ನು ಕೈಬಿಡಲಾಗಿದೆ. ಅದರ ಬದಲು ಪರ್ಯಾಯ ನೈಸರ್ಗಿಕ ಚಿಕಿತ್ಸಾ ತಾಣವನ್ನು ಗುಂಡಪ್ಪ ಶೆಡ್‌ನಲ್ಲಿ ಸ್ಥಾಪಿಸಲು ನಿರ್ಧರಿಸಲಾಗಿದೆ. ಈ ಹಿಂದೆ ಇಲ್ಲಿ ಕರ್ನಾಟಕ ನಗರ ನೀರು ಪೂರೈಕೆ ಮಂಡಳಿ ಮತ್ತು ಒಳಚರಂಡಿ ನಿಗಮದ ಮೂಲಕ ಯುಜಿಡಿ ಘಟಕವನ್ನು ಸ್ಥಾಪಿಸಲು ಚಿಂತಿಸಿದಾಗ ಸುತ್ತಮುತ್ತಲ ನಾಗರಿಕರು ವಿರೋಧಿಸಿದ್ದರು. ಇಲ್ಲಿ ಸುಮಾರು 5 ಎಕ್ರೆ ಜಾಗವಿದೆ. ಇದನ್ನು 5 ಎಂಎಲ್‌ಡಿ ಸಾಮರ್ಥ್ಯದ ಎಸ್‌ಬಿಆರ್ ಟೆಕ್ನಾಲಜಿ ಶುದ್ಧೀಕರಣ ಘಟಕವನ್ನು ಸ್ಥಾಪಿಸಲು ಮಂಡಳಿ ಪ್ರಸ್ತಾಪಿಸಿದೆ. 14 ಎಕ್ರೆ ಜಾಗದಲ್ಲಿ ಪರ್ಯಾಯ ನೈಸರ್ಗಿಕ ಚಿಕಿತ್ಸಾ ತಾಣ ಸ್ಥಾಪಿಸಲಾಗುವುದು.
ಇನ್ನು ಪಾನ್‌ಸಿಟಿ ಯೋಜನೆಯಡಿಯಲ್ಲಿ ಈ ಹಿಂದೆ ಪಿಪಿಪಿ ಮಾದರಿಯಲ್ಲಿ ಎಲ್‌ಇಡಿ ಲೈಟಿಂಗ್ ಮತ್ತು ಸ್ಮಾರ್ಟ್ ಸರ್ವೈಲೆನ್ಸ್ ಮತ್ತು ಜಿ-ಗವರ್ನೆನ್ಸ್ ಯೋಜನೆಗಳನ್ನು ಪ್ರಸ್ತಾಪಿಸಲಾಗಿದೆ. ನಗರಕ್ಕೆ ಪ್ರಸ್ತಾಪಿಸಲಾಗಿರುವ ಶುದ್ಧ ಗಂಗಾ ಕುಡಿಯುವ ನೀರಿನ ಯೋಜನೆ (24*7)ಯಲ್ಲಿ ಸ್ಮಾರ್ಟ್  ಮೀಟರ್ ಅಳವಡಿಕೆ ಇಲ್ಲದಿರುವ ಕಾರಣ ಅದನ್ನು ಅಳವಡಿಸಲು ಯೋಜಿಸಲಾಗಿದೆ.
ನಗರದ ಜನತೆಗೆ ಉತ್ತಮ ಗುಣಮಟ್ಟದ ಸೇವೆ ನೀಡುವ ನಿಟ್ಟಿನಲ್ಲಿ ಅವಕಾಶವಿದ್ದಲ್ಲಿ ಖಾಸಗಿ ಸಹಭಾಗಿತ್ವದಲ್ಲಿ ಕೆಲವು ಯೋಜನೆಗಳನ್ನೂ ಸಹ ತೆಗೆದುಕೊಳ್ಳಲು ಯೋಜಿಸಲಾಗಿದೆ.
ಕಳೆದ ಬಾರಿ ಸಾರ್ವಜನಿಕರೊಂದಿಗೆ ಸಂವಾದ, ಪ್ರತಿ ವಾರ್ಡುಗಳಲ್ಲಿ ಜಾಗೃತಿ ಮೂಡಿಸಿ, ಅಭಿಪ್ರಾಯ ಸಂಗ್ರಹಣೆ ಮೂಲಕ ಯೋಜನೆಯನ್ನು ತಜ್ಞ ಸಂಸ್ಥೆಯ ಮೂಲಕ ರೂಪಿಸಲಾಗಿತ್ತು,. ಅಂದಿನ ಆಯುಕ್ತ ರವಿ ಅವರು ಇದಕ್ಕಾಗಿಯೇ ವಿಶೇಷ ಕಾಳಜಿ ವಹಿಸಿದ್ದರು. ಅವರನ್ನು ಇದೇ ಕಾರ್ಯಕ್ಕಾಗಿ ನಿಯೋಜಿಸಲಾಗಿತ್ತು. ಸಾಕಷ್ಟು ವಿಶೇಷ ಪ್ರಯತ್ನ ಮಾಡಿದ್ದರೂ ಕೆಲವೇ ಅಂಕಗಳಲ್ಲಿ ಈ ಯೋಜನೆ ಕೈತಪ್ಪಿತ್ತು. ಆದ್ದರಿಂದ ಈ ಬಾರಿ ಅದೇ ಯೋಜನೆಯಲ್ಲಿ ಕೆಲವಷ್ಟೇ ಮಾರ್ಪಾಡು ಮಾಡಿ, ಕೆಲವೇ ಹೊಸ ಯೋಜನೆ ಸೇರಿಸಲು ನಿರ್ಧರಿಸಲಾಗಿದೆ. ಎರಡನೆಯ ಹಂತದ ಆಯ್ಕೆಯಲ್ಲಿ ಶಿವಮೊಗ್ಗ ಸ್ಮಾರ್ಟ್ ಸಿಟಿ ಯೋಜನೆಗೆ ಆಯ್ಕೆಯಾಗುವುದು ನಿಶ್ಚಿತ ಎನ್ನುತ್ತವೆ  ಪಾಲಿಕೆಯ ಮೂಲಗಳು.

Friday, 24 June 2016

ಮೀಸಲಾತಿಯ ಲಾಭ ಪಡೆಯದ ಮಹಿಳಾ ಜನಪ್ರತಿನಿಧಿಗಳು

ತೊಟ್ಟಿಲು ತೂಗುವ ಕೈ ದೇಶವನ್ನಾಳಬೇಕೆಂಬ ಸರಕಾರದ ಕನಸನ್ನು ನನಸಾಗುವಂತೆ ಮಾಡುವುದು ಮಹಿಳೆಯರ ಕೈಯಲ್ಲೇ ಇದೆ. ಇದಕ್ಕೆ ಅವರ ಪತಿ ಮೊದಲ ಅವಕಾಶ ಕೊಡಬೇಕು. ಅವಕಾಶ ಕೊಡದಿದ್ದರೆ ಅದನ್ನು ಪಡೆಯುವುದನ್ನೂ ಆಕೆ ತಿಳಿದಿರಬೇಕು. ಕೇವಲ ಮಹಿಳಾ ಮೀಸಲಾತಿ ಬೇಕೆಂದು ಕೇಳಿ ಪಡೆಯುವುದಷ್ಟೇ ಕೆಲಸವಾಗಬಾರದು. ಸಿಕ್ಕ ಅವಕಾಶವನ್ನು ಹೇಗೆ ಬಳಸಿಕೊಳ್ಳಬೇಕು, ಆ ಅವಧಿಯಲ್ಲಿ ಏನೆಲ್ಲವನ್ನು ಸಾಧಿಸಬಹುದು ಎನ್ನುವುದನ್ನು ಈ ದೇಶದಲ್ಲಿ ವಿವಿಧ ಕ್ಷೇತ್ರದಲ್ಲಿ ತೋರಿಸಿಕೊಟ್ಟ ದಿಟ್ಟ ಮಹಿಳಾ ನಾಯಕಿಯರಿದ್ದಾರೆ. ಅವರೆಲ್ಲರ ಮಾರ್ಗದಲ್ಲಿ ಜನಪ್ರತಿನಿಧಿಗಳಾದ ಮಹಿಳೆಯರು ಏಕೆ ಸಾಗಬಾರದು, ಹೆಸರುಗಳಿಸಬಾರದು? 



ಶಿವಮೊಗ್ಗ: ಜನಪ್ರತಿನಿಧಿಯಾಗುವುದು ಸುಲಭ. ಆದರೆ ಆ ಹುದ್ದೆಯ ಜವಾಬ್ದಾರಿಯನ್ನು ಸಮರ್ಥವಾಗಿ ನಿಭಾಯಿಸುವುದು ಕಷ್ಟ. ಏಕೆಂದರೆ ಅದಕ್ಕೆ ತಕ್ಕ ಸಾಮಾನ್ಯ ಜ್ಞಾನ ಜನಪ್ರತಿನಿಧಿಯಾದವರಲ್ಲಿರಬೇಕು. ಇಲ್ಲವಾದರೆ ಜನರು ಆಯ್ಕೆ ಮಾಡಿ ಕಳುಹಿಸಿದ್ದು ವ್ಯರ್ಥವಾಗುತ್ತದೆ. ಸೂಕ್ತ ತರಬೇತಿ ಇಲ್ಲವಾದರೆ ತಮಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಮಾಹಿತಿ, ಸಾಮಾನ್ಯ ಕಾನೂನು ಜ್ಞಾನ, ಜನರ ಸೇವೆ ಮಾಡುವ ಬಗೆ, ವ್ಯವಹರಿಸುವ ರೀತಿ, ಜನರೊಂದಿಗೆ ಒಡನಾಡುವ ಬಗ್ಗೆ ತಿಳಿದಿರುವುದಿಲ್ಲ. ಇದರಿಂದ ಸಭೆಯಲ್ಲಿ ವಿಷಯ ಗೊತ್ತಿಲ್ಲದೆ ಸುಮ್ಮನಿರಬೇಕಾಗುತ್ತದೆ, ಅಥವಾ ಅಸಂಬದ್ಧ ಮಾತನಾಡಿ ಅಪಹಾಸ್ಯಕ್ಕೀಡಾಗಬೇಕಾಗುತ್ತದೆ. ಇದರಿಂದ ಜನಸೇವೆಗೂ ತೊಂದರೆಯಾಗುತ್ತದೆ. ಇಂತಹ ಸಂದರ್ಭವನ್ನು ತಾಲೂಕು ಪಂಚಾಯತ್, ಜಿಲ್ಲಾ ಪಂಚಾಯತ್ ಮತ್ತು ನಗರಪಾಲಿಕೆಯಲ್ಲಿ ಕಾಣಬಹುದು.
ಈಗ ಮೀಸಲಾತಿ ಮುಖ್ಯವಾಗಿರುವ ಕಾರಣ ಶೇ. 50ರಷ್ಟು ಮಹಿಳೆಯರು ಆಯ್ಕೆಯಾಗಿ ಬರುತ್ತಿದ್ದಾರೆ. ಪುರುಷರೂ ಹೆಚ್ಚು ಕಡಿಮೆ ಸಮ ಸಂಖ್ಯೆಯಲ್ಲಿರುವುದರಿಂದ ಇಬ್ಬರಿಗೂ ಸಂಬಂಧಿತ ಇಲಾಖೆಯವರು ಸೂಕ್ತ ತರಬೇತಿ ನೀಡಬೇಕಿದೆ. ವಿಷಯದ ಅರಿವಿಲ್ಲದೆ ಮಾತನಾಡುವುದು ಈಗ ಕಂಡುಬರುತ್ತಿದೆ. ಕೆಲವು ಸದಸ್ಯರು ಸದಾ ಮೌನಿಯಾಗಿರುತ್ತಾರೆ. ಇನ್ನೂ ಕೆಲವರಿಗೆ ತಾವು ಯಾವ ಸಂದರ್ಭದಲ್ಲಿ ಹೇಗೆ ಮಾತನಾಡಬೇಕು, ವಿಷಯ ಮಂಡನೆ ಹೇಗಿರಬೇಕು,  ಪಾಲಿಕೆ, ಅಥವಾ ತಾಪಂ, ಜಿಪಂನ ಕಾನೂನುಗಳ ಬಗ್ಗೆ ಮಾಹಿತಿಯೂ ಇಲ್ಲ. ಇನ್ನೂ ಕೆಲವರಿಗೆ ಸಭೆಯ ಅಧ್ಯಕ್ಷರಿಗೆ ಗೌರವ ಕೊಡುವ ಬಗ್ಗೆ ಗೊತ್ತಿಲ್ಲ.  ಏರುಧ್ವನಿಯಲ್ಲಿ ಮಾತು ಆರಂಭಿಸುವುದು, ಇನ್ನೊಬ್ಬ ಸಸ್ಯರ ಮೇಲೆ ಏರಿಹೋಗುವುದು, ಮತ್ತೊಬ್ಬರು ಮಾತನಾಡುವಾಗಲೇ ತಾವೂ ಮಾತನಾಡುವುದು ಕಂಡುಬರುತ್ತಿದೆ.
ನಿನ್ನೆ ನಡೆದ ಪಾಲಿಕೆ ಸಬೆಯಲ್ಲಿ ಸದಸ್ಯೆಯೊಬ್ಬರು ಕಂದಾಯ ಇಲಾಖೆಯ 94 ಸಿಸಿ ಕಾಯ್ದೆ ಎಂದರೇನು, ಈ ಬಗ್ಗೆ  ಮಾಹಿತಿ ಕೊಡಿ ಎಂದು ಹೇಳಿದಾಗ ಸಭೆಯಲ್ಲಿದ್ದ ಬುತೇಕರು ನಕ್ಕರು. ಪಾಲಿಕೆ ಸದಸ್ಯೆಯಾಗಿ ಮೂರು ವರ್ಷ ಕಳೆದರೂ ಸಾಮಾನ್ಯ ಜ್ಞಾನವೂ ಇಲ್ಲದ ಬಗ್ಗೆ ಕೆಲವರು ಮಾತನಾಡಿಕೊಂಡರೆ, ಇನ್ನೂ ಕೆಲವರು ಇದರಂತಹ ತಮಾಷೆ ಇನ್ನೊಂದಿಲ್ಲ ಎಂದರು. ಇಲ್ಲಿ ಆ ಸದಸ್ಯೆ ಕೇಳಿದ್ದು ತಪ್ಪೇನಲ್ಲ. ತನಗೆ ಮಾಹಿತಿ ಇರದ ಬಗ್ಗೆ ಕೇಳಿದ್ದರು. ಆದರೆ ಎರಡು ವಾರದಿಂದ ಈ ಬಗ್ಗೆ ನಗರದಾದ್ಯಂತ ಚರ್ಚೆಯಾಗುತ್ತಿದೆ. ಆದ್ದರಿಂದ ಮಾಹಿತಿಯನ್ನು ಯಾರಿಂದಲಾದರೂ ಪಡೆಯಲು ಅವಕಾಶವಿತ್ತು. ಹಾಗೆ ಮಾಡದೆ ಚರ್ಚೆಯಾಗುವ ವೇಳೆ ಆ ಬಗ್ಗೆ ಕೇಳಿದ್ದು ಅಭಾಸವೆನಿಸಿತು. ಜನಪ್ರತಿನಿಧಿಯಾಗುವವರು ಎಷ್ಟೇ ವಿದ್ಯಾವಂತರಾದರೂ, ಶ್ರೀಮಂತರಾದರೂ ಸದಸ್ಯರಾದ ನಂತರ ತಮ್ಮ ವ್ಯಾಪ್ತಿಗೆ ಬರುವ ವಿಚಾರಗಳ ಬಗ್ಗೆ ಅಧ್ಯಯನ ನಡೆಸಬೇಕು, ಕೇಳಿ  ತಿಳಿಯಬೇಕು. ಸಭೆಗೆ ಬರುವಾಗ ಸಂಪೂರ್ಣ ಮಾಹಿತಿಯೊಂದಿಗೆ ಬರಬೇಕು. ಸದ್ಯ ಏನಾಗಿದೆ ಎಂದರೆ, ಸಭೆಗೆ ಬರುವುದು, ಒಂದಷ್ಟು ಕೂಗಾಡಿ ಹೋಗುವುದು, ಇಲ್ಲವಾದರೆ ಸುಮ್ಮನೆ ಕುಳಿತು ಹೋಗುವುದು ಸಾಮಾನ್ಯವಾಗಿದೆ. ಕೆಲವರಷ್ಟೇ ಚರ್ಚೆಯಲ್ಲಿ ಭಾಗವಹಿಸುತ್ತಾರೆ. ಉಳಿದವರು ಮೂಕಪ್ರೇಕ್ಷಕರು.
ಮಹಿಳಾ ಸದಸ್ಯರಾದವರು ತಮ್ಮ ಮನೆಯ ಕೆಲಸದ ಹೊರತಾಗಿ ಸಾರ್ವಜನಿಕ ಕ್ಷೇತ್ರಕ್ಕೆ ಕಾಲಿಟ್ಟಾಗ ವಿಷಯಗಳ ಬಗ್ಗೆ ಅರಿವು ಹೊಂದಬೇಕು. ಜನರ ಸಮಸ್ಯೆ , ಅವುಗಳನ್ನು ಬಗೆಹರಿಸುವ ಬಗ್ಗೆ ಅರಿತುಕೊಳ್ಳಬೇಕು. ಕೆಲವು ಸದಸ್ಯೆಯರ ಪರಿಸ್ಥಿತಿ ಹೇಗಿದೆ ಎಂದರೆ, ವಾರ್ಡುಗಳಲ್ಲಿ ಓಡಾಡಿ, ಜನ ಸಮಸ್ಯೆ ಕೇಳುವವರು, ಕಾಮಗಾರಿ ಮಾಡಿಸುವವರು  ಅವರ ಯಜಮಾನರಾಗಿರುತ್ತಾರೆ. ವಾರ್ಡುಗಳಲ್ಲಿ ತಮ್ಮ ಸದಸ್ಯೆಯನ್ನು ಚುನಾವಣೆ ವೇಳೆ  ಹೆಸರು ಮಾತ್ರ ನೋಡಿರುತ್ತಾರೆ. ಆಯ್ಕೆಯಾದ ನಂತರ ಅವರ ಮುಖವನ್ನು ಮತದಾರರು ನೋಡಿರುವುದಿಲ್ಲ. ನಾಮಕಾವಾಸ್ತೆ ಸದಸ್ಯೆಯಾಗಿರುತ್ತಾರೆ. ಪತಿ ಅನಧಿಕೃತ ಮತ್ತು ಪತ್ನಿ ಅಧಿಕೃತ ಸದಸ್ಯರಾಗಿರುತ್ತಾರೆ. ಇಂತಹ ಮಹಿಳಾ ಸದಸ್ಯೆಯರಿಗೆ ತಮ್ಮ ವಾರ್ಡಿನ ನೈಜ ಚಿತ್ರಣವೇ ಗೊತ್ತಿರುವುದಿಲ್ಲ.  ಪಾಲಿಕೆ ಅಥವಾ ತಮಗೆ ಸಂಬಂಧಿಸಿದ ಸಂಸ್ಥೆಯ ಕಾಯ್ದೆ- ಕಾನೂನುಗಳ ಅರಿವಿರುವುದಿಲ್ಲ. ಅದಕ್ಕಾಗಿ ವಾರಕ್ಕೊಮ್ಮೆಯಾದರೂ ವಾರ್ಡಿನಲ್ಲಿ ಸಂಚರಿಸಿ, ಮತದಾರರೊಡನೆ ಒಡನಾಟವಿಟ್ಟುಕೊಂಡು ಸಂಸ್ಥೆಗೆ ಹೋಗಿ ಅಧಿಕಾರಿಗಳೊಂದಿಗೆ ಚರ್ಚಿಸುವ ಪರಿಪಾಠವಿಟ್ಟುಕೊಳ್ಳಬೇಕಿದೆ.
ಇದಕ್ಕೂ ಮುನ್ನ ಸಂಬಂಧಿತ ಸ್ಥಳೀಯಾಡಳಿತ ಸಂಸ್ಥೆ ಅವರಿಗೆ ಸೂಕ್ತ ತರಬೇತಿಯನ್ನು ಕೊಡಿಸುವ ವ್ಯವಸ್ಥೆ ಮಾಡಬೇಕು. ಸದಸ್ಯರೇ ಆಗ್ರಹಿಸಿ ತರಬೇತಿ ಏರ್ಪಡಿಸುವಂತೆಯೂ ಮಾಡಬಹುದು. ಆಗ ಮಾತ್ರ ಅವರಿಗೆ ಸ್ವಲ್ಪವಾದರೂ ಮಾಹಿತಿ ದೊರೆತು ಅವರು ಸಭೆಯಲ್ಲಿ ಪಾಲ್ಗೊಂಡು ಮುಕ್ತವಾಗಿ ಚರ್ಚಿಸಲು ಅನುಕೂಲವಾಗುತ್ತದೆ. ಇಲ್ಲವಾದಲ್ಲಿ ಐದು ವರ್ಷ ಸದಸ್ಯೆಯಾದರೂ ಏನು ಕಡಿದು ಕಟ್ಟೆ ಹಾಕಿದರು ಎಂದು ಪ್ರಶ್ನಿಸಬೇಕಾಗುತ್ತದೆ.
ಸರಕಾರ ಮೀಸಲಾತಿಯನ್ನು ಮಹಿಳೆಗೆ ಕೊಟ್ಟಿದ್ದು, ಅವಳ ಗಂಡ ಆ ಸ್ಥಾನದಲ್ಲಿ ಅಧಿಕಾರ ಚಲಾಯಿಸಲಿ ಎಂದಲ್ಲ.  ಮಹಿಳಾ ಸಬಲೀಕರಣ ಇದಕ್ಕೆ ಮೂಲ ಕಾರಣ. ಮಹಿಳೆ ಅಡುಗೆ ಮನೆ ಬಿಟ್ಟು ಎಲ್ಲಾ ಕ್ಷೇತ್ರದಲ್ಲೂ ಮುಂದೆ ಬರಬೇಕು. ಸಮಾಜದ ಮುಖ್ಯವಾಹಿನಿಯಲ್ಲಿ ಅವಳೂ ಸೇರಬೇಕು. ಸಮಾಜದ ಅಭಿವೃದ್ಧಿಯಲ್ಲಿ ಅವಳ ಪಾತ್ರವೂ ಪುರುಷನಷ್ಟೇ ಇರಬೇಕು ಎನ್ನುವ ದೃಷ್ಟಿಯಿಂದ ಮಾತ್ರ. ಆದರೆ ಇಂದೇನಾಗಿದೆ. ಮಹಿಳೆ ಇದನ್ನು ಸದುಪಯೋಗ ಮಾಡಿಕೊಳ್ಳುತ್ತಿಲ್ಲ. ಇದನ್ನು ಮಹಿಳೆಯರೇ ಅರಿಯದಿದ್ದರೆ ಮೀಸಲಾತಿಯ ಲಾಭವಾದರೂ ಏನು?
ಹಾಲಿ ಶಿವಮೊಗ್ಗದ ಜಿಪಂ, ತಾಪಂ ಅಥವಾ ಪಾಲಿಕೆಯಲ್ಲಿ ಇಂತಹವರೇ ಜಾಸ್ತಿ ಸಂಖ್ಯೆಯಲ್ಲಿದ್ದಾರೆ.  ಸದಸ್ಯೆಯರ ಪತಿಯೇ ಎಲ್ಲೆಡೆ ಠಳಾಯಿಸುತ್ತಾರೆ. ಸಭೆಗೆ ಮಾತ್ರ ಮಹಿಳಾ ಸದಸ್ಯೆ ಹಾಜರಿರುತ್ತಾರೆ. ಅನುಭವದ ಮತ್ತು ಸೂಕ್ತ ಮಾರ್ಗದರ್ಶನದ ಕೊರತೆ ಇದಕ್ಕೆ ಕಾರಣವಾಗಿದ್ದರೂ, ಅವರಲ್ಲೂ ತಾವು ಅನುಭವ ಪಡೆಯಬೇಕೆಂಬ ಛಲ ಇರಬೇಕು. ಅದಕ್ಕಾಗಿ ಯತ್ನಿಸಬೇಕು. ತಾವೇ ಅಧಿಕಾರಿಗಳಿಗೆ ಒತ್ತಡ ಹೇರಿ ತರಬೇತಿ ಆಯೋಜಿಸುವಂತೆ ಸೂಚಿಸಬೇಕು. ಇಲ್ಲವಾದರೆ ಅವರನ್ನು ಆಯ್ಕೆ ಮಾಡಿ ಕಳುಹಿಸಿದವರ ಸಮಸ್ಯೆ ಬಗೆಹರಿಸುವುದಿಲ್ಲ. ಮೇಲಧಿಕಾರಿಗಳೊಂದಿಗೆ ವ್ಯವಹರಿಸುವುದು, ಯಾವ್ಯಾವ ಇಲಾಖೆಯಿಂದ ಎಷ್ಟು ಅನುದಾನ ಬರುತ್ತದೆ, ಕೆಲಸ ಮಾಡಿಸುವ ಬಗೆ ಎಲ್ಲವನ್ನೂ ಅರಿತಿರಬೇಕು.
...............................    

Wednesday, 22 June 2016

ಮಧು, ಕುಮಾರ್, ಹಾಲಪ್ಪ: ಗೆಲ್ಲುವವರಾರು?
 ಸೊರಬ ತಾಪಂ ಚುನಾವಣೆ






ಸೊರಬ ಅಂದರೆ ಬಂಗಾರಪ್ಪ ಕುಟುಂಬದ ರಾಜಕಾರಣ. ಅದನ್ನೇ ಅವರ ಮಕ್ಕಳಿಬ್ಬರೂ ಮುಂದುವರೆಸಿಕೊಂಡು ಬಂದಿದ್ದಾರೆ. ಇಬ್ಬರೂ ಅಧಿಕಾರ ಅನುಭವಿಸಿದ್ದಾರೆ. ಇನ್ನೂ ಪ್ರಭುತ್ವ ಸ್ಥಾಪನೆಗೆ ಕಾದಾಡುತ್ತಿದ್ದಾರೆ. ಇದಕ್ಕೆ ಈಗ ತಾಪಂ ಚುನಾವಣೆ ವೇದಿಕೆಯಾಗಿದೆ. ಪ್ರಚಾರಕ್ಕೆ ಉಳಿದಿರುವುದು ಕೇವಲ ನಾಲ್ಕೈದು ದಿನ ಮಾತ್ರ. ತುರುಸಿನ ಪೈಪೋಟಿ (ತ್ರಿಕೋನ, ಚತುಷ್ಕೋನ)ಯಂತೂ ಏರ್ಪಟ್ಟಿದೆ. ಪಕ್ಷೇತರರೂ ಸಹ ಕಣದಲ್ಲಿದ್ದಾರೆ. ಇವರೊಟ್ಟಿಗೆ ರೈತ ಸಂಘದವರೂ ಎರಡು ಕ್ಷೇತ್ರಗಳಲ್ಲಿ ಉಮೇದುವಾರರಾಗಿದ್ದಾರೆ. ಇವರೇನಾದರೂ ಮತ ಒಡೆದರೆ ಕೆಲವು ಸ್ಥಾನಗಳಲ್ಲಿ ಫಲಿತಾಂಶ ಏರುಪೇರಾಗಬಹುದು. ಅಷ್ಟೇನೂ ಮಹತ್ವದ ಚುನಾವಣೆ ಅಲ್ಲದಿದ್ದರೂ ತಾಪಂ ಅಧಿಕಾರದ ಗದ್ದುಗೆ ಪಡೆಯಲು ಮೂರೂ ಪಕ್ಷದವರು ಹೋರಾಟ ನಡೆಸಿರುವುದಂತೂ ಸತ್ಯ. ಅದರಲ್ಲೂ ಅಣ್ಣ-ತಮ್ಮ ತೊಡೆತಟ್ಟಿರುವುದು ಇಲ್ಲಿ ವಿಶೇಷ.


ಶಿವಮೊಗ್ಗ: ಒಂದೆಡೆ ಸಹೋದರರ ಸವಾಲು, ಇನ್ನೊಂದೆಡೆ ಸಹೋದರರಿಗೇ ಸವಾಲು ಹಾಕುತ್ತಿರುವವರು, ಮಗದೊಂದೆಡೆ ಈ ಮೂವರನ್ನೂ ಬದಿಗಿಟ್ಟು ಕಣಕ್ಕಿಳಿದಿರುವವರು.....ಇದು  ಸೊರಬ ತಾಲೂಕು ಪಂಚಾಯತ್ ಚುನಾವಣಾ ಪ್ರಚಾರದಲ್ಲಿ ಕಂಡುಬರುತ್ತಿರುವ ಪ್ರಮುಖ ಅಂಶಗಳು.
 ಮುಂದಿನವಾರ ಚುನಾವಣೆ ನಿಗದಿಯಾಗಿದೆ. 19 ಸ್ಥಾನಗಳಿಗೆ ನಡೆಯುವ ಈ ಚುನಾವಣೆಗೆ ಈಗಾಗಲೇ ಭರ್ಜರಿ ಪ್ರಚಾರವನ್ನು ಕಾಂಗ್ರೆಸ್, ಬಿಜೆಪಿ ಮತ್ತು ಜೆಡಿಎಸ್ ಆರಂಭಿಸಿವೆ. ತಾ
ಲೂಕಿನಲ್ಲಿ ಈ ಬಾರಿ ಚುನಾವಣಾ ರಂಗದ ಕಾವು ತಾರಕಕ್ಕೇರಿದೆ. ಕ್ಷೇತ್ರದ ಜೆಡಿಎಸ್ ಶಾಸಕ ಎಸ್. ಮಧು ಬಂಗಾರಪ್ಪ, ಮಾಜಿ ಸಚಿವರಾದ ಹರತಾಳು ಹಾಲಪ್ಪ, ಕುಮಾರ್ ಬಂಗಾರಪ್ಪ ತಮ್ಮ ರಾಜಕೀಯ ಅಸ್ತಿತ್ವಕ್ಕಾಗಿ ಹೋರಾಟ ಆರಂಭಿಸಿದ್ದಾರೆ. ಬಹುತೇಕ ಕ್ಷೇತ್ರಗಳನ್ನು ತಮ್ಮದನ್ನಾಗಿ ಮಾಡಿಕೊಳ್ಳಬೇಕೆಂದು ಪಣತೊಟ್ಟಂತೆ ಕಂಡುಬರುತ್ತಿದೆ.
  ಶಾಸಕನಾಗಿರುವುದರಿಂದ  ಮಧು ಬಂಗಾರಪ್ಪ ಮತ್ತು ರಾಜ್ಯದಲ್ಲಿ ಕಾಂಗ್ರೆಸ್ ನೇತೃತ್ವದ ಸರ್ಕಾರ ಇರುವುದರಿಂದ ಅವರ ಸಹೋದರ ಮತ್ತು ಮಾಜಿ ಸಚಿವ ಕುಮಾರ್ ಬಂಗಾರಪ್ಪ ಇಬ್ಬರೂ ತೆರೆಮರೆಯ ರಾಜಕಾರಣ ನಡೆಸುತ್ತಾ ಅಧಿಕಾರಿ ವರ್ಗವನ್ನು ತಮ್ಮ ಹಿಡಿತಕ್ಕೆ ತಗೆದುಕೊಂಡಿದ್ದಾರೆ ಎನ್ನುವ ಮಾತು ಕೇಳಿಬರುತ್ತಿವೆ. ಈಗ ಚುನಾವಣಾ ಪ್ರಚಾರದ ಅಬ್ಬರದಲ್ಲಿ ಪರಸ್ಪರರ ಕಾಲೆಳೆಯುವ ಕೆಲಸ  ಆರಂಭವಾಗಿದೆ.
ಅಶ್ವಮೇಧ ಯಾಗದ ಕುದುರೆಯ ಕಾಲು ಮುರಿದಿದೆ ಎನ್ನುವ ಮೂಲಕ ಕುಮಾರ್ ರಾಜಕೀಯ ಕುಂಠಿತಗೊಂಡಿದೆ ಎಂದು ಶಾಸಕ ಮಧು ಟೀಕಿಸಿದ್ದಾಗಿದೆ. ಅದಕ್ಕೆ ತಿರುಗೇಟು ನೀಡಿರುವ ಕುಮಾರ್, ದೇವಿ ಇನ್ನೂ ಡಬ್ಬದಿಂದ ಹೊರಬಾರದೆ ದೆವ್ವವಾಗಿ ಕುಳಿತಿದೆ  ಎಂದಿದ್ದಾರೆ. ಅಶ್ವಮೇಧ ಕುಮಾರ್‌ಗೆ ತಿರುವು ಕೊಟ್ಟ ಸಿನಿಮಾವಾದರೆ, ದೇವಿ ಮಧು ಅವರ ಸಿನಿಮಾವಾಗಿದೆ. ಇನ್ನೊಂದೆಡೆ ಅದೇ ರಾಗ ಅದೇ ಹಾಡು ಎನ್ನುವಂತೆ ಮಧು, ಈ ಹಿಂದಿನಂತೆಯೇ ತಂದೆ ಬಂಗಾರಪ್ಪ ಅವರ ಹೆಸರು ಹೇಳಿಕೊಂಡು ಮತಯಾಚನೆ ಆರಂಭಿಸಿದ್ದಾರೆ. ಕುಟುಂಬದ ಜಗಳವನ್ನು ಮತ್ತೆ ಅಣ್ಣ-ತಮ್ಮ ಬೀದಿಗೆ ತಂದಿದ್ದಾರೆ. ಮಧು ಜೊತೆ ಯಾವ ಜೆಡಿಎಸ್ ನಾಯಕರೂ (ನಾಲ್ವರು ಜಿಪಂ ಸದಸ್ಯರನ್ನು ಹೊರತುಪಡಿಸಿ) ಪ್ರಚಾರಕ್ಕೆ   ಕಣಕ್ಕಿಳಿದಿಲ್ಲ. ಜಿಲ್ಲಾ ಮಟ್ಟದಲ್ಲಿ ಆ ಪಕ್ಷದ  ಅಡ್ರೆಸ್ಸೇ ಇಲ್ಲದಿರುವುದರಿಂದ ಅವರೂ ಸಹ ಬರುವುದು ಸಂಶಯವಾಗಿದೆ. ಸೊರಬ ಜೆಡಿಎಸ್‌ನಲ್ಲಿ ಮಧು ಅವರೇ ಹೈಕಮಾಂಡ್. ಜೊತೆಗೆ, ಈ ಬಾರಿ ಜಿಪಂನಲ್ಲಿ 5ರಲ್ಲಿ ನಾಲ್ಕು ಸ್ಥಾನ ಪಡೆದಿರುವುದರಿಂದ ಹೆಚ್ಚಿನ ಉತ್ಸಾಹವೂ ಅವರಲ್ಲಿದೆ. ತಾನು ಮಾಡಿದ ಕೆಲಸಕ್ಕಿಂತ ಅಪ್ಪನ ಹೆಸರನ್ನೇ ಹೋದಲ್ಲೆಲ್ಲ ಜಪಿಸುತ್ತ, ಅಣ್ಣನನ್ನು  ಟೀಕಿಸುತ್ತ ಪ್ರಚಾರ ಮಾಡುತ್ತಿರುವುದು ಕಂಡುಬರುತ್ತಿದೆ. ಗೆಲ್ಲುವವರು ತಮ್ಮವರೇ ಎಂಬ ಅಪರಿಮಿತ ವಿಶ್ವಾಸ ಅವರಲ್ಲಿದೆ.
ಕಾಂಗ್ರೆಸ್ ಪರ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ತಿ. ನಾ. ಶ್ರೀನಿವಾಸ್, ಕಾಡಾ ಅಧ್ಯಕ್ಷ ನಗರದ ಮಹದೇವಪ್ಪ ಸೇರಿದಂತೆ ಜಿಲ್ಲಾ ಸಮಿತಿ ನೇಮಿಸಿರುವ ವೀಕ್ಷಕರ ಸಮಿತಿ ಪ್ರಚಾರದಲ್ಲಿ ಧುಮುಕಿದೆ. ಹೇಗಾದರೂ ಮಾಡಿ ಮಧುಗೆ ಪಾಠ ಕಲಿಸಲೇಬೇಕೆಂದು ಕಾಂಗ್ರೆಸ್ ಹಠ ತೊಟ್ಟಿದೆ. ಕುಮಾರ್ ಅವರ ವರ್ಚಸ್ಸು ತೀರಾ ಇಲ್ಲದಿದ್ದರೂ ಹೆಚ್ಚಿನ ಸ್ಥಾನ ಗಳಿಸಲೇಬೇಕು, ತಮ್ಮನಿಗೆ ಎದುರೇಟು ಕೊಡಲೇಬೆಕು. ಈ ಮೂಲಕ ಮತ್ತೆ ಪಕ್ಷದ ಸಂಘಟನೆ ಬೆಳೆಸಲೇಬೇಕೆಂದು ಪಣ ತೊಟ್ಟಂತಿದೆ.
ಇವರಿಬ್ಬರ ಮಧ್ಯೆ ಬಿಜೆಪಿ  ನಾಯಕರೂ ಮುನ್ನುಗ್ಗುತ್ತಿದ್ದಾರೆ. ಮಾಜಿ ಸಚಿವ ಹಾಲಪ್ಪ ತಾನು ಮತ್ತು ಯಡಿಯೂರಪ್ಪ ಮಾಡಿದ ಕೆಲಸವನ್ನೆ ಜಪಿಸುತ್ತಿದ್ದಾರೆ. ಜಿಲ್ಲಾಧ್ಯಕ್ಷ ರುದ್ರೇಗೌಡ, ಮಾಜಿ ಅಧ್ಯಕ್ಷ ದತ್ತಾತ್ರಿ ಮೊದಲಾದವರು ಒಂದು ಸುತ್ತು ಹೋಗಿಬಂದಿದ್ದಾರೆ. ಇಲ್ಲಿ ಈಡಿಗರು, ಲಿಂಗಾಯಿತರು, ಬ್ರಾಹ್ಮಣರು, ಲಂಬಾಣಿ, ಮತ್ತು ಎಸ್‌ಸಿ, ಎಸ್ಟಿ ಮತದಾರರೇ ಹೆಚ್ಚಿದ್ದಾರೆ. ಜಾತಿಯೂ ಕೆಲವು ಸ್ಥಾನಗಳಲ್ಲಿ ಕೆಲಸ ಮಾಡುವ ಸಂಭವವಿರುವುದರಿಂದ ಅದರ ಲಾಭಕ್ಕೆ ಎಲ್ಲರೂ ಸನ್ನದ್ಧರಾಗಿದ್ದಾರೆ. ಸದ್ಯ ಜೆಡಿಎಸ್ ಶಾಸಕರನ್ನು, ಜಿಪಂನ ನಾಲ್ವರು ಸದಸ್ಯರನ್ನು ಹೊಂದಿರುವುದರಿಂದ ಆ ಪಕ್ಷಕ್ಕೇ ಬಹುಮತ ಬಂದರೂ ಆಶ್ಚರ್ಯವೇನಿಲ್ಲ.    
.................................

Monday, 20 June 2016

ಕಾಗೋಡು ಮತ್ತೆ ಸಚಿವ: ನಿರೀಕ್ಷೆ ಅಪಾರ



ಕಾಗೋಡು ತಿಮ್ಮಪ್ಪ ಮತ್ತೆ ಸಚಿವರಾಗಿದ್ದಾರೆ. ನೇರ, ನಿಷ್ಠುರ ಮತ್ತು ನಿಷ್ಕಳಂಕರೆನಿಸಿಕೊಂಡವರು.  5 ಬಾರಿ ಶಾಸಕರಾಗಿ, ಒಮ್ಮೆ ಎಂಎಲ್‌ಸಿಯಾಗಿ,  4 ಬಾರಿ ಸಚಿವರಾದ ಹೆಗ್ಗಳಿಕೆ ಇವರದ್ದು, ಜೊತೆಗೆ ವಿಧಾನಸಭಾಧ್ಯಕ್ಷ ಸ್ಥಾನ ಅಲಂಕರಿಸಿದ  ಜಿಲ್ಲೆಯ ಏಕೈಕ ರಾಜಕಾರಣಿ. 82ರ ಹರಯದ ಕಾಗೋಡು ಸಚಿವರಾಗಿದ್ದರಿಂದ ಬಗರ್‌ಹುಕುಂ ಸಾಗುವಳಿದಾರರಲ್ಲಿ ಮತ್ತು ಶರಾವತಿ ಮುಳುಗಡೆ ಸಂತ್ರಸ್ಥರಲ್ಲಿ ಹೊಸ ಆಶಾಕಿರಣ ಮೂಡಿದೆ. ಸಮಸ್ಯೆಗಳ ಕೂಪದಲ್ಲಿ ಮುಳುಗಿರುವ ಮುಳುಗಡೆ ಸಂತ್ರಸ್ಥರು ಇನ್ನಾದರೂ ಬೆಳಕಿಗೆ ಬರಬಹುದೆಂಬ ಆಶಾವಾದ ಹೊಂದುವಂತಾಗಿದೆ.  


 ರಾಜ್ಯ ಸಚಿವ ಸಂಪುಟದ ವಿಸ್ತರಣೆಯ ಮೂಲಕ ಜಿಲ್ಲೆಯಲ್ಲೂ ಮಂತ್ರಿಸ್ಥಾನ ಬದಲಾಗಿದೆ. ಈವರೆಗೆ ಸಚಿವರಾಗಿದ್ದ ಕಿಮ್ಮನೆ ರತ್ನಾಕರ್ ಬದಲಿಗೆ ಕಾಗೋಡು ತಿಮ್ಮಪ್ಪ ಅವರಿಗೆ ಸ್ಥಾನ ಕೊಡಲಾಗಿದೆ.  ಒಬ್ಬರನ್ನು ಬಿಟ್ಟು ಮತ್ತೊಬ್ಬರಿಗೆ ಅವಕಾಶ ಕೊಟ್ಟಂತಾಗಿದೆ. ಹಾಗೆ ನೋಡಿದರೆ ಒಂದು ಸ್ಥಾನ ಕೈತಪ್ಪಿದಂತಾಗಿದೆ. ಕಾಗೋಡು ವಿಧಾನಸಭಾಧ್ಯಕ್ಷ ಸ್ಥಾನದಿಂದ ಸಚಿವರಾದರೆ, ಕಿಮ್ಮನೆ ಮಂತ್ರಿಸ್ಥಾನದಿಂದ ಮತ್ತೆ ಶಾಸಕರಾಗಿ ಉಳಿಯುವಂತಾಗಿದೆ.
ಕಿಮ್ಮನೆ ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಸಚಿವರಾಗಿದ್ದರು. ತಾನು ಸಚಿವನಾಗಿದ್ದೇ ಆಕಸ್ಮಿಕ, ಮಂತ್ರಿಗಿರಿಗೆ ಯಾವ ಲಾಬಿಯನ್ನೂ ಮಾಡಿರಲಿಲ್ಲ, ಸಿಕ್ಕ ಅವಕಾಶವನ್ನು ಜನತೆಯ ಸೇವೆಗೆ ಬಳಸಿದ್ದೇನೆ. ಇನ್ನೂ ಸಹ ಜನಸೇವಕನಾಗಿಯೇ ಇರುತ್ತೇನೆ. ಗೂಟದ ಕಾರಿನಲ್ಲಿ ಮಾತ್ರ ಅಧಿಕಾರವಿದೆ ಎಂದು ನಂಬಿದವ ತಾನಲ್ಲ ಎಂದಿದ್ದಾರೆ. ಮಂತ್ರಿಮಂಡಲದಲ್ಲಿ ಪ್ರಾಮಾಣಿಕ ಮತ್ತು ನಿಷ್ಕಳಂಕ ಸಚಿವರೆಂದೇ ಹೆಸರಾಗಿದ್ದ ಕಿಮ್ಮನೆಯವರನ್ನು ಕೈಬಿಟ್ಟಿದ್ದು ಜಿಲ್ಲೆಯ ಹಲವರಲ್ಲಿ ಬೇಸರ ಮೂಡಿಸಿದೆ. ಅವರು ಯಾವತ್ತೂ ಅಧಿಕಾರಿಗಳನ್ನು ಹೆದರಿಸಿ, ಬೆದರಿಸಿ ಸಚಿವ ಸ್ಥಾನದ ದರ್ಪ ತೋರಿಸಿದವರಲ್ಲ. ಕೆಲವೊಮ್ಮೆ ಖಡಕ್ ಆಗಿ ಮಾತನಾಡಿದ್ದಾರೆ. ಅದು ಆ ಸಂದರ್ಭದಲ್ಲಿ ಅನಿವಾರ್ಯವೂ ಆಗಿತ್ತು.
ಈಗ ಕಾಗೋಡು ಸಚಿವರಾಗಿದ್ದಾರೆ. ಜಿಲ್ಲೆಯಲ್ಲಿ ಬಗರ್‌ಹುಕುಂ ಸಾಗುವಳಿದಾರರಿಗೆ ಸಾಗುವಳಿ ಚೀಟಿ ಕೊಡಿಸುವುದು, ಶರಾವತಿ ಸಂತ್ರಸ್ಥರ ಸಮಸ್ಯೆ ಹಾಗೆಯೇ ಕೊಳೆಯುತ್ತಿರುವುದರ ಬಗ್ಗೆ ಅವರು ಹೋರಾಟ ನಡೆಸಿಕೊಂಡೇ ಬಂದಿದ್ದಾರೆ. ಇದಕ್ಕೆ ಈಗ ಒಂದು ತಾರ್ಕಿಕ ಅಂತ್ಯ ಸಿಗುವ ನಿರೀಕ್ಷೆ ಹೊಂದಲಾಗಿದೆ. ವಿಧಾನಸಭೆಯ ಅಧ್ಯಕ್ಷರಾಗಿದ್ದುಕೊಂಡೇ ಸರಕಾರವನ್ನು ತರಾಟೆಗೆ ತೆಗದುಕೊಳ್ಳುತ್ತಿದ್ದ ಕಾಗೋಡು, ಸಚಿವರಾಗಿ ಯಾವ ರೀತಿ ಹೆಜ್ಜೆ ಇಡುತ್ತಾರೆ ಎನ್ನುವುದು ಮಹತ್ವದ್ದಾಗಿದೆ. ಆದರೆ,  ಸದಾ ಖಡಕ್ ಮನುಷ್ಯ ಎಂದೇ ಖ್ಯಾತಿ ಪಡೆದವರು. 84ರ ಹರಯದ ಕಾಗೋಡು ಸಿದ್ದರಾಮಯ್ಯ ಸರ್ಕಾರದಲ್ಲಿ ಈ ಹಿಂದೆಯೇ ಸಚಿವರಾಗಬೇಕಿತ್ತು. ಆದರೆ ಆಗಿನ ಕೆಲವು ಬೆಳವಣಿಗೆಗಳು ಅನಿವಾರ್ಯವಾಗಿ ವಿಧಾನಸಭಾಧ್ಯಕ್ಷ ಸ್ಥಾನಕ್ಕೆ ಅವರನ್ನು ತಂದು ಕೂಡ್ರಿಸಿದ್ದವು.
ಸದ್ಯದ ಪರಿಸ್ಥಿತಿಯಲ್ಲಿ ಕಾಗೋಡು ಅವರಿಂದ ಜಿಲ್ಲೆಗೆ ನಿರೀಕ್ಷೆಗಳನ್ನು ಇಟ್ಟುಕೊಳ್ಳಲಾಗಿದೆ. ಅನುಭವಿ ಸಚಿವರಾಗಿರುವುದರಿಂದ, ಕ್ಯಾಬಿನೆಟ್ ಹುದ್ದೆಯಲ್ಲಿರುವುದರಿಂದ, ಸಿಎಂ ಅವರನ ಮನವೊಲಿಸುವ ತಾಕತ್ತಿರುವುದರಿಂದ ಹಾಗೂ ಮುಲಾಜಿಲ್ಲದೆ ಅಧಿಕಾರಿಗಳಿಗೆ ಚಾಟಿ ಬೀಸುವ ಪ್ರವೃತ್ತಿಯವರಾಗಿರುವುದರಿಂದ ನೆನೆಗುದಿಗೆ ಬಿದ್ದಿರುವ ಅನೇಕ ಯೋಜನೆಗಳಿಗೆ ಮತ್ತೆ ಹಣ ತರುವ ನಿರೀಕ್ಷೆ ಹೊಂದಲಾಗಿದೆ.
ಚಳವಳಿಯ ಮೂಲಕವೇ ರಾಜಕಿಯಕ್ಕೆ ಕಾಲಿಟ್ಟಿರುವ ಕಾಗೋಡು, ಯಾವುದೇ ವಿಚಾರವನ್ನು ಬಗೆಹರಿಸದೆ ಹಾಗೆಯೇ ಬಿಡುವವರಲ್ಲ. ಹೋರಾಟವೇ ಅವರ ಹುಟ್ಟುಗುಣ. ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳನ್ನು ಜಾಗೃತಿಗೊಳಿಸುವ ಮೂಲಕ ಜಿಲ್ಲೆಯಲ್ಲಿ ಒಂದಷ್ಟು ಕೆಲಸ ಆಗುವಂತೆ ಮಾಡಬಲ್ಲ ಶಕ್ತಿ ಹೊಂದಿದ್ದಾರೆ. ಜೊತೆಗೆ ಜಿಲ್ಲಾ ಕಾಂಗ್ರೆಸ್‌ನಲ್ಲೂ ಇನ್ನಷ್ಟು ಕ್ರಿಯಾಶೀಲತೆಯನ್ನು ತರಬಲ್ಲರು. ಪಕ್ಷವನ್ನು ಸಂಘಟಿಸುವ ಶಕ್ತಿ ಮತ್ತು ಕಾರ್ಯಕರ್ತರ ನೇರ ಸಂಪರ್ಕ ಹೊಂದಿರುವುದು ಅವರ ಪ್ಲಸ್ ಪಾಯಿಂಟ್.  ಜನಸಾಮಾನ್ಯರನ್ನೂ ಸಹ ಸೌಜನ್ಯದಿಂದ ಕಂಡು ಮಾತನಾಡುವ ವಿಶೇಷ ಗುಣ ಅವರಲ್ಲಿದೆ. ಇವೆಲ್ಲವೂ ಸಹ ಕಾಗೋಡು ಮತ್ತೆ ಸಚಿವರಾಗುವಂತೆ ಮಾಡಿದೆ. ಈ ಮೂಲಕ ಜಿಲ್ಲೆಯಲ್ಲಿ ಒಂದಷ್ಟು ಬದಲಾವಣೆ, ಜನೋಪಯೋಗಿ, ವಿಶೇಷವಾಗಿ ಅರಣ್ಯ ಜಮೀನು ಒತ್ತುವರಿ ವಿಚಾರ ಬಗೆಹರಿಸುವ ಆಶಾವಾದವನ್ನು ಮತದಾರಾರರು, ಬಗರ್‌ಹುಕುಂ ಸಾಗುವಳಿದಾರರು ಹೊಂದಿದ್ದಾರೆ. 

Saturday, 18 June 2016

ಶರವೇಗದಿ ಏರುತ್ತಿದೆ ಕಾಳುಬೇಳೆಗಳ ದರ
* ಗ್ರಾಹಕರು ಕಂಗಾಲು* ದರ ಇಳಿಸಲು ಸರಕಾರಗಳ ಕಸರತ್ತು


ಕಾಳುಬೇಳೆಗಳ ದರ ರಾಕೆಟ್‌ನಂತೆ ಏರಿಕೆಯಾಗುತ್ತಿದೆ. ದೈನಂದಿನ ಆಹಾರ, ತಿಂಡಿ, ಪದಾರ್ಥಗಳ ತಯಾರಿಕೆಗೆ ಬೇಳೆ ಬೇಕೇ ಬೇಕು. ಇಂತಹ ಸಂದರ್ಭದಲ್ಲಿ ಬೆಲೆ ಏರಿಕೆಯಾದರೆ ಅವನ ಪರಿಸ್ಥಿತಿ ಶೋಚನೀಯವಾಗುತ್ತದೆ. ಈಗ ಮಾರುಕಟ್ಟೆಗೆ ಖರೀದಿಗೆ ಹೋದರೆ ಯಾವುದನ್ನು, ಎಷ್ಟು ಪ್ರಮಾಣದಲ್ಲಿ  ಖರೀದಿಸಬೇಕು ಎಂದು ಯೋಚಿಸುವಂತಾಗಿದೆ. ಏಕೆಂದರೆ ಬೇಳೆಗಳ ದರ 200ರ ಗಡಿಯಲ್ಲಿದೆ. 
ಪ್ರತಿ ಮನೆಯಲ್ಲಿ ಇದರದ್ದೇ ಚರ್ಚೆ. ಕೇವಲ ತರಕಾರಿ ದರ ಏರಿಕೆಯಾಗುತ್ತ, ಇಳಿಕೆಯಾಗುವುದನ್ನು ಜನಸಾಮಾನ್ಯರು ಈವರೆಗೆ ಅನುಭವಿಸಿದ್ದರು. ಆದರೆ ಕಲೆದೊಂದು ವರ್ಷದಿಂದ ಬೇಳೆಕಾಳುಗಳ ದರ ಗಗನಮುಖಿಯಾಗುತ್ತಿದೆ. ಜನಸಾಮಾನ್ಯರ ಅದರಲ್ಲೂ ಮಧ್ಯಮ ಮತ್ತು ಬಡವರ್ಗದವರು ತತ್ತರಿಸಿ ಹೋಗಿದ್ದಾರೆ. ಕೆಜಿಗಟ್ಟಲೆ ತರುತ್ತಿದ್ದವರು ಈಗ ಗ್ರಾಮ್ ಲೆೆಕ್ಕದಲ್ಲಿ ಖರೀದಿಸುವ ಪರಿಸ್ಥಿತಿ ಎದುರಾಗಿದೆ. ಏಕೆಂದರೆ ಬೇಳೆಗಳಿಲ್ಲದೆ ಸಾರು, ತಿಂಡಿ ಮಾಡುವಂತಿಲ್ಲ.
 ಇಡೀ ದೇಶದಲ್ಲೇ ಈಗ ದರ ಏರಿಕೆ ಬಗ್ಗೆ ಚಿಂತನೆ ನಡೆಯುತ್ತಿದೆ. ಒಂದೆಡೆ ಕೆಟ್ಟ ಹವಾಮಾನ ಅಥವಾ ಕೈಕೊಟ್ಟ ಮುಂಗಾರು ಎಂದು ಕೆಲವರು ಹೇಳುತ್ತಿದ್ದಾರೆ. ಜೊತೆಗೆ ದೇಶದ ಬೆನ್ನೆಲುಬಾಗಿರುವ ಕೃಷಿ ಇಳಿಮುಖವಾಗುತ್ತಿರುವುದು, ರೈತನಿಗೆ ಅತಿಯಾದ ಖರ್ಚು, ಮಾರುಕಟ್ಟೆ ಕೊರತೆ, ನ್ಯಾಯಯುತ, ಸಮರ್ಪಕ ಬೆಲೆ ಸಿಗದಿರುವುದು, ಕೂಲಿ ಮತ್ತು ರೋಗದ ಸಮಸ್ಯೆಗಳಿಂದ ಕಂಗಾಲಾಗಿ  ಕೃಷಿಯೇ ಬೇಡ ಎನ್ನುವ ಹಂತ ತಲುಪಿದ್ದಾನೆ. ಇದರಿಂದ ಉತ್ಪಾದನೆ ಕುಂಠಿತವಾಗಿದೆ. ಆದರೆ ಇದರ ಹೊರತಾಗಿಯೂ ಕೆಲವು ಕಾರಣಗಳಿವೆ. ಅವೆಂದರೆ,  ಜಾಗತಿಕ ಹಣದುಬ್ಬರ, ಹೆಚ್ಚುತ್ತಿರುವ ಬೇಡಿಕೆ, ಕೃಷಿ ಇಳಿಮುಖ, ದ್ವಿದಳ ಧಾನ್ಯಗಳ ಬೆಳೆ ಕಡಿಮೆಯಾಗಿರುವುದು,  ಅಸಮರ್ಪಕ ನಿರ್ವಹಣೆ ಮತ್ತು ವಿತರಣೆ, ದಲ್ಲಾಳಿಗಳಿಂದ ಅನಧಿಕೃತ ದಾಸ್ತಾನು, ಸಾರಿಗೆ ದರ, ಪೆಟೊ್ರೀೀಲಿಯಂ ಉತ್ಪನ್ನಗಳ ಬೆಲೆ ಏರಿಕೆ ಮೊದಲಾದವು ಕಾರಣವಾಗಿವೆ.
ಸದ್ಯ ಮಾರುಕಟ್ಟೆಯಲ್ಲಿ ಉದ್ದಿನಬೇಳೆ 196 ರೂ, ತೊಗರಿ 166 ರೂ, ಹೆಸರು 120 ರೂ.ನಲ್ಲಿ ಮಾರಾಟವಾಗುತ್ತಿದೆ. ಕೇಂದ್ರ ಸರಕಾರ ಬೆಲೆ ಇಳಿಕೆಯಾಗಿ ಎಲ್ಲ ದ್ವಿದಳ ಧಾನ್ಯಗಳು 120 ರೂ.ನಲ್ಲಿ ಲಭ್ಯವಾಗುವಂತೆ ಮಾಡಬೇಕೆಂದು ರಾಜ್ಯ ಸರಕಾರಗಳಿಗೆ ಸೂಚಿಸಿದೆ. ಜೊತೆಗೆ ಕಾಪು ದಾಸ್ತಾನು ಮಾಡುವವರ ವಿರುದ್ಧ ದಾಳಿ ನಡೆಸಿ ವಶಪಡಿಸಿಕೊಳ್ಳಲು ಸೂಚಿಸಿದೆ. ಇದರ ಫಲವಾಗಿ ಮೂರು ತಿಂಗಳ ಹಿಂದೆ ಕರ್ನಾಟಕದಲ್ಲಿ  (ಉತ್ತರ ಕರ್ನಾಟಕದ ಜಿಲ್ಲೆಗಳಲ್ಲಿ) ಅತ್ಯಧಿಕ ಪ್ರಮಾಣದಲ್ಲಿ ಕಾಪು ದಾಸ್ತಾನು ಪತ್ತೆ ಮಾಡಲಾಗಿದೆ. ತೊಗರಿಯ ಕಣಜ ಎಂದೇ ಕರೆಯಲ್ಪಡುವ ಈ ಜಿಲ್ಲೆಗಳಲ್ಲಿ ಈ ವರ್ಷ ಇಳುವರಿ ಕಡಿಮೆಯಾಗಿದೆ. ಜೊತೆಗೆ ಬೆಳೆಯುವ ಪ್ರಮಾಣವೂ ಸಾಕಷ್ಟು ಕುಂಠಿತಗೊಂಡಿದೆ.
ಇವುಗಳನ್ನು ವಿಶ್ಲೇಷಿಸಿದರೆ, ಇತ್ತೀಚೆಗೆ ರೈತರು ಅಸಮರ್ಪಕ ಮಾರುಕಟ್ಟೆ ಮತ್ತು ನ್ಯಾಯಯುತ ಬೆಲೆ ಸಿಗದ ಕಾರಣ ಕೃಷಿಯಿಂದ ಬಹುತೇಕ ವಿಮುಖರಾಗಿದ್ದಾರೆ. ಆಧುನಿಕ ತಂತ್ರಜ್ಞಾನ ಕೃಷಿಯಲ್ಲಿ ಅಳವಡಿಕೆಯಾಗುತ್ತಿರುವುದರಿಂದ ಹೆಚ್ಚು ಪ್ರಮಾಣದಲ್ಲಿ ದ್ವಿದಳ ಧಾನ್ಯ ಬೆಳೆಯುವ ಕ್ರಾಂತಿಯನ್ನು ಮಾಡಬೇಕಿದೆ. ಈ ವರ್ಷವನ್ನು ಅಂತಾರಾಷ್ಟ್ರೀಯ ದ್ವಿದಳ ಧಾನ್ಯಗಳ ವರ್ಷವೆಂದು ಆಚರಿಸಲಾಗುತ್ತಿದೆ. ರೈತರಲ್ಲಿ ಈ ಬಗ್ಗೆ ಆಸಕ್ತಿ ಹುಟ್ಟಿಸಿ ಹೆಚ್ಚು ಇಳುವರಿಯ ಬೀಜ ನೀಡಿ, ಸೌಲಭ್ಯಗಳನ್ನು ಒದಗಿಸಬೇಕಿದೆ.
ದೇಶದ ಬಹುತೇಕ ರಾಜ್ಯಗಳಲ್ಲಿ ಬರಗಾಲ ಈ ವರ್ಷ ಎದುರಾಗಿದೆ. ಮಳೆಯಾಶ್ರಿತ ಪ್ರದೇಶಗಳಲ್ಲೂ ಇದರ ಪರಿಣಾಮವಾಗಿ ಳೆೆ ಸಿಗಲೇ ಇಲ್ಲ. ಸಕಾಲದಲ್ಲಿ ಮಳೆಯಾಗದೆ ಬೆಳೆಗಳೆಲ್ಲ ಒಣಗಿಹೋದವು.  ಕಡಿಮೆ ಅವಧಿಯಲ್ಲಿ ಹೆಚ್ಚು ಇಳುವರಿ ನೀಡುವ ತಳಿಯ ಸಂಶೋಧನೆಯಾಗಬೇಕು. ಭಾರತ ದ್ವಿದಳ ಧಾನ್ಯಗಳನ್ನು ಅತ್ಯಧಿಕ ಪ್ರಮಾಣದಲ್ಲಿ (ಶೇ. 39ರಷ್ಟು)ಬೆಳೆಯುವ ದೇಶವಾದರೂ ಪ್ರತಿವರ್ಷ ಸುಮಾರು 3.5 ಮಿಲಿಯನ್ ಟನ್‌ನಷ್ಟು ಆಮದು ಮಾಡಿಕೊಳ್ಳುತ್ತಿದೆ. ಇದರಲ್ಲಿ ತಾಂಜಾನಿಯಾದಿಂದ ತೊಗರಿಬೇಳೆಯನ್ನು, ಟರ್ಕಿಯಿಂದ ಉದ್ದಿನಬೇಳೆಯನ್ನು ಮತ್ತು ಮ್ಯಾನ್ಮಾರ್‌ನಿಂದ ವಿವಿಧ ಧಾನ್ಯಗಳನ್ನು ತರಿಸಿಕೊಳ್ಳುತ್ತಿದೆ. ದೇಶಕ್ಕೆ ವರ್ಷಕ್ಕೆ ಸುಮಾರು 22 ಮಿಲಿಯನ್ ಟನ್‌ನಷ್ಟು ದ್ವಿದಳ ಧಾನ್ಯ ಬೇಕಾಗಿದೆ.
ದೇಶದಲ್ಲಿ ಕನಿಷ್ಟ ಬೆಂಬಲ ಬೆಲೆ ಸಂಪೂರ್ಣ ವಿಫಲವಾಗಿದೆ. ಏಕೆಂದರೆ ಸರಕಾರ ಕೊಡುವ ಬೆಲೆ ರೈತರಿಗೆ ಯಾತಕ್ಕೂ ಸಾಲದಂತಾಗಿದೆ. ಇದೇ ವೇಳೆ ಖಾಸಗಿಯವರು ಬೆಂಬಲಬೆಲೆಯ ದುಪ್ಪಟ್ಟು ಬೆಲೆಯನ್ನು ಕೊಟ್ಟು ಮನೆ ಬಾಗಿಲಲ್ಲೇ ಖರೀದಿಸುತ್ತಾರೆ. ರೈತರು ಇದರಿಂದ ಖಾಸಗಿಯವರಿಗೇ ಕೊಡುವ ಸ್ಥಿತಿಯನ್ನು ಸರಕಾರವೇ ನಿರ್ಮಿಸಿದೆ.
 ಮಧ್ಯವರ್ತಿಗಳ ಕಾಟ ಹೆಚ್ಚಾಗಿದೆ. ಬೆಲೆ ಕಡಿಮೆ ಇದ್ದಾಗ ಸಕಷ್ಟು ಪ್ರಮಾಣದಲ್ಲಿ ದಾಸ್ತಾನು ಮಾಡಿಟ್ಟುಕೊಂಡು ಸಾಮಾನ್ಯ ಜನರಿಗೆ ಸಿಗದಂತೆ ಮಾಡುತ್ತಾರೆ. ಸರಬರಾಜು ತನ್ನಿಂತಾನೆ ಕಡಿಮೆಯಾಗುವಂತೆ ಮಾಡಿ ಬೆಲೆ ಏರಿಸುತ್ತಾರೆ. ನಂತರ ತಮ್ಮ ಕಾಪು ದಾಸ್ತಾನನ್ನು ಮಾರುಕಟ್ಟೆಗೆ ಬಿಡುತ್ತಾರೆ. ಆಗ ಅತಿ ಹೆಚ್ಚಿನ ಬೆಲೆಯ ಲಾಭ ಪಡೆಯುತ್ತಾರೆ. ಸರಕಾರ ಇಂತಹ ಕಾಪು ದಾಸ್ತಾನಿಗರ ವಿರುದ್ಧ ಮುಲಾಜಿಲ್ಲದೆ ಕ್ರಮ ಜರುಗಿಸಬೇಕು.
ಜೊತೆಗೆ ಹೆಚ್ಚು ಹೆಚ್ಚು ಬೆಳೆಯಲು ರೈತರನ್ನು ಉತ್ತೇಜಿಸುವ, ಆ ದಿಸೆಯಲ್ಲಿ ಆಂದೋಲನವನ್ನೇ ಅಂತಾರಾಷ್ಟ್ರೀಯ ದ್ವಿದಳ ಧಾನ್ಯಗಳ ವರ್ಷದಲ್ಲಿ ಮಾಡಬೇಕಿದೆ. ರೈತರಿಗೆ ಬೇಕಾದ ತಂತ್ರಜ್ಞಾನ ಸಿಗುವಂತೆ ಮಾಡಬೇಕಿದೆ. ಬೆಳೆ ವಿಮೆಯನ್ನು ಕೊಡಬೇಕಿದೆ. ಮರಳಿ ರೈತ ಕೃಷಿಯತ್ತ ಬರುವಂತೆ ಮಾಡುವುದೊಂದೇ ಬೆಳೆ ಹೆಚ್ಚು ಮಾಡಲು ಇರುವ ದಾರಿ. ಸರಕಾರಗಳು ಈ ದಿಸೆಯಲ್ಲಿ ಯತ್ನಿಸಬೇಕಿದೆ. ಆಗ ಮಾತ್ರ ಸುಲಭ ಬೆಲೆಯಲ್ಲಿ ಎಲ್ಲ ಬೆಳೆಗಳು ಸಿಗುವಂತಾಗಲಿವೆ. ಆ ದಿನಗಳಿಗಾಗಿ ಭಾರತದ ಜನರು ಕಾಯುತ್ತಿದ್ದಾರೆ.  

Wednesday, 15 June 2016

ಭಿನ್ನಮತೀಯರ ಅಮಾನತು: ಜೆಡಿಎಸ್ ಮುಂದಿನ ದಾರಿ ಏನು?






ಜೆಡಿಎಸ್ ಚಿಂತನೆ ಬದಲಾಗಬೇಕಿದೆ. ಪಕ್ಷಕ್ಕೇ ಆರ್ಥಿಕ ಸಂಪನ್ಮೂಲವಿರುವವರೇ ಬೇಕಿಲ್ಲ. ಸಂಘಟನಾ ಚತುರರೂ ಬೇಕು. ತೂಕದ ಮಾತನಾಡುವವರೂ,  ಮೋಡಿ ಮಾಡುವವರೂ ಬೇಕು. ಅಂತಹವರನ್ನು ಗುರುತಿಸುವ ಕೆಲಸ ಮಾಡಬೇಕಿತ್ತು. ಜೆಡಿಎಸ್‌ನ 40 ಶಾಸಕರಲ್ಲಿ ಭಿನ್ನಮತೀಯ 6-8 ಶಾಸಕರನ್ನು ಬಿಟ್ಟರೆ ಉಳಿದವರೆಲ್ಲಾ ಕುಮಾರಸ್ವಾಮಿಗೆ ಜೈ ಎನ್ನುವವರೇ ಇದ್ದಾರೆ. ಅವರೊಂದಿಗೆ ನಾಯಕತ್ವ  ಬೆಳೆಸಬೇಕೆನ್ನುವ ಬಗ್ಗೆ ಚಿಂತನೆ, ಚರ್ಚೆ ನಡೆಸಿದವರಿಲ್ಲ. ನಾಯಕತ್ವದ ಗಟ್ಟಿತನ ಎಲ್ಲಿರುವುದಿಲ್ಲವೋ ಅಲ್ಲಿ ಟೊಳ್ಳುತನ ಎದುರಾಗುತ್ತದೆ, ಪಕ್ಷ ಬಲಹೀನವಾಗುತ್ತದೆ.


ಜಾತ್ಯತೀತ ಜನತಾ ದಳ (ಜೆಡಿಎಸ್) ಬಿಕ್ಕಟ್ಟಿನ ಮೇಲೆ, ಬಿಕ್ಕಟ್ಟು ಎದುರಿಸುತ್ತಿದ. ಮೊನ್ನೆ ನಡೆದ ಎಂಎಲ್‌ಸಿ ಚುನಾವಣೆಯಲ್ಲೂ ಅದರ ಕೆಲವು ಶಾಸಕರು  ಕಾಂಗ್ರೆಸ್ ಅಭ್ಯರ್ಥಿ ಪರ ಮತ ಚಲಾಯಿಸಿ ತಮ್ಮ ಪಕ್ಷದ ಅಧಿಕೃತ ಎರಡನೆಯ ಅಭ್ಯರ್ಥಿ  ಸೋಲುವಂತೆ ಮಾಡಿದ್ದಾರೆ. ಇದಾದ ಬಳಿಕ ಮಾರನೆಯ ದಿನ ಜರುಗಿದ ರಾಜ್ಯಸಭೆ ಅಭ್ಯರ್ಥಿಯ ಚುನಾವಣೆಯಲ್ಲೂ ಇದೇ ಮರುಕಳಿಸಿದೆ.  ಭಿನ್ನಮತೀಯರೆನಿಸಿಕೊಂಡ 8 ಶಾಸಕರನ್ನು ಪಕ್ಷದಿಂದ ಅಮಾನತುಗೊಳಿಸುವ ಧೈರ್ಯವನ್ನು ಇದೇ ಮೊದಲ ಬಾರಿಗೆ ಮಾಜಿ ಪ್ರಧಾನಿಯೂ, ಜೆಡಿಎಸ್ ರಾಷ್ಟ್ರೀಯ ಅದ್ಯಕ್ಷರೂ ಆದ ಎಚ್. ಡಿ. ದೇವೇಗೌಡರು ತೋರಿಸಿದ್ದಾರೆ.
ಜೆಡಿಎಸ್ ಬಿಕ್ಕಟ್ಟು ಇಂದು-ನಿನ್ನೆಯದಲ್ಲ. ಆರೆಂಟು ತಿಂಗಳಿಂದ ಮುದುವರೆದುಕೊಂಡೇ ಬಂದಿದೆ. ಶಾಸಕ ಚೆಲುವರಾಯಸ್ವಾಮಿ, ಜಮೀರ್ ಅಹಮದ್ ಖಾನ್ ಮತ್ತು ಎಚ್. ಸಿ. ಬಾಲಕೃಷ್ಣ  ಮಾಜಿ ಮುಖ್ಯಮಂತ್ರಿ ಮತ್ತು  ಪಕ್ಷದ ರಾಜ್ಯ ಅದ್ಯಕ್ಷ ಎಚ್ ಡಿ ಕುಮಾರಸ್ವಾಮಿ  ವಿರುದ್ಧ ಮುನಿಸಿಕೊಂಡೇ ಬಂದಿದ್ದಾರೆ. ಆಗಾಗ್ಗೆ ಇದು ಜ್ವಲಿಸುತ್ತಾ, ಕೆಲವೊಮ್ಮೆ ತಣ್ಣಗಾಗುತ್ತ ಇದ್ದಿತ್ತು. ಆದರೆ ಯಾವಾಗಲಾದರೊಮ್ಮೆ ಭುಗಿಲೇಳುವುದು ನಿಶ್ಚಿತವಾಗಿತ್ತು. ಅದು ಈಗ ನಿಜವಾಗಿದೆ. ಪರಿಣಾಮವಾಗಿ 8 ಶಾಸಕರನ್ನು ಪಕ್ಷದಿಂದ ಹೊರಹಾಕಲಾಗಿದೆ.
ಯಾವುದೇ ಪಕ್ಷದಲ್ಲಿರಲಿ, ಯಾವಾಗ ಪಕ್ಷದ ಹೈಕಮಾಂಡ್  ಬಲಿಷ್ಠವಿರುತ್ತದೆಯೋ  ಪಕ್ಷ ಬಲಿಷ್ಠವಿರುತ್ತದೆ. ಯಾವಾಗ ಸ್ಥಳಿಯ ನಾಯಕರೇ ಬಲಿಷ್ಠರಾಗುತ್ತಾರೋ ಆಗ ಹೈಕಮಾಂಡ್ ಬಲಹೀನವಾಗುತ್ತದೆ. ಜೆಡಿಎಸ್ ಉದಾಹರಣೆಯನ್ನು ಇಲ್ಲಿ ಗಮನಿಸಬಹುದು. ಹೈಕಮಾಂಡ್ ದೇವೇಗೌಡರು ಮತ್ತು ಅವರ ಪುತ್ರರಾದ ಕುಮಾರಸ್ವಾಮಿ , ರೇವಣ್ಣ ಎಲ್ಲ ಅಧಿಕಾರ ಚಲಾಯಿಸುತ್ತ ಇಲ್ಲಿಯವರೆಗೆ ನಿಯಂತ್ರಿಸುತ್ತಿದ್ದರು. ಆದರೆ ಭಿನ್ನಮತೀಯ  ಐವರು ಹಿರಿಯ ನಾಯಕರು ತೊಡೆತಟ್ಟಿದಂದಿನಿಂದ ಯಾವ ಕ್ರಮವನನೂ ತೆಗೆದುಕೊಳ್ಳದೆ ಭಿನ್ನಮತ ಬೆಳೆಯಲು ಅವಕಾಶ ಕಲ್ಪಿಸಿದ್ದರು. ಮೊದಲೇ ಚಿವುಟಿ ಹಾಕಿದ್ದರೆ ಪಕ್ಷಕ್ಕೆ ಈ ಕ್ಯಾನ್ಸರ್ ಅಂಟುತ್ತಿರಲಿಲ್ಲ.  ಈಗ ಅದು ವ್ಯಾಪಿಸುತ್ತಿರುವುದನ್ನು ಅರಿತು ಕ್ರಮ ಜರುಗಿಸಿದ್ದಾರೆ.
ಹಾಗಾದರೆ ಇದಕ್ಕೆಲ್ಲ ಕಾರಣ ಹೈಕಮಾಂಡೇ ಅಥವಾ ಭಿನ್ನಮತಿಯರೇ ಎನ್ನುವುದನ್ನು ವಿಶ್ಲೇಷಿಸಿದರೆ, ಒಂದು ಹಂತದಲ್ಲಿ ಅಪ್ಪ-ಮಕ್ಕಳೇ ಕಾರಣ ಎನ್ನಬಹುದು. ಏಕೆಂದರೆ, ದೇವೇಗೌಡ ಮತ್ತು ಕುಮಾರಸ್ವಾಮಿ ಪಕ್ಷದ ಮೇಲೆ ಹಿಡಿತ ಹೊಂದಿರುವವರಾದರೂ ಪಕ್ಷ ಸಂಘಟಿಸುವ ಕೆಲಸಕ್ಕೆ ಕೈ ಹಾಕಲಿಲ್ಲ. ಎರಡನೆಯ ತಲೆಮಾರಿನ ನಾಯಕರನ್ನು ಬೆಳೆಸಲೇ ಇಲ್ಲ. ಬೆಳೆಸಿದರೆ ತಮ್ಮ ಬುಡಕ್ಕೇ ಇವರು ಕೊಡಲಿ ಹಾಕುತ್ತಾರೆಂಬ ಭಯ ಇವರಲ್ಲಿರಬಹುದು. ಅತವ ತಮ್ಮ ಕುಟುಂಬದ ಆಸ್ತಿಯಾಗಿರುವ ಪಕ್ಷ ಬೇರೆಯವರ ಕೈವಶವಾಗಬಹುದೆನ್ನುವ ಭಯವೂ ಆಗಿರಬಹುದು.
  ಅದಕ್ಕಾಗಿಯೇ ದೇವೇಗೌಡರು ತಮ್ಮ ಸೊಸೆಯಂದಿರನ್ನು, ಮೊಮ್ಮಕ್ಕಳನ್ನು ಬೆಳೆಸಲಾರಂಭಿಸಿದ್ದರು. ಕುಟುಂಬ ರಾಜಕಾರಣ ಮತ್ತು ಜಾತಿ ರಾಜಕಾರಣ ಎಂದೂ ಯಶಸ್ವಿಯಾಗದು. ಎಲ್ಲೋ ಆಗೊಮ್ಮೆ, ಈಗೊಮ್ಮೆ ಇದು ಸಾಧನೆ ಮಾಡಿರಬಹುದು. ಇದು ದೇವೇಗೌಡ ಮತ್ತು ಅವರ ಮಕ್ಕಳಿಗೆ ಗೊತ್ತಿರದ ವಿಷಯವೇನಲ್ಲ. ಇಡೀ ದಿನ ರಾಜಕೀಯದಲ್ಲೇ ಮುಳುಗಿರುವ, ತಂತ್ರಗಾರಿಕೆಯಲ್ಲೇ ಕಾಲಕಳೆಯುವ ಇವರಿಗೆ ಇದು ಅರ್ಥವಾಗದ ವಿಚಾರವಂತೂ ಅಲ್ಲ. ಇಷ್ಟಾದರೂ  ಇದರಲ್ಲೇ ಮುಂದುವರೆಯುತ್ತಿರುವುದು ಮಾತ್ರ ವಿಪರ್ಯಾಸವೇ ಸರಿ.
ಸಿದ್ಧಾಂತವಿಲ್ಲದವರು:
 ಮೊದಲನೆಯದಾಗಿ, ಭಿನ್ನಮತೀಯ ಕೆಲಸಕ್ಕೆ ಕೈ ಹಾಕಿದವರನ್ನು ಮಾತುಕತೆ ಮೂಲಕ ಸರಿದಾರಿಗೆ ತರುವ ಕೆಲಸ ಮಾಡಲಿಲ್ಲ. ಎರಡನೆಯದಾಗಿ, ದುಡ್ಡಿದ್ದವರಿಗೆ, ರಿಯಲ್ ಎಸ್ಟೇಟ್‌ನವರಿಗೆ  ಟಿಕೆಟ್ ಕೊಡುತ್ತ ಚುನಾವಣೆ ನಡೆಸಿದ್ದನ್ನು (ಮಲ್ಯ, ಫಾರೂಕ್ ಮೊದಲಾದವರು) ಕುಮಾರಸ್ವಾಮಿ ಮುಂದಾದ ಹಲವರು ನಿದರ್ಶನ ಕಾಣಬಹುದು. ಆದರೆ, ದೇವೇಗೌಡರಿಗೆ ಶಾಸಕ ವೈಎಸ್‌ವಿ ದತ್ತ್ತಾ ಅವರಂತಹ ಕೆಲವು ಚಿಂತಕರು ಹೇಳಿದ ಮಾತು ಹಿಡಿಸುತ್ತಿತ್ತು. ಹಾಗಾಗಿ, ಅವರು ದುಡ್ಡಿದ್ದವರಿಗೆ ಟಿಕೆಟ್ ಕೊಡಲು ಒಪ್ಪುತ್ತಿರಲಿಲ್ಲ. ಆದರೆ, ಎಚ್‌ಡಿಕೆ ಮಾತ್ರ ಹಣದ ಹಿಂದೆ ಬಿದ್ದವರಾಗಿದ್ದರು. ಮೂರನೆಯದಾಗಿ, ಜಾತ್ಯತೀತ ಹೆಸರನ್ನು ಇಟ್ಟುಕೊಂಡಾಕ್ಷಣ ಆ ಪಕ್ಷ ಅದೇ ಸಿದ್ಧಾಂತಕ್ಕೆ ಅಂಟಿಕೊಂಡಿರಬೇಕಿಲ್ಲ ಎನ್ನುವುದು ಅಪ್ಪ-ಮಕ್ಕಳ ನಿಲುವು. ಇದನ್ನು ಪದೇ ಪದೇ ತೋರಿಸಿಕೊಟ್ಟಿದ್ದಾರೆ. ಹಾಗಾಗಿ ಸಿದ್ಧಾಂತವಿಲ್ಲದ ಪಕ್ಷ ಇದಾಗಿದೆ.
ಇನ್ನಾದರೂ ಜೆಡಿಎಸ್ ಚಿಂತನೆ ಬದಲಾಗಬೇಕಿದೆ. ಪಕ್ಷಕ್ಕೇ ಆರ್ಥಿಕ ಸಂಪನ್ಮೂಲವಿರುವವರೇ ಬೇಕಿಲ್ಲ. ಸಂಘಟನಾ ಚತುರರೂ ಬೇಕು. ತೂಕದ ಮಾತನಾಡುವವರೂ,  ಮೋಡಿ ಮಾಡುವವರೂ ಬೇಕು. ಅಂತಹವರನ್ನು ಗುರುತಿಸುವ ಕೆಲಸ ಮಾಡಬೇಕಿತ್ತು. ಜೆಡಿಎಸ್‌ನ 40 ಶಾಸಕರಲ್ಲಿ ಭಿನ್ನಮತೀಯ 6-8 ಶಾಸಕರನ್ನು ಬಿಟ್ಟರೆ ಉಳಿದವರೆಲ್ಲಾ ಕುಮಾರಸ್ವಾಮಿಗೆ ಜೈ ಎನ್ನುವವರೇ ಇದ್ದಾರೆ. ಅವರೊಂದಿಗೆ ನಾಯಕತ್ವ  ಬೆಳೆಸಬೇಕೆನ್ನುವ ಬಗ್ಗೆ ಚಿಂತನೆ, ಚರ್ಚೆ ನಡೆಸಿದವರಿಲ್ಲ. ನಾಯಕತ್ವದ ಗಟ್ಟಿತನ ಎಲ್ಲಿರುವುದಿಲ್ಲವೋ ಅಲ್ಲಿ ಟೊಳ್ಳುತನ ಎದುರಾಗುತ್ತದೆ, ಪಕ್ಷ ಬಲಹೀನವಾಗುತ್ತದೆ. ಈ ರೀತಿಯಾದರೆ, ತಮ್ಮ ನಂತರ ಪಕ್ಷದ ಗತಿ ಏನಾದೀತೆಂಬ ಕಲ್ಪನೆಯೇ ಅಪ್ಪ-ಮಕ್ಕಳಿಗಿಲ್ಲ. ಕುಮಾರಸ್ವಾಮಿ ಹೇಳುವುದು ಒಂದು, ಮಾಡುವುದು ಒಂದು. ಏಕೆಂದರೆ ಇನ್ನೊಬ್ಬರ ಚಾಡಿಮಾತಿಗೆ ಬೆಲೆ ಕೊಡುವುದೇ ಹೆಚ್ಚು. ಸ್ವಂತ ನಿಲುವಿಲ್ಲ.
ಕೌಟುಂಬಿಕ ಪಕ್ಷವಾಗಿರುವ ಜೆಡಿಎಸ್‌ನಲ್ಲಿರುವ ಶಾಸಕರಿಗೆ ಈಗ ಅಸ್ತಿತ್ವದ ಪ್ರಶ್ನೆ ಎದ್ದಿದೆ. ಯಾವಾಗ ವ್ಯಕ್ತಿಗೆ ಈ ರೀತಿ ಸಂಭವಿಸುತ್ತದೆಯೋ ಆಗ ಅವಕಾಶವಿರುವಲ್ಲಿ ಆತ ಹೋಗುತ್ತಾನೆ.
ಭಿನ್ನಮತೀಯರ ಆಟ:
ಇನ್ನು, ಭಿನ್ನಮತೀಯರೇನೂ ಸುಭಗರಲ್ಲ. ಜಮೀರ್ ಅಹಮದ್ ಖಾನ್ ಮೊದಲಿನಿಂದಲೂ ಕುಮಾರಸ್ವಾಮಿಯನ್ನು  ಹೆದರಿಸುತ್ತಲೇ ಬಂದವರು. ಇವರ ಬಗ್ಗೆ ಎಚ್ಚರವಹಿಸಿ ನಿಯಂತ್ರಿಬೇಕಿತ್ತು. ಆದರೆ ಮುಸ್ಲಿಮ್ ನಾಯಕನೆಂಬ ಕಾರಣಕ್ಕೆ ಮತ್ತು ಇಬ್ಬರೂ ಒಂದು ಕಾಲದಲ್ಲಿ ಜಿಗ್ರಿ ದೋಸ್ತ್ ಆಗಿದ್ದರಿಂದ  ಸುಮ್ಮನಾದರು. ಇದನ್ನೇ ಜಮೀರ್ ಸಹ ದುರುಪಯೋಗಪಡಿಸಿಕೊಂಡರು. ಬೆಂಗಳೂರು ನಗರದಲ್ಲಿ ಪ್ರಮುಖ ಜೆಡಿಎಸ್ ನಾಯಕನಾದರು. ತನ್ನನ್ನು ಎದುರು ಹಾಕಿಕೊಂಡರೆ ಕಷ್ಟ ಎಂಬ ಪರಿಸ್ಥಿತಿ ನಿರ್ಮಿಸಿದರು. ಪರಿಣಾಮ ಈಗ ಎದುರಿಸುವಂತಾಗಿದೆ.
ಚೆಲುವರಾಯಸ್ವಾಮಿ ಮಂಡ್ಯ ಸಾಂಸದನಾಗಿದ್ದಾಗಲೇ ಭಿನ್ನಮತೀಯ ಚಟುವಟಿಕೆಗೆ ನಾಂದಿ ಹಾಡಿದವರು. ನಂತರ ಶಾಸಕರಾದರು. ಮಂಡ್ಯದಲ್ಲಿ ತಮ್ಮದೇ ಹಠ ನಡೆಯಬೇಕೆಂದು ಕುಳಿತರು. ಮೊನ್ನೆ ಶಿಕ್ಷಕರ ಕ್ಷೇತ್ರದ ಚುನಾವಣೆಯ ಟಿಕೆಟ್ ಕೊಡುವ ವೇಳೆ ತಾನು ಹೇಳಿದವರಿಗೆ ಟಿಕೆಟ್ ಕೊಟ್ಟಿಲ್ಲ ಎಂಬ ಕಾರಣಕ್ಕೆ ಜಿದ್ದಾಜಿದ್ದಿಗೆ ಬಿದ್ದವರಂತೆ ಅಡ್ಡಮತ ಹಾಕಿ ಮುಯ್ಯಿ ತೀರಿಸಿಕೊಂಡಿದ್ದಾರೆ. ನಿನ್ನೆ ಅಮಾನತಾಗಿದ್ದಾರೆ.
ಮಾಗಡಿ ಶಾಸಕ ಎಚ್. ಸಿ ಬಾಲಕೃಷ್ಣ ಈ ಹಿಂದೆಯೇ ಜಮೀರ್‌ರಂತೆ ಸಿಡಿದೆದ್ದವರು. ಒಂದು ಹಂತದಲ್ಲಿ ಬಿಜೆಪಿ ಸೇರುತ್ತಾರೆಂಬ ವದಂತಿ ಹಬ್ಬಿತ್ತು. ಇದನ್ನು ಈಗ ಅವರೇ ಹೇಳಿಕೊಂಡಿದ್ದಾರೆ. ಅದರೆ ಜಮೀರ್, ಚೆಲುವರಾಯಸ್ವಾಮಿಯಿಂದಾಗಿ ಇಲ್ಲೇ ಉಳಿದು ಅವರ ಜೊತೆ ಸೇರಿ ಅಪ್ಪ-ಮಕ್ಕಳಿಗೆ ಬುದ್ಧಿ ಕಲಿಸಲು ಮುಂದಾಗಿದ್ದರು. ಇವರ ಜೊತೆ ಗಂಗಾವತಿ ಶಾಸಕ ಇಕ್ಬಾಲ್ ಅನ್ಸಾರಿ. ಶ್ರೀರಂಗಪಟ್ಟಣ ಶಾಸಕ ರಮೇಶ್ ಬಂಡಿಸಿದ್ದೇಗೌಡ ಸಹ ಸೇರಿದ್ದಾರೆ. ಇವರೆಲ್ಲರ ಮುಖಂಡತ್ವದಲ್ಲಿ ಹಲವು ತಿಂಗಳಿಂದ ನಡೆದಿದ್ದ ಭಿನ್ನಮತೀಯ ಚಟುವಟಿಕೆ ನಿನ್ನೆ ಒಂದು ಹಂತಕ್ಕೆ ಬಂದಿದೆ.
ಜೆಡಿಎಸ್ ಸಮಸ್ಯೆ:
  ಜೆಡಿಎಸ್‌ಗೆ ಮೊದಲಿನಿಂದಲೂ ಶಾಸಕರನ್ನು ಹಿಡಿದಿಟ್ಟುಕೊಳ್ಳುವುದೇ  ಸವಾಲಿನ ಕೆಲಸವಾಗಿತ್ತು. ರಾಜ್ಯಸಭೆ, ವಿಧಾನಪರಿಷತ್ ಚುನಾವಣೆ ವೇಳೆ ಇವರ ಜಗಳ ತಾರಕಕ್ಕೇರಿದ್ದರಿಂದ ಅಭ್ಯರ್ಥಿಯ ಗೆಲುವು ಕಷ್ಟ ಎನ್ನುವುದು ಎಲ್ಲರಿಗೂ ಗೊತ್ತಿತ್ತು. ಅದರಂತೆ ಹಠ ಸಾಧಿಸಿ ತೋರಿಸಿದ್ದಾರೆ ಭಿನ್ನಮತೀಯ ನಾಯಕರು. ಬಂಡಾಯ ಉಪಶಮನ ಮಾಡಲು ಕುಮಾರಸ್ವಾಮಿ ಮುಂದಾಗದೇ ಇದ್ದುದು, ಅನಗತ್ಯ ಹೇಳಿಕೆ ಕೊಟ್ಟು ಪರಿಸ್ಥಿತಿ ವಿಷಮಿಸುವಂತೆ ಮಾಡಿದ್ದು ಇನ್ನಷ್ಟು ಅದು ಬೆಳೆಯಲು ಕಾರಣ ಎನ್ನಲೇಬೇಕು. ಕನಿಷ್ಟ ಮಾತುಕತೆ ಮೂಲಕವಾದರೂ ಇದನ್ನು ಪರಿಹರಿಸುವ ಕೆಲಸಕ್ಕೆ ಕೈ ಹಾಕಲಿಲ್ಲ. ಬದಲಾಗಿ ಈ ಭಿನ್ನಮತೀಯರ ಕ್ಷೇತ್ರದಲ್ಲಿ ಬದಲೀ ನಾಯಕರನ್ನು ಬೆಳೆಸಲು ಎಚ್‌ಡಿಕೆ ಯತ್ನಸಿದ್ದೂ ಸಹ ಇವರ ಹೆಚ್ಚಿನ ಆಕ್ರೋಶಕ್ಕೆ ಕಾರಣವಾಗಿತ್ತು.
ಅಪ್ಪ-ಮಗ ಬದಲಾಗದಿದ್ದರೆ ಜೆಡಿಎಸ್‌ಗೆ ಖಂಡಿತ ಭವಿಷ್ಯವಿಲ್ಲ. 40 ಶಾಸಕರನ್ನು ಹೊಂದಿರುವುದರಿಂದ  ಆರ್ಭಟಿಸುತ್ತಿರುವ  ದೇವೇಗೌಡ ಮತ್ತು ಎಚ್‌ಡಿಕೆ  ಶಾಸಕರನ್ನು ಕನಿಷ್ಠ  ನಂಬಿಕೆಯಲ್ಲಿಟ್ಟುಕೊಳ್ಳುವಲ್ಲಿಯೂ ವಿಫಲರಾದರು. ಅವರು ಸಿಟ್ಟಿಗೆದ್ದಾಗ ಅವರನ್ನು ಒಲೈಸುವ  ಕೆಲಸವನ್ನೂ ಮಾಡಲಿಲ್ಲ. ಪರಿಣಾಮವಾಗಿ, ಬೆಂಗಳೂರು ನಗರದಲ್ಲಿ ಇದ್ದ ತನ್ನ ಮೂವರೂ ಶಾಸಕರನ್ನೂ ಈಗ ಕಳೆದುಕೊಳ್ಳುವ ಹಂತದಲ್ಲಿದೆ. ಶಾಸಕರಾದ ಗೋಪಾಲಯ್ಯ ಮತ್ತು ಅಖಂಡ ಶ್ರೀನಿವಾಸ್ ಸಹ ಅಮಾನತಾಗಿದ್ದಾರೆ. ಬಿಜೆಪಿ ಜೊತೆ ಸೇರಿ ಬಿಬಿಎಂಪಿ ಅಡಳಿತ ಮಾಡಲು ಮುಂದಾಗಿದ್ದ ಜೆಡಿಎಸ್‌ಗೆ ಇದೂ ಸಹ ಮುಳ್ಳಾಗಲಿದೆ. ಏಕೆಂದರೆ, ಅಲ್ಲಿರುವ ಜೆಡಿಎಸ್‌ನ 14 ಬಿಬಿಎಂಪಿ ಸದಸ್ಯರಲ್ಲಿ 12  ಸದಸ್ಯರು ಈ ಶಾಸಕತ್ರಯರ ಶಿಷ್ಯರಾಗಿದ್ದಾರೆ.

Tuesday, 14 June 2016


 ಬೆಂಬಲಿಗನಿಗೆ ಬಿಜೆಪಿ ಜಿಲ್ಲಾಧ್ಯಕ್ಷ ಪಟ್ಟ ಕಟ್ಟಿದ ಬಿಎಸ್‌ವೈ




 ರುದ್ರೇಗೌಡರ ಬಗ್ಗೆ ಗಮನಿಸುವುದಾದರೆ,  ಕೈಗಾರಿಕೋದ್ಯಮಿಯಾಗಿ ಹೆಸರು ಸಂಪಾದನೆ ಮಾಡಿದ್ದ ಎಸ್.ರುದ್ರೇಗೌಡರವರನ್ನು ಕರ್ನಾಟಕ ಲೋಕಸೇವಾ ಆಯೋಗದ ಸದಸ್ಯರನ್ನಾಗಿ ನೇಮಕ ಮಾಡಲಾಗಿತ್ತು. ಬಿ.ಎಸ್.ವೈ. ಕೆಜೆಪಿ ಕಟ್ಟಿದ ವೇಳೆ ರುದ್ರೇಗೌಡರು ಸಕ್ರಿಯ ರಾಜಕಾರಣಕ್ಕೆ ಧುಮುಕಿದ್ದರು. ಜಿಲ್ಲಾ ಅಧ್ಯಕ್ಷ ಸ್ಥಾನ ದೊರೆತಿರುವುದರಿಂದ ಬಹುದೊಡ್ಡ ಜವಾಬ್ದಾರಿ ಅವರ ಹೆಗಲೇರಿದೆ. ಇದನ್ನು ನಿಭಾಯಿಸುವುದು ಸುಲಭದ ಕೆಲಸವಲ್ಲ. ಅದರಲ್ಲೂ ಪಕ್ಷ ಸಂಘಟನೆ ಸವಾಲಿನದ್ದು. ಪಕ್ಷದ ಅಧಿಕಾರದಲ್ಲಿ ಇರದ ವೇಳೆ ಈ ಕೆಲಸ ಬಹಳ ಕಠಿಣ. ಜಿಲ್ಲೆಯಾದ್ಯಂತ, ಗ್ರಾಮದಾದ್ಯಂತ ಸಂಚರಿಸಿ ಪಕ್ಷ ಕಟ್ಟಬೇಕಿದೆ. ಕಾರ್ಯಕರ್ತರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಬೇಕಿದೆ. ಇರುವ ಎರಡು ಬಣವನ್ನು ಒಂದುಗೂಡಿಸಬೇಕಿದೆ. ಕಾರ್ಯಕರ್ತರನ್ನು, ನಾಯಕರನ್ನು ಒಂದೇ ಸೂರಿನಡಿ ತರಬೇಕಿದೆ. ಆದರೆ, ಇನ್ನೆರಡು ವರ್ಷ ಯಾವುದೇ ಚುನಾವಣೆ ಇಲ್ಲ. ಇದರಿಂದ ತಮ್ಮ ಛಾಪು ಮೂಡಿಸಿಕೊಳ್ಳಲು ಉತ್ತಮ ಕಾಲಾವಕಾಶವಿದೆ. ಇದನ್ನು ರುದ್ರೇಗೌಡರು ಹೇಗೆ ಬಳಸಿಕೊಳ್ಳುತ್ತಾರೆ ಎನ್ನುವುದರ ಮೇಲೆ ಅವರ ಯಶಸ್ಸು ನಿರ್ಧಾರವಾಗಲಿದೆ.  

ಜಿಲ್ಲಾ ಬಿಜೆಪಿ ವಲಯದಲ್ಲಿ ಕೆಲವು ದಿನಗಳಿಂದ  ಕೇಳಿ ಬರುತ್ತಿದ್ದ ಮಾತು ಈಗ ನಿಜವಾಗಿದೆ. ಅದೆಂದರೆ, ಪಕ್ಷದ ಜಿಲ್ಲಾಧ್ಯಕ್ಷ ಸ್ಥಾನಕ್ಕೆ ತಮ್ಮ ಬೆಂಬಲಿಗ ಎಸ್.ರುದ್ರೇಗೌಡರನ್ನು ನಿಯೋಜಿಸಲಿದ್ದಾರೆ ಎನ್ನುವುದಾಗಿತ್ತು. ಸಜ್ಜನ, ಪ್ರಾಮಾಣಿಕ ರುದ್ರೇಗೌಡರು ಖಂಡಿತ ಈ ಹುದ್ದೆಯ ಆಕಾಂಕ್ಷಿಯಾಗಿರಲಿಲ್ಲ. ಬಿಎಸ್‌ವೈ ಅವರ ಆಪ್ತರೆಂದೇ ಗುರುತಿಸಿಕೊಂಡು, ಅವರು ಶಿವಮೊಗ್ಗಕ್ಕೆ ಬಂದಾಗಲೆಲ್ಲ ಜೊತೆಯಲ್ಲಿರುತ್ತಿದ್ದರು. ಬಿಎಸ್‌ವೈ ಕರ್ನಾಟಕ ಜನತಾ ಪಕ್ಷ (ಕೆಜೆಪಿ)ಯನ್ನು ಕಟ್ಟಿದಾಗ ಅದರ ಜಿಲ್ಲಾಧ್ಯಕ್ಷ ಸ್ಥಾನವನ್ನು ವಹಿಸಿಕೊಂಡಿದ್ದರು. ಅಷ್ಟೇ ಏಕೆ, ಶಿವಮೊಗ್ಗ ವಿಧಾನಸಭೆ ಕ್ಷೇತ್ರದಿಂದ ಸ್ಪರ್ಧಿಸಿ 270 ಮತಗಳ ಅಂತರದಿಂದ ಪರಾಭವಗೊಂಡಿದ್ದರು.
ನಂತರ ಮತ್ತೆ ರಾಜಕೀಯದಿಂದ ದೂರವಾಗಿದ್ದರು. ಯಾವಾಗ ಬಿಎಸ್‌ವೈ ಬಿಜೆಪಿಗೆ ಮರುಪ್ರವೇಶ ಪಡೆದರೋ ಅಲ್ಲಿಂದ ಮತ್ತೆ ಕಾಣಿಸಿಕೊಳ್ಳಲಾರಂಭಿಸಿದರು. ಆದರೆ ಯಾವುದೇ ಪ್ರಮುಖ ಹುದ್ದೆ ಅವರಿಗಿರಲಿಲ್ಲ. ಬಿಜೆಪಿಯ ಇನ್ನೊಂದು ಬಣದವರ ಕೈಯಲ್ಲಿ ಜಿಲ್ಲಾ ಅಧಿಕಾರ ಇದ್ದುದರಿಂದ ಸಹಜವಾಗಿಯೇ ಬಿಎಸ್‌ವೈ ಜೊತೆ ಬಂದವರಿಗೆ ಅಧಿಕಾರ ತೀರ ಅತ್ಯಲ್ಪ ಪ್ರಮಾಣದಲ್ಲಿತ್ತು. ಇದು ಬಿಎಸ್‌ವೈಗೂ ಗೊತ್ತಿತ್ತು. ಇದರಿಂದ ರೋಸಿ ಹೋಗಿದ್ದ ಹಲವು ಬೆಂಬಲಿಗರು ಪಕ್ಷದ ಚಟುವಟಿಕೆಗಳಿಂದಲೇ ದೂರ ಉಳಿದಿದ್ದರು. ಸ್ವತಃ ಬಿ.ಎಸ್.ವೈ.ಅವರೇ, ’ಪಕ್ಷದಲ್ಲಿ ತಮ್ಮ ಮಾತನ್ನು ಯಾರೂ ಕೇಳುತ್ತಿಲ್ಲ. ಸ್ವಲ್ಪ ದಿನ ಕಾಯಿರಿ ಎಲ್ಲವೂ ಸರಿ ಹೋಗುತ್ತದೆ...’ ಎಂದು  ಬೆಂಬಲಿಗರನ್ನು ಸಮಾಧಾನಗೊಳಿಸುತ್ತಿದ್ದರು.
ಈಗ ಇನ್ನೊಂದು ಇನ್ನಿಂಗ್ಸ್ ಆರಂಭವಾಗಿದೆ. ಅದೆಂದರೆ, ಮತ್ತೆ ಬಿಎಸ್‌ವೈ ರಾಜ್ಯಾಧ್ಯಕ್ಷರಾಗಿದ್ದಾರೆ, ಜಿಲ್ಲಾಧ್ಯಕ್ಷ ಸ್ಥಾನವೂ ಅವರ ಕಟ್ಟಾ ಬೆಂಬಲಿಗ, ಉದ್ಯಮಿಯ ಕೈಗೆ ಬಂದಿದೆ.   ಯಡಿಯೂರಪ್ಪ ಬೆಂಬಲಿಗರಿಗೆ ಶುಕ್ರದೆಸೆ ಶುರುವಾಗಿದೆ ಎನ್ನಬಹುದು. ಬಿ.ಎಸ್.ವೈ. ಬಿಜೆಪಿ ರಾಜ್ಯಾಧ್ಯಕ್ಷರಾಗುತ್ತಿದ್ದಂತೆ ಮೂಲೆಗುಂಪಾಗಿದ್ದ ಬೆಂಬಲಿಗರೀಗ ಮುನ್ನೆಲೆಗೆ ಆಗಮಿಸುತ್ತಿದ್ದಾರೆ. ಇದು ಮತ್ತೊಂದು ಬಣದಲ್ಲಿ ತಳಮಳ ಸೃಷ್ಟಿಸಿರುವುದು ಸತ್ಯ.
ಜಿಲ್ಲಾ ಬಿಜೆಪಿ ಘಟಕದಲ್ಲಿ ಈ ಹಿಂದಿದ್ದ ಪ್ರಾಬಲ್ಯ ಮರುಸಂಪಾದನೆಗೆ ಬಿ.ಎಸ್.ವೈ. ಯತ್ನಿಸುತ್ತಿದ್ದಾರೆ. ಇದಕ್ಕೆ ಪೂರಕವಾಗಿ ಮುಂದಿನ ದಿನಗಳಲ್ಲಿ ಪಕ್ಷದ ತಾಲೂಕು ಹಾಗೂ ಜಿಲ್ಲಾ ಘಟಕಗಳಲ್ಲಿಯೂ ತಮ್ಮ ಬೆಂಬಲಿಗರಿಗೆ ಮಣೆ ಹಾಕುವುದು ಖಚಿತವಾಗಿದೆ. ಬಿಎಸ್ ವೈ ರಾಜಕೀಯ ಗೊತ್ತಿದ್ದವರಾರೂ ಇದನ್ನು ಅಲ್ಲಗಳೆಯುವುದಿಲ್ಲ.
 ಹಾಲಿ ಜಿಲ್ಲಾಧ್ಯಕ್ಷ ಎಸ್.ದತ್ತಾತ್ರಿಯವರನ್ನೇ ಮುಂದುವರೆಸಲು ಇನ್ನೊಂದೆಡೆ ಭಾರೀ ಯತ್ನ ನಡೆದಿತ್ತು. ಸಂಘಪರಿವಾರ ಹಾಗೂ ಪಕ್ಷದ ವರಿಷ್ಠರ ಮೂಲಕ ಬಿ.ಎಸ್.ವೈ. ಮೇಲೆ ಒತ್ತಡ ಹಾಕಿಸುವ ಕೆಲಸ ಕೂಡ ಮಾಡಿತ್ತು. ಆದರೆ ಇವ್ಯಾವ ಒತ್ತಡಕ್ಕೂ ಬಗ್ಗದ ಬಿ.ಎಸ್.ವೈ. ಬೆಂಬಲಿಗನಿಗೆ ಪಟ್ಟ ಕಟ್ಟಿದ್ದಾರೆ.
ಈ ಹಿಂದೆ ಜಿಲ್ಲಾ ಬಿಜೆಪಿಯಲ್ಲಿ ಬಿ.ಎಸ್.ವೈ. ನಿರ್ಣಾಯಕ ಸ್ಥಾನದಲ್ಲಿದ್ದರು. ಅವರ ಅಣತಿಯಿಲ್ಲದೆ ಪಕ್ಷದಲ್ಲಿ ಹುಲ್ಲು ಕಡ್ಡಿ ಕೂಡ ಅಲುಗಾಡುವುದಿಲ್ಲವೆಂಬ ಸ್ಥಿತಿಯಿತ್ತು. ಆದರೆ ಬದಲಾದ ರಾಜಕೀಯ ಬೆಳವಣಿಗೆಯಲ್ಲಿ ಬಿ.ಎಸ್.ವೈ. ಬಿಜೆಪಿ ತೊರೆದಾಗ ಹಲವು ಮುಖಂಡರು, ಕಾರ್ಯಕರ್ತರು ಅವರನ್ನು ಹಿಂಬಾಲಿಸಿದ್ದು ಈಗ ಇತಿಹಾಸ.  ಬಿ.ಎಸ್.ವೈ. ಮತ್ತೆ ಬಿಜೆಪಿಗೆ ಮರಳಿದ್ದರು. ಅವರೊಂದಿಗೆ ಬಿಜೆಪಿಗೆ ಆಗಮಿಸಿದ್ದ ಬೆಂಬಲಿಗರಿಗೆ ಪಕ್ಷದಲ್ಲಿ ಸೂಕ್ತ ಸ್ಥಾನಮಾನ ದೊರಕಿರಲಿಲ್ಲ. ಉದ್ದೇಶಪೂರ್ವಕವಾಗಿಯೇ ಅವರನ್ನು ಕಡೆಗಣನೆ ಮಾಡಿಕೊಂಡು ಬರಲಾಗಿತ್ತು. ಬಿ.ಎಸ್.ವೈ. ಮಾತಿಗೆ ಸ್ಥಳೀಯ ಮುಖಂಡರೂ ಕೂಡ ಮನ್ನಣೆ ನೀಡುತ್ತಿರಲಿಲ್ಲ ಎಂಬ ಮಾತು ಕೂಡ ಕೇಳಿಬಂದಿತ್ತು.



Monday, 13 June 2016



 ಮಾದರಿ ಶಾಲೆ ‘ಪೊಲೀಸ್ ಬಾಲಭವನ’






ಪೊಲೀಸ್ ಸಿಬ್ಬಂದಿ ಮಕ್ಕಳಿಗಾಗಿಯೇ ತೆರೆದ ರಾಜ್ಯದ ಮೊದಲ ಶಾಲೆ ಈ ಬಾಲಭವನ. ಎಸ್ ಪಿ ರವಿ ಚನ್ನಣ್ಣನವರ್ ಅವರ ಕನಸಿನ ಫಲ. ಇಲ್ಲಿ ಪಠ್ಯಪುಸ್ತಕವಿಲ್ಲ, ಕೇವಲ ಆಟೋಪಕರಣಗಳೇ ಪಠ್ಯಗಳು. ಹತ್ತಾರು ಸಾವಿರ ರೂ. ಡೊನೇಶನ್ ತೆತ್ತು ಪ್ಲೇ ಹೋಂ, ಎಲ್‌ಕೆಜಿ, ಯುಕೆಜಿಗೆ ತಮ್ಮ ಪುಟಾಣಿಗಳನ್ನು ಪೊಲೀಸರು ಸೇರಿಸಲು ಇನ್ನು ಹೋರಾಟ ಮಾಡಬೇಕಿಲ್ಲ. ಬದಲಾಗಿ ಇಲ್ಲಿಯೇ ಸೇರಿಸಿದರೆ ಆಧುನಿಕ ಮಾದರಿಯ, ಮುಂದೆ ಉತ್ತಮ ಜೀವನವನ್ನು ಕಟ್ಟಿಕೊಡಬಲ್ಲ  ಶಿಕ್ಷಣ ಸಿಗಲಿದೆ. ಓಪನ್ ಮೈಂಡ್ಸ್ ನೆರವಿನಿಂದ ಎಸ್ ಪಿಯವರು ನಿಜಕ್ಕೂ ಸ್ಮರಣಿಯ ಕಾರ್ಯ ಮಾಡಿದ್ದಾರೆ.  

ಶಿಕ್ಷಣ ವ್ಯಕ್ತಿಯ ವ್ಯಕ್ತಿತ್ವವವನ್ನು ರೂಪಿಸುತ್ತದೆ. ಶಿಕ್ಷಣವನ್ನು ಕಲಿತರೆ  ಭವಿಷ್ಯ ನಿರ್ಮಾಣವಾಗುತ್ತದೆ. ದೇಶದ ಅಭಿವೃದ್ಧಿಗೆ ಶಿಕ್ಷಣ ಅವಶ್ಯ ಎಂಬೆಲ್ಲ ಮಾತಿದೆ. ಈ ಹಿನ್ನೆಲೆಯಲ್ಲಿ ಇಂದು ಮಕ್ಕಳನ್ನು ತಪ್ಪದೇ ಪಾಲಕರು ಶಾಲೆಗೆ ಕಳುಹಿಸುತ್ತಾರೆ. ಖಾಸಗಿ ಶಾಲೆಗಳಾಗಿರಬಹುದು, ಸರಕಾರಿ ಶಾಲೆಗಳಾಗಿರಬಹುದು, ತಮ್ಮ ಮಗು ಉತ್ತಮ ಪ್ರಜೆಯಾಗಬೇಕು, ವಿದ್ಯಾವಂತನಾಗಬೇಕೆಂಬ ಹಂಬಲ ಪಾಲಕರದ್ದಾಗಿರುತ್ತದೆ.
ತಾನು ವಿದ್ಯಾಭ್ಯಾಸ ಕಲಿಯುವ ಹಂತದಲ್ಲೇ ಮುಂದೊಂದು ದಿನ ಶಾಲೆಯನ್ನು ತೆರೆಯಬೇಕು, ತನ್ನಂತೆ ನೂರಾರು ಜನರಿಗೆ ಅನುಕೂಲ ಕಲ್ಪಿಪಿಕೊಡಬೇಕೆಂಬ ಮಹತ್ವಾಕಾಂಕ್ಷೆಯನ್ನು ಇಟ್ಟುಕೊಂಡು ಓದಿ, ಐಪಿಎಸ್ ಪಾಸಾಗಿ ಸದ್ಯ ಶಿವಮೊಗ್ಗ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯಾಗಿರುವ ರವಿ ಡಿ. ಚನ್ನಣ್ಣನವರ್ ತಮ್ಮ ಕನಸನ್ನು ನನಸಾಗಿಸಿದ್ದಾರೆ ವಿಶಿಷ್ಟ ಮಾದರಿಯ ಶಾಲೆಯನ್ನು ಪೊಲಿಸ್ ಸಿಬ್ಬಂದಿಗಳ ಮಕ್ಕಳಿಗೆ ತೆರೆಯುವ ಮೂಲಕ.  ಇದು ಸಾಧಾರಣ ಶಾಲೆಯಲ್ಲ. ಓಪನ್ ಮೈಂಡ್ಸ್ ಶಾಲೆಯ ಸಹಕಾರದೊಂದಿಗೆ ಆರಂಭಿಸಲಾದ ಅದೇ ಮಾದರಿಯ ಶಾಲೆ. ಇಲ್ಲಿ ಪಠ್ಯ ಪುಸ್ತಕವಿಲ್ಲ. ಪ್ಲೇ ಹೋಂ ಮಾತ್ರ ಇದೆ. ಮಕ್ಕಳಿಗೆ ಕಲಿಸಲು ಯಾವ್ಯಾವ ಆಟಿಕೆ, ವಸ್ತುಗಳು ಬೇಕೋ ಅವುಗಳನ್ನು  ಇಟ್ಟು ಕಲಿಸಲಾಗುತ್ತಿದೆ.
ರಾಜ್ಯದಲ್ಲೆಲ್ಲೂ ಇಲ್ಲದ ಅತ್ಯಾಧುನಿಕ ಮಾದರಿಯ ಶಾಲೆ ಇದು. ಇದರ ಹೆಸರು ‘ಪೊಲೀಸ್ ಬಾಲಭವನ’. ಪೊಲೀಸ್ ಇಲಾಖೆ ವತಿಯಿಂದ ಸ್ಥಾಪಿಸಲಾದ ಅವರ ಸಿಬ್ಬಂದಿ ಮಕ್ಕಳಿಗೆ ಮೀಸಲಾದ ಶಾಲೆ ಇದು. ಶಿವಮೊಗ್ಗದ ಹೆಲಿಪ್ಯಾಡ್ ಪಕ್ಕದಲ್ಲಿರುವ ಹಳೆತುಂಗಾನಗರ ಪೊಲೀಸ್ ಠಾಣೆಯ ಕಟ್ಟಡದಲ್ಲಿ ಈ ಶಾಲೆ ಜೂನ್ 11ರಂದು ಉದ್ಘಾಟನೆಗೊಂಡಿದೆ. ಮಕ್ಕಳ ದಾಖಲಾತಿಯೂ ಆರಂಭವಾಗಿದೆ.
ಎಸ್‌ಪಿ ರವಿ ಚನ್ನಣ್ಣನವರ್ ಅವರ ಕನಸಿನ ಕೂಸು ಇದು. ತನ್ನ ಮಗುವನ್ನು ಓಪನ್ ಮೈಂಡ್ಸ್ ಶಾಲೆಗೆ ಸೇರಿಸಿದ್ದ ಎಸ್‌ಪಿ ಅವರಿಗೆ, ಇದೇ ಮಾದರಿಯ ಶಿಕ್ಷಣವನ್ನು ತಮ್ಮ ಇಲಾಖೆ ಸಿಬ್ಬಂದಿಗಳ ಮಕ್ಕಳಿಗೆ ಸಿಗುವಂತೆ ಏಕೆ ಮಾಡಬಾರದು ಎನ್ನುವ ಯೋಚನೆಯೊಂದಿಗೆ ಆರಂಭಿಸಿದ್ದಾರೆ. ಈ ಶಾಲೆ ಸ್ಥಾಪನೆಗಾಗಿ ಸತತ ಒಂದು ತಿಂಗಳ ಕಾಲ ಎಲ್ಲ ಸಿದ್ಧತೆ ಮಾಡಿ, ಸೂಕ್ತ ಶಿಕ್ಷಕಿ ಗುರುತಿಸಿ, ಬೇಕಾದ ಪೀಠೋಪಕರಣ ತಂದು, ಕಟ್ಟಡಕ್ಕೆ ಸುಣ್ಣ-ಬಣ್ಣ ಮಾಡಿಸಿ, ಎಲ್ಲ ಅಗತ್ಯ ಮೂಲಸೌಕರ್ಯಗಳನ್ನು ಒದಗಿಸಿದ್ದಾರೆ. ಇದಕ್ಕೆ ಓಪನ್ ಮೈಂಡ್ಸ್ ಶಾಲೆಯ ಮುಖ್ಯಸ್ಥ ಕಿರಣ್‌ಕುಮಾರ್ ಶೈಕ್ಷಣಿಕ ಸಹಕಾರ ನೀಡಿದ್ದಾರೆ.
  ಮೊದಲ ಆರು ವರ್ಷದಲ್ಲಿ ಮಗುವಿನ ವ್ಯಕ್ತಿತ್ವ ನಿರ್ಧಾರವಾಗುತ್ತದ ಎನ್ನುತ್ತಾರೆ ಮನೋವಿಜ್ಞಾನಿಗಳು. ಆದ್ದರಿಂದ ಈ ವೇಳೆ ಮಕ್ಕಳನ್ನು ಉತ್ತಮ ಶಾಲೆಗೆ ಸೇರಿಸುವುದು ಒಳ್ಳೆಯದು.
ಈ ಹಿಂದೆ ಅವಿಭಕ್ತ  ಕುಟುಂಬದಲ್ಲಿ ಇರುತ್ತಿದ್ದ ಮಕ್ಕಳು ಕುಟುಂಬದ ಒಳಗಡೆಯೇ ಅರಿವಿಲ್ಲದಂತೆ ಉತ್ತಮ ಸಂಸ್ಕಾರ ಮತ್ತು ವ್ಯಕ್ತಿತ್ವವನ್ನು ಪಡೆಯುತ್ತಿದ್ದರು. ಆದರೆ, ಇಂದು ಅವಿಭಕ್ತ ಕುಟುಂಬಗಳು ಮರೆಯಾಗುತ್ತಿವೆ. ತಂದೆ, ತಾಯಿ ಮತ್ತು ಮಗು ಪದ್ಧತಿ ಬೆಳೆದಿರುವುದರಿಂದ ಹಾಗೂ ನಗರ ಜೀವನಕ್ಕೆ ಮಾರುಹೋಗಿರುವುದರಿಂದ ಮಗುವನ್ನು ಮನೆಯಿಂದ ಹೊರಗಡೆ ಬಿಡುತ್ತಿಲ್ಲ. ಪರಿಸ್ಥಿತಿಯೂ ಸಹಾ ಅದೇ ರೀತಿ ಎದುರಾಗಿದೆ. ಮನೆಯೊಳಗಡೆಯೇ ಟಿವಿ, ಮೊಬೈಲ್ ಮೊದಲಾದ ಮಾಧ್ಯಮಗಳತ್ತ ಮಗು ಚಿತ್ತ ಹರಿಸಿ ಆಧುನಿಕತೆಯನ್ನು ರೂಪಿಸಿಕೊಳ್ಳುವಂತಾಗಿದೆ.
 ಈ ಶಾಲೆಯಲ್ಲಿ ಮಗುವನ್ನು ವಿವಿಧ ಕೌಶಲ್ಯಗಳ ಮೂಲಕ ಬೆಳೆಸಲಾಗುತ್ತದೆ. ಇದಕ್ಕಾಗಿ ವಿಶೇಷ ಆಟೋಪಕರಣಗಳಿವೆ. ಸೋಮವಾರದಿಂದ ಶುಕ್ರವಾರದವರೆಗೆ ಬೆಳಿಗ್ಗೆ 10ರಿಂದ ಮಧ್ಯಾಹ್ನ 1ರವರೆಗೆ ಮಾತ್ರ ತರಗತಿಗಳು ನಡೆಯುತ್ತವೆ. ಪ್ರತಿ ಶನಿವಾರ ಶಿಕ್ಷಕರೊಂದಿಗೆ ಓಪನ್ ಮೈಂಡ್ಸ್ ಶಾಲೆಯಲ್ಲಿ ಚರ್ಚೆ, ಮುಂದಿನ ವಾರ ಮಕ್ಕಳಿಗೆ ಕಲಿಸಬೇಕಾದ  ಕೌಶಲ್ಯಗಳ ತರಬೇತಿ ನೀಡಲಾಗುತ್ತದೆ. ಒಟ್ಟಿನಲ್ಲಿ, ಮಗುವಿನ ಸರ್ವತೋಮುಖ ಬೆಳವಣಿಗೆಗೆ ಇಲ್ಲಿ ಆದ್ಯತೆ.
ಇನ್ನೊಂದು ವಿಶೇಷತೆ ಎಂದರೆ, ಕಂಪ್ಯೂಟರ್ ಮೂಲಕ ಪ್ರತಿದಿನ ಮಕ್ಕಳ ಚಟುವಟಿಕೆ. ಬೆಳವಣಿಗೆಯನ್ನು, ಅಗತ್ಯವಿರುವ ಸಲಹೆಯನ್ನು ಸಾಫ್ಟ್‌ವೇರ್‌ಗೆ ಅಳವಡಿಸಲಾಗುತ್ತದೆ.
ಈ ಶಾಲೆಯಲ್ಲಿ ಯಾವುದೇ ರೀತಿಯ ತಾರತಮ್ಯವನ್ನು ಮಕ್ಕಳಲ್ಲಿ ಸೃಷ್ಠಿಸಲಾಗುವುದಿಲ್ಲ. ಸ್ಪರ್ಧಾತ್ಮಕ ಮನೋಭಾವವನ್ನು ಸೃಷ್ಟಿಸಲಾಗುತ್ತದೆ. ಮತ್ತು ಅವಕಾಶಗಳನ್ನು ಬಳಸಿಕೊಳ್ಳುವುದನ್ನು ಕಲಿಸಲಾಗುವುದು. ಅತ್ಯುನ್ನತ ಮಟ್ಟದಲ್ಲಿ ಮಗು ಬೆಳೆಯುವ ವಾತಾವರಣ ಕಲಿಸಲಾಗಿದೆ. ಮಗು ದೊಡ್ಡದಾದ ನಂತರ ಆತನಲ್ಲಿ ಹೊಸದಾಗಿ ಏನನ್ನಾದರೂ ಸೃಷ್ಟಿಸಲು (ಆವಿಷ್ಕಾರ) ಆಸಕ್ತಿ ಬರುವಂತಹ ಶಿಕ್ಷಣ ಇಲ್ಲಿದೆ.
ಮಕ್ಕಳ ಮನಸ್ಸನ್ನು ಅರ್ಥೈಸಿಕೊಂಡು ಅವರೊಂದಿಗೇ ಇದ್ದು ಕಲಿಸುವುದು, ಶಿಕ್ಷಕರ ಮೇಲೆ ಪೀತಿ, ಗೌರವ  ಇರುವಂತೆ ಮಾಡುವ ಮೂಲಕ  ಅವರಲ್ಲಿ ಕುತೂಹಲ ಸೃಷ್ಟಿಸುವ ಕೆಲಸ ಇಲ್ಲಿ ನಡೆಯಲಿದೆ. ಜ್ಞಾನವೇ ಪರಮಶಕ್ತಿ ಎನ್ನುವುದು ಶಾಲೆಯ ಮೂಲಮಂತ್ರವಾಗಿದೆ.    



 ಜಿಲ್ಲೆಯಲ್ಲಿ ಪೊಲೀಸ್ ಸಿಬ್ಬಂದಿಗಳ ಮಕ್ಕಳಿಗೆ ಶಾಲೆ ತೆರೆಯಬೇಕೆಂಬ ನನ್ನ  ಕನಸು ನನಸಾಗಿದೆ. 32 ಮಕ್ಕಳಿಗೆ ಅವಕಾಶವಿರುವ ಈ ಶಾಲೆಯಲ್ಲಿ ಯಾವ ಆಸ್ತಿ, ಅಂತಸ್ತಿನ ಬೇಧಬಾವ ಮಾಡದೇ ಕಲಿಸಲಾಗುವುದು. ಮಗು ತನ್ನಿಂದ ತಾನೇ ಬೆಳೆಯಲು ಏನು ಬೇಕೋ ಅದನ್ನು ಒದಗಿಸಲಾಗುವುದು. ಪೊಲೀಸ್ ಸಿಬ್ಬಂದಿಗಳ ಮಕ್ಕಳು ಮುಂದೆ ಅಧಿಕಾರಿಗಳಾಗಬೇಕು. ಸಮಾಜದಲ್ಲಿ ಉತ್ತಮ ಪ್ರಜೆಯಾಗಿ ಬೆಳೆಯಬೇಕೆಂಬ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ ಈ ಶಾಲೆಯನ್ನು ಆರಂಭಿಸಲಾಗಿದೆ. ಕಲಿಕೆಯ ವೇಳೆ ಮಕ್ಕಳಿಗೆ ಬೈಯುವುದು, ತಾರತಮ್ಯ ಮಾಡುವುದು, ಇನ್ನೊಬ್ಬರ ಜೊತೆ ಹೋಲಿಕೆ ಮಾಡುವುದು ಇಲ್ಲಿಲ್ಲ. ಸಿಸಿ ಕ್ಯಾಮರಾವನ್ನೂ ಸಹ ಸದ್ಯದಲ್ಲೇ ಅಳವಡಿಸಲಾಗುವುದು.
-ಜಿಲ್ಲಾ ಪೊಲೀಸ್ ವರಿಷ್ಠ ರವಿ ಡಿ. ಚನ್ನಣ್ಣನವರ್  
,,,,,,,,,,,,,,,,,,,,,,,,,,,,,,,,,,,,,,,

Friday, 10 June 2016



 ಕಾಂಗ್ರೆಸ್ ಮುಕ್ತ  ಎಂಬ ಧಿಮಾಕಿನ, ಅಹಂಕಾರದ ಮಾತು



ರಾಜಕಿಯದಲ್ಲಿ ಬಹುತೇಕ ನಾಯಕರು ತಿಳುವಳಿಕೆ ಇಲ್ಲದವರೇ ಆಗಿರುವುದು, ಅಂತಹವರನ್ನೇ ನಾವು ಆಯ್ಕೆ ಮಾಡಿ ಕಳುಹಿಸುತ್ತಿರುವುದು  ಅನಾಹುತಕಾರಿ ಹೇಳಿಕೆಗಳು ಬರಲು ಕಾರಣವಾಗಿದೆ. ಯಾವುದೋ ಬಲದಿಂದ ಅಥವಾ ಗಾಳಿಯಲ್ಲಿ, ಅಲೆಯಲ್ಲಿ ಗೆದ್ದು ಬಂದು ಸಿಂಹಾಸನಾಧೀಶ್ವರರಾದರೆ ಲಂಗುಲಗಾಮಿಲ್ಲದ ಮಾತುಗಳೇ ಬರುತ್ತವೆ. ನಮ್ಮ ಎಲ್ಲ ಪಕ್ಷದ ರಾಜಕಾರಣಿಗಳು ಸರಿಯಾಗಿ, ಅವಶ್ಯವಿರುವಷ್ಟೇ ಮಾತನಾಡುವುದನ್ನು ಕಲಿಯಬೇಕಿದೆ. ಇಲ್ಲವಾದರೆ ಅವರೇ ‘ಮುಕ್ತರಾಗುವ’ ದಿನವೂ ಎದುರಾಗಬಹುದು


ಇತ್ತೀಚೆಗೆ ಯಾವ ಪತ್ರಿಕೆ ಗಮನಿಸಿದರೂ ಕಾಂಗ್ರೆಸ್ ಮುಕ್ತ ಭಾರತ ಎನ್ನುವ ಬಗ್ಗೆ ಹೆಚ್ಚಿನ ಬರಹ ಪ್ರಕಟವಾಗುತ್ತಿದೆ. ಬಹುತೇಕ ವಿಮರ್ಶಕರು, ಪತ್ರಕರ್ತರು ಈ ಬಗ್ಗೆ ಬರೆದಿದ್ದಾರೆ, ಬರೆಯುತ್ತಿದ್ದಾರೆ. ವಿಶೇಷವಾಗಿ, ಕಳೆದ ತಿಂಗಳು ನಡೆದ ಐದು ರಾಜ್ಯಗಳ ವಿಧಾನಸಭೆ ಚುನಾವಣೆ ನಂತರ ಈ ವಿಷಯಕ್ಕೆ ಹೆಚ್ಚಿನ ಒತ್ತು ಕೊಟ್ಟಿರುವುದು ಕಂಡುಬರುತ್ತಿದೆ.
ನಮ್ಮದು ಪ್ರಜಾತಂತ್ರ ದೇಶ. ಅದನ್ನು ನಾವು ಒಪ್ಪಿಕೊಂಡಿದ್ದೇವೆ, ಅಪ್ಪಿಕೊಂಡಿದ್ದೇವೆ. ಇಂತಹ ದೇಶದಲ್ಲಿ ಆಳ್ವಿಕೆ ನಡೆಸಲು ಬಹುಮತ ಹೊಂದಿರುವ ಪಕ್ಷ ಎಷ್ಟು ಮುಖ್ಯವೋ ಅಷ್ಟೇ ಮುಖ್ಯ ಪ್ರಬಲವಾದ ಪ್ರತಿಪಕ್ಷ ಸಹ ಹೌದು. ಆದರೆ ಇದೇ ಬಹುಮತವೇ  ರಾಜಕಾರಣಿಗಳ ತಲೆತಿರುಗಿಸುತ್ತಿರುವುದೂ ದುರ್ದೈವೇ ಸರಿ. ಕೆಲವೊಮ್ಮ ಆಳ್ವಿಕೆ ನಡೆಸುವ ಪಕ್ಷ ತೀರಾ ಪ್ರಬಲವಾಗಿ ಪ್ರತಿಪಕ್ಷದ ಬಲಾಬಲ ಕುಗ್ಗಬಹುದು. ಜೊತೆಗೆ ರಾಜಕೀಯ ಪಕ್ಷಗಳಿಗ ಏಳು-ಬೀಳು ಸಹಜ. ಇದನ್ನೇ ದಾಳವಾಗಿಟ್ಟುಕೊಂಡು ಯಾವುದೇ ರಾಜಕೀಯ ಪಕ್ಷವಿರಲಿ, ಮತ್ತೊಂದು ಪಕ್ಷವನ್ನು ಮುಕ್ತವಾಗಿಸುತ್ತೇವೆ ಎನ್ನುವುದು ಸಲ್ಲದು. ಏಕೆಂದರೆ, ಪಕ್ಷವೊಂದನ್ನು ಮುಕ್ತವಾಗಿಸುವುದು ಮತ್ತೊಂದು ರಾಜಕೀಯ ಪಕ್ಷದ ಕೆಲಸವಲ್ಲ ಎನ್ನುವುದನ್ನು ಮೊದಲು ನೆನೆಪಿಡಬೇಕು.
 ಚುನಾವಣೆಯಲ್ಲಿ ಮತದಾರ ಕೊಡುವ ತೀರ್ಪನ್ನು ಎಲ್ಲರೂ ಒಪ್ಪಲೇಬೇಕು. ಒಮ್ಮೆ ಮೇಲೇರಿದವನು ಮತ್ತೆ ಕೆಳಗಿಳಿಯಲೇಬೇಕು ಎನ್ನುವುದು ಸೃಷ್ಟಿಯ ನಿಯಮ. ಸೂರ್ಯನೂ ಸಹ ಮೇಲೇರಿದಂತೆ ಚಿಕ್ಕವನಾಗುತ್ತಾನೆ. ಆದರೆ ಮಾರನೆ ದಿನ ಮತ್ತೆ ದೊಡ್ಡದಾಗಿ ಬರುತ್ತಾನೆ. ಇದನ್ನು ಎಲ್ಲರೂ ಅರ್ಥ ಮಾಡಿಕೊಳ್ಳಬೇಕು.
ಪ್ರಸ್ತುತ ಬಿಜೆಪಿ ಬಹುತೇಕ ರಾಜ್ಯಗಳಲ್ಲಿ ಅಧಿಕಾರದಲ್ಲಿದೆ. ಕಾಂಗ್ರೆಸ್ ಬೆರಳೆಣಿಕೆಯಷ್ಟು ರಾಜ್ಯದಲ್ಲಿ ಉಳಿದುಕೊಂಡಿದೆ. 131 ವರ್ಷಗಳ ಇತಿಹಾಸ ಹೊಂದಿರುವ ಪಕ್ಷವನ್ನು ಮುಕ್ತಗೊಳಿಸಬೇಕೊ ಬಿಡಬೇಕೋ ಎನ್ನುವುದನ್ನು ಮತದಾರ ನಿರ್ಧರಿಸಬೇಕೇ ವಿನಾ ಮತ್ತೊಂದು ಪಕ್ಷವಲ್ಲ. ಭ್ರಷ್ಟಾಚಾರ, ಹಗರಣ ಮಾಡಿಕೊಂಡವರು ಅದಕ್ಕೆ ತಕ್ಕ ಪ್ರತಿಫಲ ಅನುಭವಿಸುತ್ತಾರೆ. ಅದಕ್ಕೇ ಹೇಳುವುದು, ಮತದಾರ ತಕ್ಕ ಶಿಕ್ಷೆ ಕೊಡುತ್ತಾನೆ ಎಂದು. ಆದರೆ ಉಳಿದ ಪಕ್ಷಗಳು ಮತ್ತು ಅದರ ನಾಯಕರು ಪ್ರತಿಪಕ್ಷವನ್ನು ಮುಕ್ತಗೊಳಿಸುತ್ತೇವೆ ಎಂದರೆ ಅದು ಅಹಂಕಾರದ ಮಾತಾಗುತ್ತದೆ. ಯಾವುದೇ ಪಕ್ಷ ಸ್ವಯಂಕೃತ ಅಪರಾಧದಿಂದ,  ಎಡವಟ್ಟಿನಿಂದ ಸೋತರೆ ಮೂಲೆಗುಂಪಾದರೆ  ಯಾರೂ ಪಶ್ಚಾತ್ತಾಪಡಬೇಕಿಲ್ಲ. ಅಥವಾ ಗೆದ್ದ ಪಕ್ಷ ಬೀಗಬೇಕಾದ ಅವಶ್ಯಕತೆಯೂ ಇಲ್ಲ.
ರಾಜಕೀಯ ನಾಯಕರಿಗೆ ಅಧಿಕಾರ ಮತ್ತು ಪಟ್ಟ ಎರಡೂ ದೊರಕಿದ ಮೇಲೆ ಅದರ ಅಮಲೇರುತ್ತದೆ ಎನ್ನುವುದು ಒಂದು ಪ್ರಚಲಿತ ಮಾತು. ಈ ಅಮಲು ಏರದಂತೆ ನೋಡಿಕೊಳ್ಳುವುದು ಅಧಿಕಾರಸ್ಥರ ಕೆಲಸವಾಗಬೇಕು. ಒಂದು ವೇಳೆೆ ಅಮಲೇರಿದರೆ ಅದರಿಂದಲೇ ಅವರ ನಾಶವಾಗುತ್ತದೆ. ಇದಕ್ಕೆ ನಾವು ಕೆಲವು ವಿಧಾನಸಭೆ, ಲೋಕಸಭೆ  ಚುನಾವಣೆಗಳನ್ನೇ ಉದಾಹರಣೆಯನ್ನಾಗಿ ತೆಗೆದುಕೊಳ್ಳಬಹುದು. ಅಧಿಕಾರ ಸಿಕ್ಕಾಕ್ಷಣ ಮಾಡಬಾರದ್ದನ್ನೆಲ್ಲ  ಮಾಡಿದರೆ ಆಗಬಾರದ್ದೆಲ್ಲ ಆಗುತ್ತದೆ ಎನ್ನುವುದಕ್ಕೆ ಕರ್ನಾಟಕದಲ್ಲಿ ಬಿಜೆಪಿ ಮತ್ತು ಕೇಂದ್ರದಲ್ಲಿ ಯುಪಿಎಯ ಉದಾಹರಣೆ ನಮ್ಮ ಕಣ್ಮುಂದೆ ಇದೆ.
ಅಧಿಕಾರ ಯಾವತ್ತ್ತೂ ಶಾಶ್ವತವಲ್ಲ ಎಂದು ಪದೇ ಪದೇ ಹೇಳುವವರೇ ಮುಕ್ತ, ಮುಕ್ತ ಎನ್ನುತ್ತಿರುವುದು ವಿಚಿತ್ರವೆನಿಸುತ್ತದೆ. ಒಂದು ಪಕ್ಷ ಹತ್ತಾರು ವರ್ಷ ಆಳಬಹುದು, ಮತ್ತೊಂದು ಪಕ್ಷ ನಾಲ್ಕೇ ವರ್ಷಕ್ಕೆ ಕೆಳಗಿಳಿಯಬಹುದು. ಅದು ಅವರವರು ನಡೆಸುವ ಅಧಿಕಾರದ ಒಳಿತು- ಕೆಡಕುಗಳ ಮೇಲೆ ನಿರ್ಧರಿತವಾಗುತ್ತದೆ. ಹಾಗಂತ ಪರಾಜಿತ ಪಕ್ಷ ಕಡಿಮೆ ಸ್ಥಾನ ಪಡೆದುಕೊಂಡಿದೆ ಎಂದು ಅದನ್ನು ಮುಕ್ತ ಮಾಡುತ್ತೇವೆ ಎನ್ನುವುದು ಧಿಮಾಕಿನ ಮಾತಾಗುತ್ತದೆ. ಪಕ್ಷವನ್ನು ಮೇಲೇರಿಸುವುದು, ಕೆಳಗಿಳಿಸುವುದು ಮತದಾರರ ಕೆಲಸವೇ ವಿನಾ ಬೇರೆಯಾರದ್ದ್ದೂ ಅಲ್ಲ. ಇನ್ನೊಂದು ಪಕ್ಷವನ್ನು ಮುಕ್ತ ಮಾಡುವುದಕ್ಕಿಂತ ತಾವು ಹೇಗೆ ಇನ್ನಷ್ಟು ಬಲಶಾಲಿಯಾಗಬೇಕು ಎಂದಷ್ಟೇ ಯೋಚಿಸಬೇಕು, ಪ್ರತಿ ಪಕ್ಷದಲ್ಲೂ ಒಳ್ಳೆಯ ವಿಚಾರ, ಉತ್ತಮ ನಾಯಕರು, ಸಂಘಟನಾ ಚತುರರು, ಮುಂದಿನ ರೂಪುರೇಶೆ ತಯಾರಿಸುವ ಚಿಂತಕರು ಇದ್ದೇ ಇರುತ್ತಾರೆ. ಅದರಂತೆ ಕೆಟ್ಟವರೂ ಇರುತ್ತಾರೆ. ಅದನ್ನೆಲ್ಲ ಆಯಾಯ ಪಕ್ಷದ ವಿಚಾರ ಎಂದಷ್ಟೇ ಗಮನಿಸಬೇಕು. ಸೋತ ಪಕ್ಷದ ವಿಷಯದ ಬಗ್ಗೆ ಮಾತನಾಡುವುದು, ಹಿಯಾಳಿಸುವುದು ಕ್ಷುಲ್ಲಕ ರಾಜಕಾರಣವೆನಿಸುತ್ತದೆ.
ಯಾವತ್ತೂ ಒಂದಿಲ್ಲೊಂದು ಚಟುವಟಿಕೆಯಲ್ಲಿರುವವನಿಗೆ ಇನ್ನೊಬ್ಬರ ಬಗ್ಗೆ ಚಿಂತಿಸಲು ವೇಳೆ ಇರುವುದಿಲ್ಲ. ಆದರೆ ನಮ್ಮ ರಾಜಕಾರಣಿಗಳಿಗೆ ಇನ್ನೊಬ್ಬರ ಕಾಲೆಳೆಯುವುದು ಹೇಗೆ ಎನ್ನುವುದರ ಬಗ್ಗೆಯೇ ಸದಾ ಚಿಂತೆ. ಇದು ಈ ದೇಶದ ದುರಂತ. ಸಿಕ್ಕ ಅವಕಾಶವನ್ನು ಹೇಗೆ ಸಮರ್ಥವಾಗಿ ಬಳಸಿಕೊಂಡು ಉತ್ತಮ, ಆಳ್ವಿಕೆಯನ್ನು ಕೊಡಬಹುದು, ಜನರಿಗೆ ಉತ್ತಮವಾದದ್ದೇನನ್ನು ಮಾಡಬಹುದು ಎನ್ನುವುದನ್ನಷ್ಟೇ ಉತ್ತಮ ರಾಜಕಾರಣಿ ಯೋಚಿಸುತ್ತಾನೆ. ಕೆಲಸವಿಲ್ಲದವರು ಪಾಪ, ಇನ್ನೇನು ಮಾಡಿಯಾರು, ಇನ್ನೊಬ್ಬರನ್ನು ಹಳಿಯುತ್ತ ಕಾಲಕಳೆಯಬೇಕಾಗುತ್ತದೆ. ಮಾತನಾಡುವ ಮುನ್ನ ಚಿಂತನೆ ಇರಬೇಕು, ಅದು ತೂಕದ್ದಾಗಿರಬೇಕು. ಅದನ್ನು ನಾಲ್ಕಾರು ಜನ ಮೆಚ್ಚಿ ಅಹುದಹುದೆನ್ನಬೇಕು. ತಾನಾಡುವ ಒಂದು ಮಾತು ಇಡೀ ಪಕ್ಷದ ವರ್ಚಸ್ಸನ್ನು ಹಾಳು ಮಾಡಬಹುದು, ಅದರ ಬಗ್ಗೆ ಕೆಟ್ಟ ಅಭಿಪ್ರಾಯ ಮೂಡುವಂತೆ ಮಾಡಬಹುದು ಎನ್ನುವ ಪರಿಜ್ಞಾನವೂ ಇಲ್ಲದಿರುವುದು ವಿಷಾದವೇ ಸರಿ.


 

Thursday, 9 June 2016

ದಿಟ್ಟ ಅಧಿಕಾರಿಣಿ ಈ ರೀತಿ ವರ್ತಿಸುತ್ತಿರುವುದೇಕೇ?


ಸಚಿವ ಪರಮೇಶ್ವರ್ ನಾಯ್ಕ  ಅನುಪಮಾ ರಾಜಿನಾಮೆಗೂ ತಮಗೂ ಸಂಬಂಧವಿಲ್ಲ ಎಂದಿದ್ದಾರೆ. ಅನುಪಮಾ ಅವರ ವರ್ಗಾವಣೆ ಪ್ರಕರಣದ ನಂತರ ಎಲ್ಲೂ ಸಚಿವರ ಹೆಸರು ಈ ವಿಚಾರದಲ್ಲಿ ಕೇಳಿಬಂದಿಲ್ಲ. ಕೆಲಸ ಮಾಡಲು ಕೂಡ್ಲಿಗಿಯಲ್ಲಿ ತಮಗೆ ಸಾಧ್ಯವಿಲ್ಲ ಎಂದಾದಲ್ಲಿ ಹಿರಿಯ ಅಧಿಕಾರಿಗಳಿಗೆ ಮನದಟ್ಟು ಮಾಡಿ ಬೇರೆಡೆಗೆ ವರ್ಗಾಯಿಸಿಕೊಳ್ಳಬಹುದಿತ್ತು.  
 ಈ ಪ್ರಕರಣದಲ್ಲಿ ಸಚಿವರ ತಪ್ಪಿದ್ದರೆ ಸರಕಾರ ಅದನ್ನು ಗಂಭೀರವಾಗಿ ಪರಿಗಣಿಸಿ ಅವರ ರಾಜಿನಾಮೆ ಪಡೆಯಬೇಕು ಅಥವಾ ವಜಾ ಮಾಡಬೇಕು. ಅನುಪಮಾ ಅವರಿಗೆ ಅನ್ಯಾಯವಾಗಿದ್ದರೆ ನ್ಯಾಯ ಕೊಡಿಸಬೇಕು. ಆದರೆ, ಅನಗತ್ಯವಾಗಿ ರಾಜ್ಯದಾದ್ಯಂತ, ರಾಷ್ಟ್ರದಾದ್ಯಂತ ಹಬ್ಬಿಸುವುದು ಸರಿಯಲ್ಲ. ಜನರೂ ಸಹ ಜಾತಿ-ಮತ ಬಿಟ್ಟು ವಿವೇಕಯುತವಾಗಿ ಯೋಚಿಸಬೇಕು.  ಒಂದು ವೇಳೆ ಸಚಿವರದ್ದೇ ತಪ್ಪಿದೆ ಎಂದಾದಲ್ಲಿ ಅವರ ವಿರುದ್ದ  ಹೋರಾಡಲ 


ಅನುಪಮಾ ಶೆಣೈ ದಿಟ್ಟ ಮಹಿಳಾ ಪೊಲೀಸ್ ಅಧಿಕಾರಿಯಾಗಿದ್ದುಕೊಂಡು ಹೆಸರಾದವರು. ಬಳ್ಳಾರಿ ಜಿಲ್ಲೆ ಕೂಡ್ಲಿಗಿ ಉಪವಿಭಾಗದಲ್ಲಿ ಡಿವೈಎಸ್‌ಪಿಯಾಗಿ, ಅಲ್ಲಿನ ಲಿಕ್ಕರ್ ಲಾಬಿಯನ್ನು ಮಟ್ಟಹಾಕಲು ಯತ್ನಿಸಿದವರು. ಈ ದೇಶದಲ್ಲಿ ಅತಿ ಬಲಿಷ್ಠ ಮಾಫಿಯಾ ಅಗಿರುವ ಲಿಕ್ಕರ್ ಲಾಬಿ ಎಂದಿಗೂ, ಯಾರಿಗೂ ಮಣಿಯುವುದಿಲ್ಲ. ಇಲ್ಲಿ ಆಗಿದ್ದು ಅದೇ. ಪರಿಣಾಮವಾಗಿ, ಅನುಪಮಾ ಬೇಸತ್ತು ರಾಜಿನಾಮೆ ಕೊಟ್ಟು, ಅಜ್ಞಾತ ಸ್ಥಳದಿಂದ ಫೇಸ್‌ಬುಕ್ ಮೂಲಕ ಮಾತನಾಡುತ್ತಿದ್ದಾರೆ.  ಸ್ವತಃ ಸಿಎಂ ಸಿದ್ದರಾಮಯ್ಯ ಈ ರಾಜಿನಾಮೆ ಅಂಗೀಕರಿಸದಂತೆ ಗೃಹ ಇಲಾಖೆಗೆ ಸೂಚಿಸಿದ್ದಾರೆ.
 ಮೂರ್ನಾಲ್ಕು ತಿಂಗಳ ಹಿಂದೆ ಬಳ್ಳಾರಿ ಉಸ್ತುವಾರಿ ಸಚಿವ ಪಿ.ಟಿ.ಪರಮೇಶ್ವರ ನಾಯ್ಕ್ ಅವರ ಮೊಬೈಲ್ ಕರೆಯನ್ನು ಸ್ವೀಕರಿಸದೇ ಇದ್ದ ಕಾರಣಕ್ಕೆ ಅವರನ್ನು ಎತ್ತಂಗಡಿ ಮಾಡಲಾಗಿತ್ತು. ಇದೂ ಸಹ ಒಂದಷ್ಟು ದಿನ ರಾದ್ಧಾಂತಕ್ಕೆ ಕಾರಣವಾಯಿತು. ನಂತರ ಮತ್ತೆ ಕೂಡ್ಲಿಗಿಯಲ್ಲೇ ಅವರನ್ನು ಮುಂದುವರೆಸಲಾಯಿತು. ಈಗ ಅನುಪಮಾ ಮತ್ತೆ ಪರಮೇಶ್ವರ್ ನಾಯ್ಕ ವಿರುದ್ದ ತಿರುಗಿಬಿದ್ದಿದ್ದಾರೆ. ಫೇಸ್‌ಬುಕ್‌ನಲ್ಲಿ ಅವರ ವಿರುದ್ದ ಹರಿಹಾಯುತ್ತಿದ್ದಾರೆ.
ಅನುಪಮಾ ವೈಯಕ್ತಿಕ ಕಾರಣಕ್ಕೆ ರಾಜಿನಾಮೆ ಸಲ್ಲಿಸುತ್ತಿರುವುದಾಗಿ ಪತ್ರ ಬರೆದಿರುವುದು ಮಾಧ್ಯಮದ ಮೂಲಕ ಬೆಳಕಿಗೆ ಬಂದಿದೆ. ವೈಯಕ್ತಿಕ ಎಂಬ ಪದದ ಅರ್ಥವೇ ಗೊತ್ತಿಲ್ಲದಂತೆ ಈಗ ಅವರು ವರ್ತಿಸುತ್ತಿರುವುದೂ ಸಹ ವಿಚಿತ್ರವೆನಿಸುತ್ತಿದೆ. ಎಷ್ಟೇ ಒಳ್ಳೆಯ ಅಧಿಕಾರಿಯಾದರೂ  ತಮ್ಮ ಇತಿಮಿತಿಯಲ್ಲೇ ವರ್ತಿಸಬೇಕು.  ರಮ್ ರಾಜ್ಯ ಎನ್ನುವ ಮೂಲಕ ಸರ್ಕಾರದ ವಿರುದ್ದವೇ ತಿರುಗಿಬಿದ್ದಂತಿದೆ. ಸರ್ಕಾರಿ ಅಧಿಕಾರಿಗೆ ಸೇವಾ ನಿಯಮಾವಳಿಗಳ ಶರತ್ತಿರುತ್ತದೆ. ಎಲ್ಲರಂತೆ ಅನಿಸಿಕೆ ಹಂಚಿಕೊಳ್ಳು, ಟೀಕಿಸಲು ಸಾಧ್ಯವಿಲ್ಲ. ಇದನ್ನು ಉಲ್ಲಂಘಿಸುವ ಮೂಲಕ ಕರ್ತವ್ಯಚ್ಯುತಿ ಎಸಗುತ್ತಿದ್ದಾರೆ. ಇದೆಲ್ಲ ಗೊತ್ತಿದ್ದೂ ರಾಜ್ಯದಲ್ಲಿ ರಾದ್ಧಾಂತವನ್ನಾಗಿಸಿ ಅನೇಕ ಜನರ ಬೆಂಬಲವನ್ನು ಅವರು ಪಡೆಯುತ್ತಿದ್ದಾರೆ. ಜೊತೆಗೆ  ರಾಜೀನಾಮೆ ಕೊಟ್ಟ ನಂತರ  ಈ ವಿಷಯಕ್ಕೆ ಅಲ್ಲಿಗೆ ಪೂರ್ಣವಿರಾಮ ಬಿದ್ದಂತೆ. ಆದರೆ, ರಾಜೀನಾಮೆ ನಂತರವೇ ಈಗ ವಿವಾದ ಭುಗಿಲೆದ್ದಿದೆ.
ರಾಜೀನಾಮೆಯಲ್ಲಿ ಸಚಿವರ ಹೆಸರನ್ನೇನೂ ಅವರು ಉಲ್ಲೇಖಿಸಿಲ್ಲ. ಹೀಗಿರುವಾಗ ಅನಗತ್ಯವಾಗಿ ತಮ್ಮ ಘನತೆಗೇ ಅವರು ಮಸಿ ಬಳಿದುಕೊಳ್ಳುತ್ತಿದ್ದಾರೆ ಎನ್ನಬಹುದು. ರಾಜಿನಾಮೆ ಪ್ರಕರಣದ ನಂತರ ಸಚಿವರು ಮಾನಸಿಕವಾಗಿ ಕಿರುಕುಳ ಕೊಡುತ್ತಿದ್ದಾರೆ. ಪೊಲೀಸ್ ಇಲಾಖೆಯ ತಮ್ಮ ಕೆಳಹಂತದ ಅಧಿಕಾರಿ ಮತ್ತು  ಸಿಬ್ಬಂದಿಗಳ ಮೂಲಕವೂ ಕಿರುಕುಳ ಕೊಡುತ್ತಿದ್ದಾರೆಂದು ಆರೋಪಿಸಿದ್ದಾರೆ. ಸಚಿವರ ರಾಸಲೀಲೆ ಬಯಲು ಮಾಡುತ್ತೇನೆ, ಸಿ.ಡಿ. ಬಿಡುಗಡೆ ಮಾಡುತ್ತೇನೆ ಎಂದೆಲ್ಲ ಪ್ರಲಾಪಿಸುತ್ತಿರುವುದು ಹಾಸ್ಯಾಸ್ಪದ ಎನಿಸುತ್ತಿದೆ.  ಯಾವುದೇ ಇಲಾಖೆಯ ಅಧಿಕಾರಿ ಇರಲಿ, ರಾಜಕೀಯ ಒತ್ತಡ ಇದ್ದೇ ಇರುತ್ತದೆ. ಅದು ಎಲ್ಲರಿಗೂ ತಿಳಿದ ಸತ್ಯ.  ಇದು ಕೇವಲ ಅನುಪಮಾ ಅವರಿಗೆ ಮಾತ್ರ ಎದುರಾದ ಒತ್ತಡವಲ್ಲ. ಇದನ್ನು ಸಮಾಧಾನ ಚಿತ್ತದಿಂದ ತೆಗೆದುಕೊಳ್ಳುವ ಮೂಲಕ ಪರಿಹರಿಸಿಕೊಳ್ಳಬೇಕೇ ವಿನಾ ವಿವಾದ ಎಬ್ಬಿಸುವುದರ ಮೂಲಕವಲ್ಲ. ಪ್ರಾಮಾಣಿಕ ಅಧಿಕಾರಿಯಾದ ಅನುಪಮಾ ಈ ರೀತಿ ವರ್ತಿಸುತ್ತಿರುವುದೇಕೆ ಎನ್ನುವುದೇ ಯಾರಿಗೂ ಅರ್ಥವಾಗುತ್ತಿಲ್ಲ. ರಾಜೀನಾಮೆ ಕೊಟ್ಟ ನಂತರ ತಮ್ಮ ಮುಂದಿನ ದಾರಿಯನ್ನು ನೋಡಿಕೊಳ್ಳಬೇಕೇ ವಿನಾ ಅನಗತ್ಯ ವಿವಾದ ಸೃಷ್ಟಿಸುವುದು ಯಾರಿಗೂ ಶೋಭೆ ತರದು.
ಪರಿಣಾಮವಾಗಿ ಇದಕ್ಕಾಗಿಯೇ ಕಾದು ಕುಳಿತ ರಾಜಕೀಯ ನಾಯಕರು ತಮ್ಮ ಬೇಳೆ ಬೇಯಿಸಿಕೊಳ್ಳಲು ಮುಂದಾಗಿದ್ದಾರೆ. ಸತ್ಯಾಸತ್ಯತೆಯನ್ನರಿಯದ ಫೇಸ್‌ಬುಕ್ ಪ್ರಿಯರು ಲೈಕ್ ಬಟನ್ ಒತ್ತುತ್ತ, ಕಮೆಂಟ್ಸ್ ಬರೆಯುತ್ತಿದ್ದಾರೆ. ಹಿರಿಯ ಪೊಲೀಸ್ ಅಧಿಕಾರಿಗಳು ಅನುಪಮಾ ಮನವೊಲಿಕೆಗೆ ಯತ್ನ ನಡೆಸಲು ಸಿದ್ಧವಾಗಿದ್ದಾರೆ. ಈ ಮಧ್ಯೆ ಅವರ ಸಮಾಜದವರೂ ಸಹ ಅನುಪಮಾಗೆ ಅನ್ಯಾಯವಾಗಿದೆ ಎಂದು ಮುಖ್ಯಮಂತ್ರಿಗೆ ಮನವಿ ಸಲ್ಲಿಸಿದ್ದಾರೆ. ಅನುಪಮಾ ಕೇಸಿಗೂ ಅವರ ಜಾತಿಗೂ ಏನು ಸಂಬಂಧವೋ ಗೊತ್ತಿಲ್ಲ. ಅನುಪಮಾ ಎಂದೂ ತಮ್ಮ ಕರ್ತವ್ಯದಲ್ಲಿ ಜಾತಿಯನ್ನು ತಂದಿಲ್ಲ, ಅಧಿಕಾರಿ ಅಥವಾ ನೌಕರ ಯಾವ ಮತ-ಧರ್ಮ- ಜಾತಿ- ಪಕ್ಷವನ್ನೂ ನೋಡದೆ ಸಮಾನತೆಯಿಂದ ಕೆಲಸ ಮಾಡುತ್ತಾನೆ. ಮೆಚ್ಚುಗೆ ಗಳಿಸುತ್ತಾನೆ. ಅನುಪಮಾ ಸಹ ಇದನ್ನೇ ಮಾಡಿದ್ದಾರೆ. ಹೀಗಿರುವಾಗ ಜಾತಿಯತೆ ತರುವ ಮೂಲಕ ಇನ್ನಷ್ಟು ದಿನ ಈ ವಿಚಾರವನ್ನು ಜೀವಂತವಾಗಿಡಲು ಕೆಲವರು ಯತ್ನಿಸುತ್ತಿರುವುದು ನಿಜಕ್ಕ್ಕೂ ವಿಷಾದನೀಯ. ಐಎಎಸ್ ಅಧಿಕಾರಿಯಾಗಿದ್ದ ಡಿ. ಕೆ. ರವಿ ಆತ್ಮಹತ್ಯೆ ಪ್ರಕರಣದಲ್ಲೂ ಇದೇ ರೀತಿ ಜಾತೀಯತೆ ನುಸುಳಿ ಬಂದಿದ್ದನ್ನು ಇಲ್ಲಿ ಸ್ಮರಿಸಬಹುದು.
 ಎಷ್ಟೇ ಸವಾಲೆದುರಾದರೂ ಅದನ್ನು ಎದುರಿಸುವ ತಾಕತ್ತು ತೋರಬೇಕು. ಕಿರಣ್ ಬೇಡಿ, ಸೋನಿಯಾ ನಾರಂಗ್ ಸಹ ಇದನ್ನೆಲ್ಲ ಎದುರಿಸಿಯೇ ಖ್ಯಾತಿ ಗಳಿಸಿದವರು. ರಾಜಿನಾಮೆ ನೀಡಿ ಎಲ್ಲೋ ಕುಳಿತು ಮಾತನಾಡಿದರೆ, ‘ಕೊಟ್ಟ ಕುದುರೆಯನೇರಲರಿಯದವ ವೀರನೂ ಅಲ್ಲ, ಧೀರನೂ ಅಲ್ಲ’ ಎಂಬ ಮಾತು ಜನರ ಬಾಯಲ್ಲಿ ಬರುತ್ತದೆ.



Wednesday, 8 June 2016

  ರಘುರಾಮ್ ರಾಜನ್ ಆರ್‌ಬಿಐನಲ್ಲೇ ಮುಂದುವರೆಯುವರೇ?





 
ಜಾಗತಿಕ ಮಟ್ಟದಲ್ಲಿ ಅತ್ಯುತ್ತಮ ಗವರ್ನರ್ ಎಂಬ ಪ್ರಶಂಸೆಗೆ ಪಾತ್ರರಾಗಿರುವ ರಘುರಾಮ್ ರಾಜನ್,  2013ರಲ್ಲಿ ಆರ್‌ಬಿಐ ಗವರ್ನರ್ ಆಗಿ ನೇಮಕಗೊಳ್ಳುವ ಮುನ್ನ 2012ರಲ್ಲಿ ಕೇಂದ್ರದ ಮುಖ್ಯ ಆರ್ಥಿಕ ಸಲಹೆಗಾರರಾಗಿದ್ದರು. 2003ರಿಂದ 2007ರವರೆಗೆ ಐಎಂಎಫ್‌ನ  ಮುಖ್ಯ ಆರ್ಥಿಕ ತಜ್ಞರಾಗಿದ್ದರು. ಶಿಕಾಗೊ ವಿವಿಯಿಂದ  ಪಿಎಚ್‌ಡಿ ಪಡೆದಿರುವ ಭೋಪಾಲ್ ಮೂಲದ  ತಮಿಳು ಬ್ರಾಹ್ಮಣ  ರಾಜನ್, ಪ್ರಖರ ವಿದ್ವತ್‌ಗೆ, ವಿಶಿಷ್ಟ ವ್ಯಕ್ತಿತ್ವಕ್ಕೆ ಹೆಸರಾದವರು.  ಪ್ರಧಾನಿ ನರೇಂದ್ರ ಮೋದಿ ಅವರ ಸಂಪುಟದ ಮತ್ತು ಪಕ್ಷದ ಕೆಲವು ರಾಜಕಾರಣಿಗಳು ರಾಜನ್ ಬಗ್ಗೆ ಸಹಮತ ಹೊಂದಿಲ್ಲ. ಅವರನ್ನು ಮರಳಿ ಶಿಕಾಗೊಗೆ ಕಳುಹಿಸಲು ಹಠಕ್ಕೆ ಬಿದ್ದವರಂತೆ ವರ್ತಿಸುತ್ತಿದ್ದಾರೆ. ಬಿಜೆಪಿ ಸಾಂಸದ ಸುಬ್ರಮಣಿಯಂ ಸ್ವಾಮಿ ರಾಜನ್ ಅವರನ್ನು ವಜಾ ಮಾಡಬೇಕೆಂಬ ಆಗ್ರಹ ಮಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು


ಕೆಲವು ದಿನಗಳಿಂದ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ)ನ ಗವರ್ನರ್  ರಘುರಾಮ್ ರಾಜನ್ ಹೆಸರು ಪದೇ ಪದೆ ಚರ್ಚೆಗೀಡಾಗುತ್ತಿದೆ. ಮತ್ತೆ ಅವರು ಆರ್‌ಬಿಐ ಗವರ್ನರ್ ಆಗಿ ಮುಂದುವರೆಯುವರೇ, ಕೇಂದ್ರ ಸರಕಾರ ಅವರನ್ನು ಮುಂದುವರೆಸುವುದೇ ಮುಂತಾದ ಪ್ರಶ್ನೆಗಳು ಕೇಳಿಬರುತ್ತಿವೆ.
ರಾಜನ್  ಬಗ್ಗೆ ಒಳ್ಳೆಯ ಮಾತುಗಳೇ ಹೆಚ್ಚು ಕೇಳಿಬರುತ್ತಿವೆ. ಕೆಲವು  ಪ್ರಮಾಣದಲ್ಲಿ ಅಪಸ್ವರವೂ ಇದೆ. ಆದರೆ, ಭಾರತದ ಆರ್ಥಿಕ ವ್ಯವಸ್ಥೆ ಇಷ್ಟೊಂದು ವೇಗವಾಗಿ  ಬೆಳೆಯಲು ಅವರ ಸಮಯೋಚಿತ ನಿರ್ಧಾರ ಮತ್ತು ದೂರದೃಷ್ಟಿಯೇ ಕಾರಣ ಎನ್ನುವುದನ್ನು ವಿಶ್ವದ ಹಲವು ದೇಶಗಳ ಅರ್ಥಶಾಸ್ತ್ರಜ್ಞರು ಹೇಳಿದ್ದಾರೆ. ನಿನ್ನೆಯಷ್ಟೇ ಆರ್‌ಬಿಐ ನ ದ್ವೈಮಾಸಿಕ ಹಣಕಾಸು ನೀತಿ ಪ್ರಕಟಿಸಿ, ಅದರಲ್ಲಿ ಬ್ಯಾಂಕ್ ಬಡ್ಡಿದರವನ್ನು ಯಥಾಸ್ಥಿಯತಿಯಲ್ಲಿ ಮುಂದುವರೆಯುವಂತೆ ಮಾಡಿದ್ದಾರೆ.
ರಾಜನ್ ಅವರ ಮೂರು ವರ್ಷಗಳ ಸೇವಾವಧಿ ಸೆಪ್ಟೆಂಬರ್ 4ಕ್ಕೆ ಅಂತ್ಯವಾಗಲಿದೆ. ಅವರ ಮುಂದುವರಿಕೆ ವಿಚಾರದ ಚರ್ಚೆಗೆ ಕಾರಣವಾದ ಅಂಶವೆಂದರೆ, ರಾಜನ್ ತೆಗೆದುಕೊಂಡ ಕೆಲವು ನಿರ್ಧಾರಗಳು. ಹಣದುಬ್ಬರ ಮತ್ತು ಆರ್ಥಿಕ ಸ್ಥಿರತೆ ಕಾಪಾಡಿಕೊಳ್ಳುವಲ್ಲಿ ರಾಜನ್ ವಹಿಸಿದ್ದ ಪಾತ್ರ ಮಹತ್ತರವಾದದ್ದು. ದೇಶದ ಅರ್ಥ ವ್ಯವಸ್ಥೆ ಯನ್ನು ಸರಿದಾರಿಗೆ ತರಲು  ದಿಟ್ಟ ನಿರ್ಧಾರ ಕೈಗೊಳ್ಳುತ್ತಿರುವ  ರಾಜನ್ ಅವರ ಅನುಭವ ಮತ್ತು ದಾಖಲೆಯ ಸಾಧನೆಗಳು ಇಡೀ ವಿಶ್ವದ ಹೂಡಿಕೆ ಅದರಲ್ಲೂ ಪ್ರಶಂಸೆಗೆ ಒಳಗಾಗಿದೆ. ಒಂದು ವೇಳೆ ಅವರೇನಾದರೂ ಆರ್‌ಬಿಐ ತ್ಯಜಿಸಿದರೆ, ಭಾರತೀಯ ಶೇರು ಮಾರುಕಟ್ಟೆಯ ಮೇಲೆ ತಕ್ಷಣದ ಪರಿಣಾಮ ಬೀರಲಿದೆ  ಮತ್ತು ಕರೆನ್ಸಿ ಇನ್ನಷ್ಟು ದುರ್ಬಲವಾಗಲಿದೆ ಎನ್ನುತ್ತಾರೆ ಅಲೈಯಂಜಾ ಎಸ್‌ಇ ಕಂಪನಿಯ ಸಲಹೆಗಾರ ಎ. ಮೊಹಮದ್.
ಈಗ ರಾಜನ್ ಅವರನ್ನು ಮುಂದುವರೆಸಬೇಕೆಂದು ಚಳವಳಿಯೇ ಆರಂಭವಾಗಿದೆ. ಆನ್‌ಲೈನ್‌ನಲ್ಲಿ ಈ ಬಗ್ಗೆ ನಡೆದ ಸಹಿ ಸಂಗ್ರಹಣೆಯಲ್ಲಿ ಸುಮಾರು 60 ಸಾವಿರ ಜನ ರಾಜನ್ ಪರ ಸಹಿ ಹಾಕಿದ್ದಾರೆ. ದಿನಪತ್ರಿಕೆಗಳು, ಮ್ಯಾಗಜಿನ್‌ಗಳೂ ಸಹ ರಾಜನ್ ಪರವೇ ನಿಂತಿವೆ. ಇಷ್ಟಾದರೂ ರಾಜನ್ ಅವರನ್ನು ಕೇಂದ್ರ ಸರಕಾರ ಮುಂದುವರೆಸದಿದ್ದರೆೆ ರಾಜನ್ ಅವರೇನೂ ಕಳೆದುಕೊಳ್ಳುವುದಿಲ್ಲ. ದೇಶೀಯ ಅರ್ಥವ್ಯವಸ್ಥೆಗೆ ಮಾತ್ರ ಸಮರ್ಥ ತಜ್ಞನ  ಮಾರ್ಗದರ್ಶನ ಎರವಾಗಬಹುದು. ಇದರಿಂದ ಜಾಗತಿಕವಾಗಿ ದೇಶಕ್ಕೆ ಕೆಟ್ಟ ಹೆಸರು ಬರಬಹುದು.
ತಮ್ಮ ಲಾಭ ಹೆಚ್ಚಿಸಿಕೊಳ್ಳಲು ಬ್ಯಾಂಕ್ ಬಡ್ಡಿ ದರ ಕಡಿತಗೊಳಿಸಬೇಕೆಂದು ಬಡಬಡಿಸುತ್ತಿದ್ದ  ಕಾರ್ಪೊರೇಟ್ ಸಂಸ್ಥೆಗಳ ಒತ್ತಡಕ್ಕೆ ಮಣಿಯದ ರಾಜನ್, ಹಂತಹಂತವಾಗಿ ಬಡ್ಡಿದರ ಇಳಿಸುವ ಮೂಲಕ ಉದ್ಯಮಿಗಳ ಕೆಂಗಣ್ಣಿಗೆ ತುತ್ತ್ತಾಗಿದ್ದಾರೆ. ಇವರೆಲ್ಲ ಸೇರಿ ರಾಜನ್ ಮುಂದುವರೆಯದಂತೆ ಕೇಂದ್ರದ ಮೇಲೆ ಒತ್ತಡ ಹೇರುತ್ತಿದ್ದಾರೆ.  ಆದರೆ ಇಲ್ಲಿ ಗಮನಿಸಬೇಕಾದ ಮಹತ್ವದ ಅಂಶವೆಂದರೆ, ಬಡ್ಡಿದರಗಳ ತೀವ್ರ ಸ್ವರೂಪದ ಕಡಿತ ಮಾಡಿದ್ದ ರಾಜನ್, ಸ್ಥಿರ ಠೇವಣಿದಾರರಿಗೆ ಮತ್ತು ಸಣ್ಣ ಉಳಿತಾಯದವರ ಆದಾಯಕ್ಕೆ ಖೋತಾ ಆಗುವುದನ್ನು ತಪ್ಪಿಸಿದ್ದಾರೆ. ಹಣದುಬ್ಬರಕ್ಕೆ ಕಡಿವಾಣ ಹಾಕಿ, ಭಾರತದ ಅರ್ಥವ್ಯವಸ್ಥೆ ಬಗ್ಗೆ ವಿಶ್ವ ಹೂಡಿಕೆದಾರರಿಗೆ ವಿಶ್ವಾಸ ಮೂಡುವಂತೆ ಮಾಡಿದ್ದಾರೆ.
ವಿಶೇಷವೆಂದರೆ, ಪ್ರಧಾನಿ ಮೋದಿಯಾಗಲಿ, ಹಣಕಾಸು ಸಚಿವ ಅರುಣ್ ಜೇಟ್ಲಿಯಾಗಲಿ ಈ ಬಗ್ಗೆ ತುಟಿಪಿಟಕ್ಕೆಂದಿಲ್ಲ. ಏಕೆಂದರೆ, ಕೈಗಾರಿಕೋದ್ಯಮಿಗಳು, ಅರ್ಥಶಾಸ್ತ್ರಜ್ಞರು ಮತ್ತು ಸಾರ್ವಜನಿಕರು ರಾಜನ್ ಪರ ನಿಂತಿದ್ದಾರೆ. ಅವರನ್ನೇ ಎರಡನೆ ಅವಧಿಗೆ ಮುಂದುವರೆಸುವಂತೆ ಆಗ್ರಹಿಸುತ್ತಿದ್ದಾರೆ.
53ರ ಹರಯದ ರಾಜನ್, ಕಠಿಣ ಸ್ವರೂಪದ ವಿತ್ತೀಯ ನೀತಿ ಅನುಸರಿಸುವಂತೆ ಕೇಂದ್ರವನ್ನು ಆಗ್ರಹಿಸುತ್ತಲೇ ಇದ್ದಾರೆ. ಏಕೆಂದರೆ, ಅವರಿಗೆೆ ಜಾಗತಿಕ ಅರ್ಥ ವ್ಯವಸ್ಥೆಯ ಮುನ್ನೋಟವಿದೆ.  2008ರಲ್ಲಿ ಅವರು ಅಮೆರಿಕದ ಹಣಕಾಸು ಬಿಕ್ಕಟ್ಟಿನ ಬಗ್ಗೆ ಮೊದಲೇ ನುಡಿದಿದ್ದರು. ಬ್ಯಾಂಕಿಂಗ್ ಸುಧಾರಣಾ ಕ್ರಮಗಳು, ಹಣದುಬ್ಬರ ನಿಯಂತ್ರಣ, ಉಳಿತಾಯ ಹೆಚ್ಚಳ, ಮುಕ್ತ ಮಾರುಕಟ್ಟೆ  ವ್ಯವಸ್ಥೆ ಜಾರಿಗೊಳಿಸುವುದು ರಾಜನ್ ಆದ್ಯತೆಗಳಾಗಿವೆ.  ಇಂತಹ ದೂರದೃಷ್ಟಿಯ ರಾಜನ್ ಮತ್ತೆ ಮುಂದುವರೆಯುವಂತೆ ರಾಜಕಾರಣಿಗಳೇ ಸರಕಾರದ ಮೇಲೆ ಒತ್ತಡ ಹೇರಬೇಕಿತ್ತು. ಆದರೆ ಇಲ್ಲಿಯೂ ವಿವಾದ ಎದ್ದಿರುವುದು ದುರಾದೃಷ್ಟವೇ ಸರಿ. 

Tuesday, 7 June 2016




ಶಿಕ್ಷಣ ಸಾಗುತ್ತಿರುವ ದಾರಿ ನಿಜಕ್ಕೂ ಭಯಾನಕ

   ಜಗತ್ತಿನಲ್ಲಿ ಬದುಕುವ ದಾರಿಯನ್ನು ಕಂಡುಕೊಳ್ಳಲು, ಹೇಗೆ ಬದುಕಬೇಕು ಎಂದು ತಿಳಿದುಕೊಳ್ಳಲು ಜ್ಞಾನ ಬೇಕು. ಜ್ಞಾನ ಎಂಬುದು ಸಮುದ್ರವಿದ್ದಂತೆ. ಶಿಕ್ಷಣ ಎಂಬ ಸಮುದ್ರದಲ್ಲಿ  ಜ್ಞಾನವೆನ್ನುವುದು ಒಂದು ಅರಿವಿನ ದಾರಿ. ದುರದೃಷ್ಟವಶಾತ್ ಇಂದು ಜ್ಞಾನ ಎನ್ನುವುದು ಕಳೆದುಹೋಗಿದೆ. ಆ ಜಾಗದಲ್ಲಿ ವಿಜ್ಞಾನ ಮತ್ತು ತಂತ್ರಜ್ಞಾನ ಬಂದಿದೆ. ಆ ಹಾದಿಯಲ್ಲಿ ನಮ್ಮನ್ನು ಕೊಂಡೊಯ್ಯುತ್ತಿದೆ ಈ ವ್ಯಾಪಾರೀಕರಣದ ಶಿಕ್ಷಣ. 

ಮಲೆನಾಡಿನ ಒಂದು ಹಳ್ಳಿ. ಸುಮಾರು 6 ಎಕ್ರೆಯಷ್ಟು ಅಡಿಕೆ ತೋಟವಿದೆ. ಈ ದಂಪತಿಗೆ ಇರುವವರು ಇಬ್ಬರೇ ಗಂಡು ಮಕ್ಕಳು. ಅವರಲ್ಲೊಬ್ಬ ಈಗಾಗಲೇ ಓದಿ ಬೆಂಗಳೂರು ಸೇರಿದ್ದರೆ, ಇನ್ನೊಬ್ಬ ಇಲ್ಲಿಯೇ ಕಲಿಯುತ್ತಿದ್ದು, ಆತನೂ ಬೆಂಗಳೂರಿನ ಧಾವಂತದ ಕನಸು ಕಾಣುತ್ತಿದ್ದಾನೆ.
ಈ ಘಟನೆ ಎದುರಾದಾಗ ಟಿ.ಎನ್. ಸೀತಾರಾಮ್ ಅವರ ‘ಮುಕ್ತ’ ಧಾರಾವಾಹಿಯ ನೆನೆಪು ಬರುತ್ತದೆ. ಜಾಗತೀಕರಣ, ಇದರಿಂದ ಹಳ್ಳಿಗಳೆಲ್ಲ ನಶಿಸುತ್ತಿರುವುದು, ಉದ್ಯಮಿಗಳು ಹಳ್ಳಿಗರ ಜಮೀನುಗಳನ್ನು ವಶಕ್ಕೆ ಪಡೆಯಲೆತ್ನಿಸುವುದು, ಅದರ ವಿರುದ್ಧ ಹೋರಾಡಿದರೂ ಹಳ್ಳಿಗರಿಗೆ ಜಯ ಸಿಗದಿರುವುದು....ಇತ್ಯಾದಿ ಘಟನೆಗಳು ಮನಃಪಟಲದಲ್ಲಿ ಹಾದುಹೋಗುತ್ತವೆ.
  ಕನ್ನಡ ಚಾನೆಲ್ ಒಂದರಲ್ಲಿ ಎಲ್‌ಕೆಜಿಗೆ ಹೋಗುವ ಹುಡುಗರಿಂದ 7ನೆಯ ತರಗತಿವರೆಗೆ ಹೋಗುವ ಮಕ್ಕಳು ಅಭಿನಯ ಮಾಡುವ ಒಂದು ಕಾರ್ಯಕ್ರಮ ಪ್ರಸಾರವಾಗುತ್ತಿದೆ. ಅದರ ಹೆಸರು-ಡ್ರಾಮಾ ಜೂನಿಯರ್ಸ್. ಇದರಲ್ಲಿ ಕಳೆದ ವಾರ 7ನೆಯ ತರಗತಿಯ ಬಾಲಕಿ ಒಂದು ಅಭಿನಯ ಮಾಡಿದಳು. ಅದೇನೆಂದರೆ, ಮಗ್ಗದ ಕೆಲಸ ಮಾಡುವ ಹುಡುಗಿಯ ಪಾತ್ರ.. ಕೊನೆಯ ಹಂತದಲ್ಲಿ ಅವಳಿಗೊಬ್ಬ ಮಗ. ನಾನು ಮಗನನ್ನಾದರೂ ಬಿಟ್ಟೇನು, ಮಗ್ಗವನ್ನು ಬಿಡಲ್ಲ ಎಂಬ ಒಂದು ಸಂಭಾಷಣೆ. ಕಾರಣ ಕೇಳಿದರೆ ಇದು ನನಗೆ ಅನ್ನ ಕೊಟ್ಟ ಉದ್ಯೋಗ. ಅಲ್ಲದೆ, ನಮ್ಮ ದೇಶದ ಸಂಸ್ಕೃತಿ ಎಂದಳು. ಅದಕ್ಕೆ ಸೀತಾರಾಮ್ ಹೇಳಿದರು- ಇಂದಿನ ಜಾಗತೀಕರಣದಲ್ಲಿ ನೀನು ನಮ್ಮನ್ನು ಎಚ್ಚರಿಸಿ ನಮ್ಮತನವನ್ನು ಬಿಂಬಿಸಿದ ರೀತಿ ಇದು ಎಂದು.
ಜಾಗತೀಕರಣದ ಭರದಲ್ಲಿ ನಮ್ಮತನವನ್ನು ಕಳೆದುಕೊಳ್ಳುತ್ತಿದ್ದೇವೆ. ಇಂದಿನ ಶಿಕ್ಷಣವೂ ಇದನ್ನೇ ಕಲಿಸುತ್ತಿದೆ. ಯಾವುದೇ ಮಕ್ಕಳನ್ನು ಕೇಳಿ, ಮುಂದೆ ಏನಾಗುತ್ತಿಯೇ ಎಂದು. ಅವರಲ್ಲಿ ಸಿದ್ಧವಿರುವ ಉತ್ತರ- ಒಂದೋ ವೈದ್ಯನಾಗುವುದು, ಇಲ್ಲವೇ ಇಂಜಿನೀಯರ್  ಆಗುವುದು, ವಿದೇಶದಲ್ಲಿ ಅಥವಾ ಕಾರ್ಪೊರೇಟ್ ಸಿಟಿಯಲ್ಲಿ ಕೆಲಸ ಮಾಡುವುದು. ಯಾವ ಮಕ್ಕಳೂ ತಂದೆಯಂತೆ, ಅಜ್ಜನಂತೆ ಅಥವಾ ವಂಶಪಾರಂಪರ್ಯವಾಗಿ ಬಂದಿರುವ ತೋಟ, ಹೊಲವನ್ನು ಆಧುನಿಕ ಕೃಷಿಗೆ ಮಾರ್ಪಡಿಸಿ ವೈಜ್ಞಾನಿಕವಾಗಿ ಬೆಳೆ ತೆಗೆದು ಮಾದರಿ ಕೃಷಿಕನಾಗುತ್ತೇನೆ ಎನ್ನುವುದಿಲ್ಲ. ಕೋಟ್ಯಂತರ ರೂ. ಬೆಲೆಬಾಳುವ ಬಂಗಾರದಂತಹ ಭೂಮಿಯನ್ನು ಇನ್ನೊಬ್ಬರಿಗೆ ಮಾರಾಟ ಮಾಡಿ ಸಿಟಿಗೆ ತೆರಳಲು ಸನ್ನದ್ಧರಾಗುತ್ತಿದ್ದಾರೆ.
ಇಂದು ಯಾವ ಜವಾಬ್ದಾರಿಯನ್ನೂ ನಾವು ಹೊರಲು ಸಿದ್ಧರಿಲ್ಲ. ನಮಗೆ ಬೇಕಿರುವುದು ಹಣ ಮಾತ್ರ. ಹಣ ಗಳಿಸಲು ದೇಶ- ವಿದೇಶಕ್ಕೆ ತೆರಳುತ್ತೇವೆ. ಆದರೆ, ಮನೆಯಲ್ಲೇ ಅದಕ್ಕೆ ದಾರಿ ಇದ್ದರೂ ಅದು ನಮ್ಮ ಕಣ್ಣಿಗೆ ಬೀಳುವುದಿಲ್ಲ. ಬಿದ್ದರೂ ಅದರ ಬಗ್ಗೆ ಆಸಕ್ತಿ ಇಲ್ಲ. ಎಲ್ಲರೂ ಬೆಂಗಳೂರು, ಚೆನ್ನೈ, ಮುಂಬೈ, ದೆಹಲಿ, ಅಮೆರಿಕ, ಆಸ್ಟ್ರೇಲಿಯಾ ಎನ್ನುತ್ತ ಹೋಗುವವರೇ ಆಗಿದ್ದಾರೆ. ಐಟಿ ಕಂಪನಿಯಲ್ಲಿ ಕೆಲಸ ಮಾಡಬೇಕು. ಒಳ್ಳೆಯ ಜೀವನ ನಡೆಸಬೇಕು. ಜಗತ್ತಿನಲ್ಲಿ ನಮಗೆ ಬೇರೆ ಯಾವ ಜವಾಬ್ದಾರಿಯೂ ಬೇಡ ಎನ್ನುವ  ಇಂತಹ ಶಿಕ್ಷಣ, ಇಂತಹವರನ್ನು ಸೃಷ್ಟಿ ಮಾಡುವ ಶಿಕ್ಷಣ ನಮಗೆ ಬೇಕೇ?
ನಮ್ಮ ಸಂಸ್ಕೃತಿ, ಪರಂಪರೆಯನ್ನು ಪ್ರೀತಿಸುವ, ಪೋಷಿಸುವುದನ್ನು ಕಲಿಸದೆ ಕೇವಲ ಹಣ ಗಳಿಸುವ ಮಾರ್ಗವನ್ನು ಮಾತ್ರ ಶಿಕ್ಷಣ ಹೇಳಿಕೊಡುತ್ತಿದೆ. ಏನೂ ಕಲಿಯದ ನಮ್ಮ ಅಜ್ಜ-ಮುತ್ತಜ್ಜಂದಿರು ಕೃಷಿಯನ್ನು ಮಾ ಹೆಸರು ಗಳಿಸಿದರು. ಆದರೆ ಸುಶಿಕ್ಷಿತರೆನಿಸಿಕೊಂಡ, ಆಧುನಿಕ ವಿದ್ಯಾಭ್ಯಾಸಿಗಳಾದ ನಮಗೆ  ಕೃಷಿ ಎಂದರೆ ಯಾರಿಗೆ ಬೇಕು, ಇದರಲ್ಲೇನಿದೆ ಲಾಭ, ಕೂಲಿಗಳು ಸಿಗುವುದಿಲ್ಲ, ಖರ್ಚು ಅಧಿಕ, ಲಾಭ ಕಡಿಮೆ ಎಂಬ ಮನೋಭಾವ ಬಂದುಬಿಟ್ಟಿದೆ.
ನಮ್ಮತನವನ್ನು ನಾವು ಉಳಿಸಿಕೊಂಡು ಬಂದಿದ್ದೇ ಆದಲ್ಲಿ, ಎಲ್ಲದರಲ್ಲೂ ಲಾಭವಿದೆ. ಆದರೆ ಆ ಮಾರ್ಗದತ್ತ ಹೆಜ್ಜೆ ಇಡುವ ಮನಸ್ಸು ಮೊದಲಿರಬೇಕು. ಇಂದಿನ ಶಿಕ್ಷಣ ಇದನ್ನು ಕಲಿಸದೇ ಇರುವುದು, ಇನ್ನೊಬ್ಬನನ್ನು ನೋಡಿ ನಾನು ಅವನಂತೆಯೇ ಆಗಬೇಕೆಂಬ ಹಪಾಹಪಿತನ ಇದಕ್ಕೆ ಕಾರಣ. ನಮ್ಮಲ್ಲಿರುವ ವೈಶಿಷ್ಟ್ಯತೆಯನ್ನು, ಪ್ರತಿಭೆಯನ್ನು ನಾವು ಇಲ್ಲಿ ತೋರಬೇಕೇ ವಿನ ಇನ್ನೊಬ್ಬರನ್ನು ಅನುಸರಿಲಸು ಹೋಗಿ ನಮ್ಮತನವನ್ನು ಹಾಳುಮಾಡಿಕೊಳ್ಳಬಾರದು.
ಟಿವಿ ಕಾರ್ಯಕ್ರಮದ ಆ ಬಾಲಕಿ ಹೇಳಿದ ಹಾಗೆ ಮಗ್ಗವನ್ನು ನಂಬಿಕೊಂಡು ಇಂದು ಸಾವಿರಾರು ಜನ ಕೆಲಸ ಮಾಡುತ್ತಿರುವ ಚರಕ ಸಂಸ್ಥೆ ನಮ್ಮದೇ ಜಿಲ್ಲೆಯ ಸಾಗರ ತಾಲೂಕಿನ ಭೀಮನಕೋಣೆಯಲ್ಲಿಲ್ಲವೇ? ಗ್ರಾಮೋದ್ಯೋಗದಿಂದ ಜೀವನ ಸಾಗಿಸಲು ಸಾಧ್ಯ ಎನ್ನುವುದನ್ನು ಅದರ ರೂವಾರಿ ಪ್ರಸನ್ನ ತೋರಿಸಿಕೊಟ್ಟಿಲ್ಲವೇ? ಇದನ್ನು ನಾವ್ಯಾರೂ ಅನುಕರಿಸುತ್ತಿಲ್ಲ. ಅನುಸರಿಸುತ್ತಿಲ್ಲ, ಬೆಳೆಸಲು ಯತ್ನಿಸುತ್ತಿಲ್ಲ. ಮೆಡಿಕಲ್, ಇಂಜಿನೀಯರಿಂಗ್ ಸೀಟಿಗೆ ಹತ್ತಿಪ್ಪತ್ತು ಲಕ್ಷ ತೆತ್ತು ಓದಲು ಕಳುಹಿಸುತ್ತೇವೆ. ಆದರೆ ಅದೇ ಲಕ್ಷವನ್ನು ಆತನ ಕೈಗಿತ್ತು ಚೆನ್ನಾಗಿ ವ್ಯವಸಾಯ ಮಾಡಿಕೊಂಡು ಹೋಗು ಎಂದರೂ ಆತ ಪಾಲಕರ ಮಾತು ಕೇಳದ  ಸ್ಥಿತಿ ಇಂದು ನೆಲೆಸಿದೆ.
ಈ ಪರಿಸ್ಥಿತಿ ಏಕೆ ನಿರ್ಮಾಣವಾಗುತ್ತಿದೆ. ಟಿ.ಎನ್.ಸೀತಾರಾಂ ಹೇಳಿದ ಹಾಗೆ, ಶಿಕ್ಷಣ ಯಾವ ದಾರಿಯಲ್ಲಿ ಹೋಗುತ್ತಿದೆ, ಹಳ್ಳಿಗಳ ಪರಿಸ್ಥಿತಿ ಏನಾಗಬಹುದು ಎನ್ನುವುದನ್ನು ಯೋಚಿಸಿದರೆ ನಿಜಕ್ಕೂ ಭಯಾನಕವೆನಿಸುತ್ತಿದೆ.
..................................... 

Friday, 3 June 2016

ನೀರು ಕಂಡರೆ ಅದೆಂತಹ ಖುಷಿ!


ಶಿವಮೊಗ್ಗ: ಒಂದೆಡೆ ಬಿರುಬಿಸಿಲು,  ಇನ್ನೊಂದೆಡೆ ಮಳೆಯೇ ನಾಪತ್ತೆ. ವರುಣನ ಆಗಮನಕ್ಕಾಗಿ ಹೋಮ, ಹವನಗಳು ನಡೆಯುತ್ತಲೇ ಇವೆ. ಆದರೂ ಆತ ನಾಪತ್ತೆಯಾಗಿದ್ದಾನೆ. ಆತನ ಬರುವಿಕೆಗಾಗಿ ಆಗಸ ನೋಡುತ್ತಲೇ ನಿಟ್ಟುಸಿರು ಬಿಡುತ್ತ ದಿನದೂಡುತ್ತಿದ್ದೇವೆ.
ಇನ್ನೊಂದೆಡೆ, ಕುಡಿಯಲು ನೀರಿಲ್ಲದ ಸ್ಥಿತಿ, ಕೆರೆ-ಕಟ್ಟೆಗಳೆಲ್ಲ ಒಣಗಿ ಬರಿದಾಗಿ ಬಿರುಕುಬಿಟ್ಟಿವೆ. ಮನುಷ್ಯರಂತೆ ಪ್ರಾಣಿ-ಪಕ್ಷಿಗಳೂ ಸಹ ನೀರಿಗಾಗಿ ಚಡಪಡಿಸುತ್ತಿವೆ. ಆಗೊಮ್ಮೆ, ಈಗೊಮ್ಮೆ ಮೋಡವಾಗುತ್ತಿದೆ. ಇದರಿಂದ ಇದ್ದ ನೀರೂ ಬತ್ತುತ್ತಿದೆ.
ರಜೆ ಮುಗಿದು ಶಾಲೆ ಆರಂಭವಾಗಿದೆ. ಬೇಸಿಗೆಯ ರಜೆಯ ದಿನಗಳಲ್ಲಿ ಕೆರೆಗೆ ಹಾರುತ್ತ, ಈಜುತ್ತ, ತೇಲುತ್ತ, ಮುಳುಗುತ್ತ ಆನಂದಿಸುತ್ತಿದ್ದ ಮಕ್ಕಳು ಮಗದೊಂದೆಡೆಯಾದರೆ, ನೀರಿರುವ ಜಾಗವನ್ನೇ ಕೆರೆಯನ್ನಾಗಿ ಮಾಡಿ, ಅಲ್ಲಿಯೇ ಹೊರಳುತ್ತ, ಮಲಗುತ್ತ, ಬಾಲಬಡಿಯುತ್ತ ಸಂಜೆ ಕಳೆಯುವ ಎಮ್ಮೆಗಳು. ಎಂತಹ ಆನಂದ. ಮಕ್ಕಳು ಕೆರೆಯನ್ನು ಈಜಿಗಾಗಿ ಬಳಸಿಕೊಂಡು ಖುಷಿಪಟ್ಟರೆ, ಎಮ್ಮೆಗಳು ಲೋಕದ ಯಾವ ಜಂಜಡವೂ ಇಲ್ಲದೆ ನಿಶ್ಚಿಂತೆಯಿಂದ ತಮ್ಮದೇ ಲೋಕದಲ್ಲಿ ಹಾಯಾಗಿ ಮಲಗಿ ಕಾಲಕಳೆಯುತ್ತಿವೆ.
ಮನುಷ್ಯರು ಒಳ್ಳೆಯ ನೀರಿರುವ ಕೆರೆಗಳಲ್ಲಿ ಮಾತ್ರ ಈಜುತ್ತಾರೆ. ಅಲ್ಲಿನ ನೀರನ್ನೂ ಕುಲಗೆಡಿಸುತ್ತಾರೆ. ಆದರೆ ಎಮ್ಮೆಗಳಿಗೆ ಯಾವ ನೀರಾದರೂ ಒಂದೇ. ಅದರಲ್ಲಿ ಉರುಳಾಡಿದ್ದೇ ಉರುಳಾಡಿದ್ದು. ಅಲ್ಲಿ ಅವುಗಳಿಗೆ ಸಿಗುವ ಖುಷಿಯೇ ಬೇರೆ.  ನಿಜಕ್ಕೂ ಸಿಕ್ಕಿದ್ದೇ ಸೀರುಂಡೆ ಎನ್ನುವ ಮನೋಭಾವ ಎಮ್ಮೆಗಳದ್ದು. ಹುಡುಗರು ಉರಿ ಬಿಸಿಲಿನಲ್ಲಿ ಈಜಿ ಮನ-ಮೈಯನ್ನು ಹಗುರ, ಮುದಗೊಳಿಸಿ, ಶುಚಿಗೊಳಿಸಿಕೊಂಡು ಜಿಗಿದಾಡುತ್ತ ಮನೆ ಸೇರುತ್ತಾರೆ. ಆದರೆ ಎಮ್ಮೆಗಳು ಮೈಯನ್ನು ಕೆಸರು ಮಾಡಿಕೊಂಡೇ ಮನೆ ದಾರಿ ಹಿಡಿಯುತ್ತವೆ. ಇಬ್ಬರಲ್ಲೂ ಒಂದೇ ಗುಣ, ಅದೇನೆಂದರೆ, ಒಬ್ಬಂಟಿಯಾಗಿ ಇಬ್ಬರೂ ಹೋಗುವುದಿಲ್ಲ. ಜೊತೆಗೆ ಸಂಗಡಿಗರು ಜಾಸ್ತಿ ಇದ್ದಂತೆ ಉತ್ಸಾಹ ಉನ್ಮಾದಕ್ಕೇರುತ್ತದೆ. ನೀರು ಕಂಡರೆ ಇಬ್ಬರಿಗೂ ಎಂತಹ ಖುಷಿ ಅಲ್ಲವೇ?  
    ........................................................
ಹಾಸ್ಟೆಲ್‌ಗಳಿಗೆ  ಅಡುಗೆ, ಅಡುಗೆ ಸಹಾಯಕರ  ಕೊರತೆ
  ಜಿಲ್ಲಾ  ಹಿಂದುಳಿದ ವರ್ಗಗಳ ಇಲಾಖೆಯ ದುಸ್ಥಿತಿ* 799 ಹುದ್ದೆಯಲ್ಲಿ 522 ಹುದ್ದೆ ಖಾಲಿ 



ಶಿವಮೊಗ್ಗ; ಜಿಲ್ಲೆಯ ಬಹುತೇಕ ಸರ್ಕಾರಿ ಇಲಾಖೆಯಲ್ಲಿ ಖಾಲಿ ಹುದ್ದೆಗಳೇ ಅಧಿಕವಾಗಿವೆ, ಜವಾನ, ರಾತ್ರಿ ಕಾವಲುಗಾರ, ಗುಮಾಸ್ತ ಹುದ್ದೆ, ಹೆಚ್ಚು ಖಾಲಿ ಇರುವವಾಗಿವೆ. ಸರಕಾರ ಖಾಲಿ ಹುದ್ದೆ ತುಂಬುವ ಪ್ರಕ್ರಿಯೆಯನ್ನು ಕಳೆದ ಸುಮಾರು ಆರೆಂಟು ವರ್ಷದಿಂದ ಮಾಡಿಲ್ಲ. ಪ್ರತಿ ವರ್ಷ ಸಾಕಷ್ಟು ನೌಕರರು ನಿವೃತ್ತರಾಗುತ್ತ ಹುದ್ದೆ ಖಾಲಿಯಾಗುತ್ತಿದೆ. ನಿವೃತ್ತರಾದಂತೆ ಅಧಿಕಾರಿಗಳ ಹುದ್ದೆಯನ್ನು ಮಾತ್ರ ತುಂಬುವ ಕಾಂರ್ ನಡೆಯುತ್ತಿದೆ. ಆದರೆ ಗುಮಾಸ್ತರಿಂದ ಹಿಡಿದು ಜವಾನರ ಖಾಲಿ ಹುದ್ದೆ ದಿನಗಳೆದಂತೆ ಹೆಚ್ಚುತ್ತಲೇ ಇದೆ. 
ಜಿಲ್ಲೆಯ ಸಮಾಜ ಕಲ್ಯಾಣ ಇಲಾಖೆಯಲ್ಲಿ ಒಟ್ಟೂ 799 ಹುದ್ದೆಗಳಿವೆ. ಈ ಪೈಕಿ 522 ಹುದ್ದೆಗಳು ಖಾಲಿ ಇವೆ. 277 ಹುದ್ದೆ ಮಾತ್ರ ಭರ್ತಿಯಾಗಿದೆ. ಇಲ್ಲಿ ಪ್ರಮುಖವಾಗಿ ಇರಬೇಕಾಗಿರುವ ಜಿಲ್ಲಾ ಪತ್ರಾಂಕಿತ ಅಧಿಕಾರಿಯೇ ಇಲ್ಲ. ತಾಲೂಕುಗಳಿಗೆ ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿಗಳೇ ಇಲ್ಲ. ಎಲ್ಲ 7 ಹುದ್ದೆಗಳು ಖಾಲಿ ಉಳಿದಿವೆ. ಎಫ್‌ಡಿಸಿ 10 ಹುದ್ದೆ ಇದ್ದು, 6 ಖಾಲಿ, ಎಸ್‌ಡಿಸಿ 11 ಹುದ್ದೆ ಇದ್ದು, ಇಲ್ಲಿಯೂ 6 ಖಾಲಿ. ಡಾಟಾ ಎಂಟ್ರಿ ಆಪರೇಟರ್ಸ್‌ಗೆ 7 ಹುದ್ದೆ ಇದೆ. ಅದನ್ನು ತುಂಬಿಯೇ ಇಲ್ಲ. ಹಾಸ್ಟೆಲ್ ಪಾಲಕರ 27 ಹುದ್ದೆ ಇದ್ದು, 19 ಖಾಲಿ, ಮೇಲ್ವಿಚಾರಕರಿಗೆ 105 ಹುದ್ದೆ ಇದ್ದು, 32 ಖಾಲಿ. 
ಈ  ಇಲಾಖೆಯಡಿ ಬರುವ ಹಾಸ್ಟೆಲ್‌ಗಳ ಸಂಖ್ಯೆ 139. ಈ  ಹಾಸ್ಟೆಲ್‌ಗೆ ಅಡುಗೆಯವರ ಹುದ್ದೆಯನ್ನು ಪರಿಶೀಲಿಸಿದಾಗ ಕಂಡುಬಂದ ಸಂಗತಿ ಎಂದರೆ ಒಟ್ಟೂ ಅಡುಗೆಯವರು 322 ಮತ್ತು ಸಹಾಯಕ ಅಡುಗೆಯವರು 210 ಜನರು ಇರಬೇಕಿತ್ತು. ಆದರೆ ಅಡುಗೆಯವರ 190 ಹುದ್ದೆ ಮತ್ತು ಸಹಾಯಕ ಅಡುಗೆಯವರ  201 ಹುದ್ದೆ ಖಾಲಿ ಇದೆ. ರಾತ್ರಿ ಕಾವಲುಗಾರರ ಸಂಖ್ಯೆ ಒಟ್ಟೂ 60 ಇರಬೇಕಿತ್ತು. ಆದರೆ ಇರುವುದು 9 ಮಾತ್ರ. 51 ಈ ಹುದ್ದೆ ಖಾಲಿ ಉಳಿದಿದೆ.
ಹಾಗಾದರೆ ಹಾಸ್ಟೆಲ್ ವಾಸಿ ಮಕ್ಕಳಿಗೆ ಅಡುಗೆಯನ್ನು ಯಾರು ಮಾಡುತ್ತಾರೆಂಬ ಪ್ರಶ್ನೆ ಎದುರಾಗುತ್ತದೆ. ಈ ವಿಚಾರ ಸರ್ಕಾರದ ಗಮನಕ್ಕೂ ಹೋಗಿದೆ. ಆದರೆ ಇದು ಕೇವಲ ಶಿವಮೊಗ್ಗ ಜಿಲ್ಲೆಯ ವಿಚಾರ ಮಾತ್ರವಲ್ಲ ರಾಜ್ಯಕ್ಕೆ ಸಂಬಂಧಿಸಿದ್ದು. ಎಷ್ಟೋ ಸಾವಿರ ಈ ಹುದ್ದೆಗಳು ರಾಜ್ಯದಲ್ಲಿ ಖಾಲಿಯಾಗುವ ಮೂಲಕ ವಿದ್ಯಾರ್ಥಿಗಳು ಪರದಾಡುವಂತಾಗಿದೆ. ಸರಾಸರಿ ಒಂದು ಹಾಸ್ಟೆಲ್‌ಗೆ 3ರಿಂದ 4 ಜನ ಅಡುಗೆಯವರಿರುತ್ತಾರೆ. ಅಡುಗೆ ಸಹಾಯಕರಾಗಿ ಇಬ್ಬರಿರುತ್ತಾರೆ. ಅಂದರೆ ಒಂದು ಹಾಸ್ಟೆಲ್‌ಗೆ ಸರಾಸರಿ 6 ಅಡುಗೆಯವರಿರುತ್ತಾರೆ. ಈಗ ಹುದ್ದೆ ಖಾಲಿಯಾಗಿರುವಲ್ಲಿಗೆ ಇವರನ್ನೆಲ್ಲ ನಿಯೋಜಿಸಲಾಗುತ್ತಿದೆ.   ಹಾಸ್ಟೆಲ್‌ಗಳಲ್ಲಿ ನೂರಕ್ಕೂ ಹೆಚ್ಚು ಮಕ್ಕಳಿರುವುದು ಸಾಮಾನ್ಯ. ಆ ಎಲ್ಲ ಮಕ್ಕಳಿಗೆ ಒಬ್ಬನೇ ಅಡುಗೆ ಮಾಡಬೇಕಾದ ಸಂದರ್ಭ ಎದುರಾಗಿದೆ.   
 ಸರ್ಕಾರ ಈ ಹುದ್ದೆಗಳನ್ನೆಲ್ಲ ತುಂಬದಿದ್ದಲ್ಲಿ, ಕೆಲವೇ ದಿನದಲ್ಲಿ ಇವರು ನಿವೃತ್ತರಾದರೆ ಗುತ್ತಿಗೆ ಆಧಾರದಲ್ಲಿ ಅಡುಗೆಯವರನ್ನು ತೆಗೆದುಕೊಳ್ಳಬೇಕಾಗುತ್ತದೆ. ಇದು ಹಾಸ್ಟೆಲ್ ಪರಿಸ್ಥಿತಿ.  ಖಾಸಗಿ ಏಜೆನ್ಸಿಗಳ ಮೂಲಕ ವಾಚ್‌ಮನ್‌ಗಳ ಹುದ್ದೆಯನ್ನು ನಿಭಾಯಿಸಬಹುದಾಗಿತ್ತಾದರೂ ಸರ್ಕಾರ ಆ ಬಗ್ಗೆ ಯೋಚಿಸಿಲ್ಲ. ಪರಿಸ್ಥಿತಿ ಹೀಗೆ ಮುಂದುವರೆದರೆ ಮಕ್ಕಳೇ ಅಡುಗೆ ಮಾಡಿಕೊಂಡು ಕಾಲಕಳೆಯಬೇಕಾಗುತ್ತದೆ. ವಾಚ್‌ಮನ್ ಹುದ್ದೆ ರದ್ದಾದರೂ ಆಶ್ಚರ್ಯವೇನಿಲ್ಲ. ಆ ಕೆಲಸ ಮಕ್ಕಳೇ ಮಾಡಿಕೊಳ್ಳಲಿ ಎಂದು ಸರಕಾರ ಯೋಚಿಸಬಹುದು. 
    ಹಾಸ್ಟೆಲ್‌ಗಳಿಗೆ ಮಕ್ಕಳನ್ನು ಸೇರಿಸುವ ಉದ್ದೇಶವನ್ನೇ ಸರಕಾರಗಳು ಮರೆತಂತಿದೆ. ಹಳ್ಳಿಯಿಂದ ದಿನನಿತ್ಯ ಬಂದು ವಾಪಸ್ ಹೋಗಲು ಸಾಧ್ಯವಿಲ್ಲ ಎಂದೋ, ಆರ್ಥಿಕ ತೊಂದರೆ ಇದೆ ಎಂದೋ, ಅವರ ವಿದ್ಯಾಭ್ಯಾಸ ಕುಂಠಿತವಾಗದಿರಲಿ ಎಂದೋ ಸೇರಿರುತ್ತಾರೆ. ಆದರೆ ಅಲ್ಲಿ ಅವರಿಗೆ ಅಡುಗೆ-ಊಟವೇ ಇಲ್ಲದೆ ಹೋದರೆ ಅವರೇನು ಮಾಡಿಯಾರು. ಉತ್ತಮ ಕಟ್ಟಡ ಕೊಟ್ಟು ಅಡುಗೆಯವರನ್ನೇ ಕೊಡದೆ ಇದ್ದರೆ ಅಥವಾ ವಾಚ್‌ಮನ್‌ಗಳನ್ನೇ ನೀಡದಿದ್ದರೆ ಹಾಸ್ಟೆಲ್‌ನ್ನು ಕಾಯುವವರಾರು, ಅಡುಗೆ ಮಾಡಿ ಬಡಿಸುವವರಾರು ಎಂಬ ಪ್ರಶ್ನೆ ಪಾಲಕರದ್ದು. 
  


ಜಿಲ್ಲೆಯಲ್ಲಿ ಇಲಾಖೆಯಡಿ ಡಿ ದರ್ಜೆ ಹುದ್ದೆಗಳಾದ ಅಡುಗೆಯವರು, ಅಡುಗೆ ಸಹಾಯಕರು, ರಾತ್ರಿ ಕಾವಲುಗಾರರ ಸಾಕಷ್ಟು ಹುದ್ದೆಗಳು ಖಾಲಿ ಇರುವುದು ನಿಜ. ಈ ಬಗ್ಗೆ ಹಲವಾರು ಬಾರಿ ಮೇಲಧಿಕಾರಿಗಳ ಗಮನ ಸೆಳೆಯಲಾಗಿದೆ. ಪತ್ರ ಮುಖೇನ ಇಲಾಖೆಯ ಆಯುಕ್ತರಿಗೂ ಬರೆಯಲಾಗಿದೆ. ಹೊರ ಸಂಪನ್ಮೂಲ ಏಜೆನ್ಸಿಯಿಂದ ಮಾನವ ಸೇವೆ ಪಡೆದು  ವಿದ್ಯಾರ್ಥಿ ನಿಲಯಗಳನ್ನು ನಿರ್ವಹಿಸುವ ಸಂದರ್ಭ ಎದುರಾಗಿದೆ. ಡಿ ದರ್ಜೆ ಹುದ್ದೆ ನೇಮಕಾತಿಗೆ ಜಿಲ್ಲಾಧಿಕಾರಿಯವರಿಗೆ ಅಧಿಕಾರವಿದೆ. ಇದಕ್ಕೆ ಸರಕಾರದಿಂದ ಅವಕಾಶ ದೊರೆತಲ್ಲಿ ವಿದ್ಯಾರ್ಥಿ ನಿಲಯಗಳನ್ನು ಸುಸೂತ್ರವಾಗಿ ನಿರ್ವಹಿಸಬಹುದಾಗಿದೆ.
- ಧರ್ಮಪ್ಪ, ಜಿಲ್ಲಾ ಸಮಾಜ ಕಲ್ಯಾಣಾಧಿಕಾರಿ
...................................................