Friday, 19 May 2017

ಅನಾಥವಾಗುತ್ತಿದೆ ಗಾಂಧಿ ಪಾರ್ಕ್
*ನಿರ್ವಹಣೆ ಇಲ್ಲ* ದುಬಾರಿ ದರ ವಸೂಲಿ * ಎಲ್ಲೆಂದರೆಲ್ಲಿ ಕಸದ ರಾಶಿ 

ನಗರದ ಹೃದಯ ಭಾಗದಲ್ಲಿರುವ ಮಹಾತ್ಮ ಗಾಂಧಿ ಉದ್ಯಾನವನ ಅವ್ಯವಸ್ಥೆಯ ಆಗರವಾಗುತ್ತಿದೆ. ಇದರ ಜೊತೆಗೆ ಸಾರ್ವಜನಿಕರಿಂದ ದುಬಾರಿ ದರ ಕೂಡ ವಸೂಲಿ ಮಾಡಲಾಗುತ್ತಿದೆ. ಆದರೆ ಈ ಬಗ್ಗೆ ಮಹಾನಗರ ಪಾಲಿಕೆ ಆಡಳಿತ ಯಾವುದೇ ಗಮನಹರಿಸದೆ, ನಿರ್ಲಕ್ಷ್ಯ ವಹಿಸಿದೆ. ಸಾರ್ವಜನಿಕರಿಂದ ಪ್ರವೇಶ ಧನ ಪಡೆದ ಮೇಲೆ ಅದಕ್ಕೆ ತಕ್ಕ ಕನಿಷ್ಠ ಮೂಲಸೌಕರ್ಯವನ್ನಾದರೂ ಕಲ್ಪಿಸಬೇಕು. ಇಲ್ಲವಾದಲ್ಲಿ ಈಗಿರುವ ಪ್ರೇಮಿಗಳ, ಪುಂಡರ ಸಂತೆ ಮುಂದುವರೆಯುತ್ತದೆ. ಸಜ್ಜನರು ಮಕ್ಕಳೊಂದಿಗೆ ಬಿಡುವಿನ ವೇಳೆಯಲ್ಲಿ ಮನಃಸಂತೋಷಕ್ಕಾಗಿ ಬರುತ್ತಾರೆ. ಇಂತಹವರಿಗೆ ನೈಜ ಸಂತೋಷ ಸಿಗುವಂತೆ ಇಮ್ಮಡಿಸುವಂತೆ ಪಾಲಿಕೆ ಮಾಡಬೇಕು. ಮೇಯರ್ ಕನಿಷ್ಟ ವಾರಕ್ಕೆರಡು ಬಾರಿಯಾದರೂ ಭೇಟಿ ನೀಡಿ ಸಮಸ್ಯೆ ಪರಿಹರಿಸುವ ಕೆಲಸವಾಗಬೇಕಿದೆ. 



ಶಿವಮೊಗ್ಗ: ಪಾರ್ಕ್‌ನ ಉದ್ದೇಶವನ್ನೇ ಮರೆತು ಕೇವಲ ಹಣಗಳಿಕೆ ದೃಷ್ಟಿಯಿಂದ ಅಥವಾ ನಿರ್ಲಕ್ಷ್ಯ ಮನೋಭಾವದಿಂದ ಕಂಡರೆ ಅದರಿಂದ ಯಾರಿಗೂ ಪ್ರಯೋಜನವಾಗುವುದಿಲ್ಲ. ನಗರದ ಅತ್ಯಂತ ದೊಡ್ಡದಾದ ಏಕೈಕ ಪಾರ್ಕ್ ಆದ ಗಾಂಧಿ ಪಾರ್ಕ್‌ನ್ನು ಇಂದು ಪಾಲಿಕೆ ಮಲತಾಯಿಯಂತೆ ಕಾಣುತ್ತಿದೆ. ಇದರ ಅಭಿವೃದ್ಧಿಯ ಚಿಂತನೆ ನಗಪಾಲಿಕೆಗೆ ಇರಬೇಕಿತ್ತು. ಆದರೆ ಇದನ್ನು ಕೇವಲ ಮಕ್ಕಳಾಟದ್ದು ಎಂದು ಗಮನಿಸಿದಂತಿದೆ. ಅದಕ್ಕಾಗಿ ಅದರ ಗೊಡವೆಗೆ ಹೋಗದೆ ಹಾಳಾಗಲು ಏನೇನು ಬೇಕೋ ಅದಕ್ಕೆಲ್ಲ ಸಹಕಾರ ಕೊಡುತ್ತಿದೆ ಎಂದು ಬೇಸರದಿದ ಹೇಳಬೇಕಾಗಿದೆ.
ಆಡಳಿತಗಾರರಿಗೆ ದೂರದೃಷ್ಟಿ ಇರಬೇಕು. ಮೇಯರ್ ಆದವರು ತಮ್ಮ ಕಾಲದಲ್ಲಿ ಹೊಸತನವನ್ನು ಛಾಪಿಸುವ ಮನೋಭಾವ ಹೊಂದಿರಬೇಕು. ಇದ್ಯಾವುದರ ಪರಿವೆಯೇ ಇಲ್ಲದೆ ಪಾಲಿಕೆ ಗಾಂಧಿಪಾರ್ಕನ್ನು ಅದರ ಪಾಡಿಗೆ ಬಿಟ್ಟುಬಿಟ್ಟಿದೆ. ಈ ಹಿಂದಿನ ಮೇಯರ್‌ಗಳಾದ ಖುರ್ಷಿದಾ ಬಾನು, ಮಂಗಳಾ ಅಣ್ಣಪ್ಪ ಹಾಗೂ ಎಸ್.ಕೆ. ಮರಿಯಪ್ಪ ಅವಧಿಯಲ್ಲೂ ದಿವ್ಯ ನಿರ್ಲಕ್ಷ್ಯಕ್ಕೊಳಗಾಗಿದ್ದೂ, ಪಾರ್ಕ್‌ನ ಈ ಅವ್ಯವಸ್ಥೆಗೆ ಕೊಡುಗೆ ನೀಡಿದ್ದು, ಹಾಲಿ ಮೇಯರ್ ಏಳುಮಲೈ ಕಾಲದಲ್ಲೂ ಇದೇ ಮುಂದುವರೆದಿದೆ.
ಪರಿಣಾಮವಾಗಿ ಪಾರ್ಕ್ ಅವ್ಯವಸ್ಥೆಯ ಆಗರವಾಗುತ್ತಿದೆ. ಉಸ್ತುವಾರಿ ಇಲ್ಲದೆ ಅಂದಗೆಡುತ್ತಿದೆ. ಮಕ್ಕಳಿಗೆ ನೆಮ್ಮದಿ, ಖುಷಿ ಕೊಡುವ  ಕೇಂದ್ರವಾಗದೆ ವ್ಯಾವಹಾರಿಕ ಕೇಂದ್ರವಾಗುತ್ತಿದೆ.    
ಕೆಲವು ವರ್ಷಗಳ ಹಿಂದೆ ಗಾಂಧಿ ಉದ್ಯಾನವನವನ್ನು ಸುಮಾರು 10 ಕೋಟಿ ರೂ. ವೆಚ್ಚದಲ್ಲಿ ಮೇಲ್ದರ್ಜೆಗೇರಿಸಲಾಗಿತ್ತು. ಇದರ ರೂವಾರಿ ಅಂದು ಜಿಪಂ ಸಿಇಒ ಆಗಿದ್ದ ಐಎಫ್‌ಎಸ್ ಅಧಿಕಾರಿ ಸಂಜಯ್ ಬಿಜ್ಜೂರ್ ಅವರು. ಅರಣ್ಯಾಧಿಕಾರಿಯಾಗಿದ್ದರಿಂದ ಮತ್ತು ಸಕ್ರೆಬೈಲ್‌ನ ಅಶ್ವಿನಿವನವನ್ನೂ ಸಹ ರೆಸಾರ್ಟ್ ಮಾದರಿಯಲ್ಲಿ ಪ್ರವಾಸಿತಾಣವನ್ನಾಗಿ ಮಾಡುವ ಕನಸು ಹೊತ್ತು ಆ ಪ್ರಕಾರ ಕೆಲಸ ಮಾಡಿದ್ದರು. ಜಿಪಂನಿಂದಲೇ ಹಣ ವ್ಯಯಿಸಿ ಅಂದವಾದ ಗಾಂಧಿ ಪಾರ್ಕನ್ನು ರೂಪಿಸಿದ್ದರು. ಆಮೇಲೆ ನಿರ್ವಹಣೆಗಾಗಿ ಪಾಲಿಕೆಗೆ ವಹಿಸಿಕೊಡಲಾಗಿತ್ತು.
ಯಾವತ್ತು ಪಾಲಿಕೆಗೆ ಹಸ್ತಾಂತರವಾಯಿತೋ ಅಂದಿನಿಂದ ಇಂದಿನವರೆಗೂ ಆಡಳಿತ ನಡೆಸಿದವರು ಪಾರ್ಕ್ ಉದ್ಧಾರಕ್ಕೆ ಮನಸ್ಸು ಮಾಡಲೇ ಇಲ್ಲ. ಅದನ್ನೊಂದು ಲಾಭದಾಯಕ ಉದ್ಯಮವನ್ನಾಗಿಯಷ್ಟೇ ಗಮನಿಸಿದರು. ತಮ್ಮ ಕಚೇರಿ ಎದುರೇ ಇದ್ದರೂ ಕನಿಷ್ಠ ವಾರಕ್ಕೊಮ್ಮೆಯಾದರೂ ಭೇಟಿ ನೀಡಿ ಅಲ್ಲಿನ ವ್ಯವಸ್ಥೆ ಅಥವಾ ಆಗಬೇಕಾದ ಕೆಲಸ, ಮಕ್ಕಳಿಗೆ ಇನ್ನಷ್ಟು ವ್ಯವಸ್ಥೆ ಕಲ್ಪಿಸುವ ಬಗ್ಗೆ ಅಲ್ಲಿಗೆ ಬಂದವರೊಂದಿಗೆ ಚರ್ಚಿಸಬಹುದಿತ್ತು. ಬದಲಿಗೆ ಇದನ್ನು ಮೂರನೆಯ ವ್ಯಕ್ತಿಗೆ ನಿರ್ವಹಣೆಗೆ ಹಸ್ತಾಂತರಿಸಿ ಕೈತೊಳೆದುಕೊಂಡರು. ಇವೆಲ್ಲವುಗಳ ಪರಿಣಾಮವಾಗಿ ಪಾರ್ಕ್ ಇಂದು ವಿನಾಶದ ಅಂಚಿಗೆ ಸರಿಯುವಮತಾಗಿದೆ. ಪಾಲಿಕೆಯ ನಿರಾಸಕ್ತಿ ಇದಕ್ಕೆ ನೇರ ಕಾರಣವಾಗಿದೆ.
ಪಾರ್ಕಿನಲ್ಲಿ ಅತ್ಯಾಧುನಿಕ ಸೌಲಭ್ಯಗಳ ಜೊತೆಗೆ ಮಕ್ಕಳ ಆಟದ ಸಾಮಗ್ರಿಗಳನ್ನು ಅಳವಡಿಸಲಾಗಿದೆ. ಪಾಲಿಕೆ ಆಡಳಿತವು, ಪಾರ್ಕ್‌ನ ಪರಿಣಾಮಕಾರಿ ಮೇಲುಸ್ತುವಾರಿ ಉದ್ದೇಶದಿಂದ ಪಾರ್ಕ್‌ನ ನಿರ್ವಹಣೆಯ ಜವಾಬ್ದಾರಿಯನ್ನು ಖಾಸಗಿ ಸಂಸ್ಥೆಯೊಂದಕ್ಕೆ ಹೊರಗುತ್ತಿಗೆ ನೀಡಿತ್ತು. ಹೊರಗುತ್ತಿಗೆ ಸಂದರ್ಭದಲ್ಲಿ ಪ್ರವೇಶ ಶುಲ್ಕ, ಪಾರ್ಕ್‌ನಲ್ಲಿ ಅಳವಡಿಸಲಾಗಿರುವ ವಸ್ತುಗಳ ನಿರ್ವಹಣೆ ಮತ್ತಿತರ ಶರತ್ತುಗಳನ್ನು ವಿಧಿಸಿತ್ತು.
ಪ್ರಸ್ತುತ ಬೇಸಿಗೆ ರಜೆಯಿರುವ ಕಾರಣದಿಂದ ಪಾರ್ಕ್‌ಗೆ ಭೇಟಿ ನೀಡುವವರ ಸಂಖ್ಯೆ ಹೆಚ್ಚಿದೆ. ಆದರೆ ಪಾರ್ಕ್‌ನಲ್ಲಿ ದುಬಾರಿ ಶುಲ್ಕ ವಿಧಿಸುತ್ತಿರುವುದರಿಂದ ಕುಟುಂಬ ಸಮೇತ ಪಾರ್ಕ್‌ಗೆ ಆಗಮಿಸುವವವರಿಗೆ ಹೊರೆಯಾಗಿ ಪರಿಣಮಿಸಿದೆ. ಈ ಹಿಂದೆ 5 ರೂ. ಪ್ರವೇಶ ಶುಲ್ಕ ವಿಧಿಸಲಾಗುತ್ತಿತ್ತು. ಈಗ ಪುಟಾಣಿ ಮಕ್ಕಳು ಸೇರಿದಂತೆ ಎಲ್ಲ ವಯೋಮಾನದವರಿಗೂ 10 ರೂ. ಪ್ರವೇಶ ಶುಲ್ಕ ಸಂಗ್ರಹಿಸಲಾಗುತ್ತಿದೆ. ಪಾರ್ಕ್ ಒಳಾಂಗಣದಲ್ಲಿರುವ ರೈಲು ಸಂಚಾರಕ್ಕೆ 30 ರೂ., ವಿವಿಧ ಆಟಗಳಿಗೆ ತಲಾ 20 ರೂ. ಹಣ ವಸೂಲಿ ಮಾಡಲಾಗುತ್ತಿದೆ. ಮತ್ತೊಂದೆಡೆ ತಿಂಡಿ - ತಿನಿಸುಗಳಿಗೂ ದುಬಾರಿ ದರ ವಿಧಿಸಲಾಗುತ್ತಿದೆ.
ಪಾರ್ಕ್‌ನಲ್ಲಿ ಮಕ್ಕಳು ಉಚಿತವಾಗಿ ಆಟವಾಡಲು ವ್ಯವಸ್ಥೆ ಮಾಡಲಾಗಿರುವ ಆಟದ ಸಾಮಾಗ್ರಿಗಳು ದುಃಸ್ಥಿತಿಯಲ್ಲಿವೆ. ಪಾರ್ಕ್‌ನ ಎಲ್ಲೆಂದರೆಲ್ಲಿ ಕಸದ ರಾಶಿ ಬಿದ್ದಿದೆ. ಕಾರಂಜಿ, ಅಲಂಕಾರಿಕ ದೀಪಗಳು ಹಾಳಾಗಿವೆ. ಅಸಮರ್ಪಕ ನಿರ್ವಹಣೆಯಿಂದ ದಿನದಿಂದ ದಿನಕ್ಕೆ ಪಾರ್ಕ್ ಸೊರಗುತ್ತಿದೆ.
ತತಕ್ಷಣವೇ ಜಿಲ್ಲಾಡಳಿತ ಹಾಗೂ ಮಹಾನಗರ ಪಾಲಿಕೆ ಆಡಳಿತ ಪಾರ್ಕ್‌ನಲ್ಲಿರುವ ಅವ್ಯವಸ್ಥೆ ಸರಿಪಡಿಸಲು ಕ್ರಮಕೈಗೊಳ್ಳಬೇಕು. ನಾಗರಿಕರಿಂದ ದುಬಾರಿ ಶುಲ್ಕ ಸಂಗ್ರಹಕ್ಕೆ ಕಡಿವಾಣ ಹಾಕಬೇಕಿದೆ.


ದುಬಾರಿ ಶುಲ್ಕ ವಸೂಲಿ
5 ವರ್ಷದೊಳಗಿನ ಮಕ್ಕಳಿಗೆ ಪ್ರವೇಶ ಶುಲ್ಕದಿಂದ ವಿನಾಯ್ತಿ ನೀಡಲಾಗಿತ್ತು. 5 ವರ್ಷ ಮೇಲ್ಪಟ್ಟವರಿಂದ ಮಾತ್ರ ಪ್ರವೇಶ ಶುಲ್ಕ ಸಂಗ್ರಹಿಸಲು ಅನುಮತಿ ನೀಡಲಾಗಿತ್ತು. ಆದರೆ ಪ್ರಸ್ತುತ ಈ ನಿಯಮ ಉಲ್ಲಂಘಿಸಲಾಗುತ್ತಿದ್ದು, 5 ವರ್ಷದೊಳಗಿನ ಮಕ್ಕಳಿಗೂ 10 ರೂ. ಪ್ರವೇಶ ಶುಲ್ಕ ವಸೂಲಿ ಮಾಡಲಾಗುತ್ತಿದೆ. ಪಾರ್ಕ್ ಒಳಭಾಗದಲ್ಲಿರುವ ಪುಟಾಣಿ ರೈಲಿನ ಸಂಚಾರಕ್ಕೂ ದುಬಾರಿ ಶುಲ್ಕ ವಿಧಿಸಲಾಗುತ್ತಿದೆ. ಪುಟಾಣಿಗಳು ರೈಲಿನಲ್ಲಿ ಸಂಚರಿಸಲು 30 ರೂ. ತೆರಬೇಕಾಗಿದೆ. ಹೊಸದಾಗಿ ಅಳವಡಿಸಲಾಗಿರುವ ಕೆಲವು ಆಟದ ವಿಭಾಗಗಳಿಗೆ ತಲಾ 20 ರೂ. ಪ್ರತ್ಯೇಕ ಶುಲ್ಕ ವಿಧಿಸಲಾಗುತ್ತಿದೆ.


* ಸರಿಯಾಗಿ ಬೆಳಗದ ವಿದ್ಯುದ್ದೀಪಗಳು
* ಪ್ರವೇಶದ್ವಾರದ ಕೊಳ ಗಲೀಜುಮಯ
* ಅಸಮರ್ಪಕ ನೀರಿನ ವ್ಯವಸ್ಥೆ 
* ತುಕ್ಕು ಹಿಡಿದ ಕಬ್ಬಿಣದ ಕಂಬಗಳು
* ಕುರುಕಲು ತಿಂಡಿ, ವಾಟರ್ ಬಾಟಲ್ ನಿಷೇಧಿಸಿ
* ಕುಡಿಯುವ ನೀರಿನ ವ್ಯವಸ್ಥೆ ಅತ್ಯಗತ್ಯ 
* ಸಂಗೀತ ಕಾರಂಜಿ ಪುನರಾರಂಭಿಸಿ
* ಪ್ರೇಮಿಗಳ ಅಸಭ್ಯ ವರ್ತನೆಗೆ ಕಡಿವಾಣ ಅವಶ್ಯ 
* ಪಾರ್ಕ್‌ನಲ್ಲಿ ಕಂಡಕಂಡಲ್ಲಿ ಮಲಗುವವರನ್ನು ತಪ್ಪಿಸಿ
* ಸುಸಜ್ಜಿತ ಮತ್ತು ಕಡಿಮೆ ದರದಲ್ಲಿ ಕ್ಯಾಂಟೀನ್ ವ್ಯವಸ್ಥೆ ಕಲ್ಪಿಸಿ
* ಸೆಕ್ಯುರಿಟಿ ಬೀಟ್ ಮತ್ತಷ್ಟು ಬಲಗೊಳ್ಳಬೇಕು
* ಪುಂಡರಿಗೆ ನಿಯಂತ್ರಣ ಹೇರಬೇಕು

Wednesday, 10 May 2017

 ಲಿಂಗನಮಕ್ಕಿಯ ಕಾಣದ ಮುಖಗಳು




ಲಿಂಗನಮಕ್ಕಿಯಲ್ಲಿ 150 ಟಿಎಂಸಿ ನೀರು ಸಂಗ್ರಹಿಸುವ ಸಾಮರ್ಥ್ಯ ಇದೆ. ಆದರೆ ಸದ್ಯ ಕೇವಲ 18 ಟಿಎಂಸಿ ನೀರಿದೆ. ಇಲ್ಲಿಯವರೆಗೆ ಅತಿ ಕಡಿಮೆ ನೀರು  (ಎಪ್ರಿಲ್ ಅಂತ್ಯಕ್ಕೆ) 1986ರಲ್ಲಿ ಅಂದರೆ 1727 ಅಡಿ ಇತ್ತು.  2003ರಲ್ಲಿ 1725.4 ಅಡಿ ಇತ್ತು. ಕಡಿಮೆ ನೀರಿನ ಸಂಗ್ರಹದ ನಡುವೆಯೂ, ಲಿಂಗನಮಕ್ಕಿಯ ಮಹಾತ್ಮ ಗಾಂಧಿ ವಿದ್ಯುದಾಗಾರದಲ್ಲಿ ಪ್ರಸ್ತುತ ಪ್ರತಿ ದಿನ 12 ರಿಂದ 15 ಮಿಲಿಯನ್ ಯೂನಿಟ್ ವಿದ್ಯುತ್ ಉತ್ಪಾದನೆ ಮಾಡಲಾಗುತ್ತಿದೆ. ಸರಾಸರಿ 10 ಮಿಲಿಯನ್ ಯೂನಿಟ್ ವಿದ್ಯುತ್ ಉತ್ಪಾದನೆ ಮಾಡಲು ಸುಮಾರು 8000 ಸಾವಿರ ಕ್ಯೂಸೆಕ್ ನೀರಿನ ಅವಶ್ಯಕತೆಯಿದೆ.
ಶಿವಕುಮಾರ್, ಹಿರಿಯ ಇಂಜಿನಿಯರ್, ಲಿಂಗನಮಕ್ಕಿ

 ಲಿಂಗನಮಕ್ಕಿ ಜಲಾಶಯದ ಒಡಲಿನಲ್ಲಿರುವ ನೀರಿನ ಪ್ರಮಾಣ ದಿನೇದಿನೇ ಇಳಿಮುಖವಾಗುತ್ತಿದೆ. ಒಂದೆಡೆ  ಏರುತ್ತಿದೆ ಬಿಸಿಲಿನ ಪ್ರಮಾಣ, ಮಗದೊಂದೆಡೆ ದಿನದಿಂದ ದಿನಕ್ಕೆ ಏರುತ್ತಿದೆ ವಿದ್ಯುತ್ ಬೇಡಿಕೆ. ಇದೆಲ್ಲವನ್ನೂ ಸರಿದೂಗಿಸಲು ಕರ್ನಾಟಕ ವಿದ್ಯುತ್ ನಿಗಮದ  ಇಲ್ಲಿನ ಇಂಜಿನಿಯರ್‌ಗಳು ಹೋರಾಡುತ್ತಿದ್ದಾರೆ. ಅಣೆಕಟ್ಟಿನಿಂದ ನೀರು ಸ್ಥಗಿತಗೊಂಡು ಯಾವಾಗ ವಿದ್ಯುತ್ ಉತ್ಪಾದನೆ ಸ್ಥಗಿತಗೊಳ್ಳುವುದೋ ಎಂಬ ಭಯದಲ್ಲಿದ್ದವರಿಗೆ ಸದ್ಯ ವಿದ್ಯುತ್ ಉತ್ಪಾದನೆ ಸ್ಥಗಿತಗೊಳ್ಳುವ ಭೀತಿ ಇಲ್ಲ ಎನ್ನುವುದು ಸಮಾಧಾನದ ವಿಷಯ.
ಶರಾವತಿ ಯೋಜನಾ ಪ್ರದೇಶಕ್ಕೆ ಮತ್ತು ಲಿಂಗನಮಕ್ಕಿ ಅಣೆಕಟ್ಟಿಗೆ ಶಿವಮೊಗ್ಗದ ಪತ್ರಕರ್ತರ ತಂಡವೊಂದು ಕಳೆದ ವಾರ ಭೇಟಿ ನೀಡಿ ಅಲ್ಲಿನ ವಸ್ತುಸ್ಥಿತಿಯನ್ನು ಕಣ್ಣಾರೆ ಕಂಡು, ಇಂಜಿನಿಯರ್‌ಗಳೊಂದಿಗೆ ಮಾತನಾಡಿದಾಗ ಸುಮಾರು 40 ದಿನಗಳಿಗಾಗುವಷ್ಟು ನೀರನ್ನು ಅಣೆಕಟ್ಟು ಪೂರೈಸುವ ಸಾಮರ್ಥ್ಯ ಹೊಂದಿದೆ ಎನ್ನುವುದು ಬಹಿರಂಗವಾಯಿತು. ಲಿಂಗನಮಕ್ಕಿ ಜಲಾಶಯದ ಒಟ್ಟು ಸಾಮರ್ಥ್ಯ 1819 ಅಡಿ. ಜಲಾಶಯ ನಿರ್ಮಾಣವಾದ್ದದು 1964ರಲ್ಲಿ. ಅಲ್ಲಿಂದ ಇಲ್ಲಿಯವರೆಗೆ ಒಟ್ಟೂ 15 ಬಾರಿ ಮಾತ್ರ ಜಲಾಶಯ ಪೂರ್ಣ ಪ್ರಮಾಣದಲ್ಲಿ ತುಂಬಿತ್ತು. ಇತ್ತೀಚಿನ ಕೆಲವು ವರ್ಷಗಳಲ್ಲಿ ಸತತವಾಗಿ ಮಳೆ ಕಡಿಮೆಯಾಗುತ್ತಿರುವುದರಿಂದ ಜಲಾಶಯ ತುಂಬುತ್ತಿಲ್ಲ.
ಲಿಂಗನಮಕ್ಕಿ ಎಂಬ ಗ್ರಾಮದಲ್ಲಿ ಜಲಾಶಯ ಮತ್ತು ಅಣೆಕಟ್ಟು ನಿರ್ಮಾಣವಾದುದರಿಂದ ಲಿಂಗನಮಕ್ಕಿ ಅಣೆಕಟ್ಟು ಎಂದು ಹೆಸರು ಬಂದಿದೆ.  ಈ ಅಣೆಕಟ್ಟು ಜೋಗದಿಂದ 7 ಕಿ.ಮೀ ದೂರದಲ್ಲಿರುವ ಮಹಾತ್ಮಾಗಾಂಧಿ ವಿದ್ಯುದಾಗಾರಕ್ಕೆ ನೀರನ್ನು ಪೂರೈಸುತ್ತಿದೆ. ಜೊತೆಗೆ ಶರಾವತಿ ವಿದ್ಯುದಾಗರಕ್ಕೂ ಜೀವನಾಡಿಯಾಗಿದೆ. ಒಟ್ಟೂ ನಾಲ್ಕು ವಿದ್ಯುತ್ ಕೇಂದ್ರಗಳನ್ನು ಈ ಅಣೆಕಟ್ಟಿನ ನೀರಿನಿಂದ ನಡೆಸಲಾಗುತ್ತಿದೆ. ಲಿಂಗನಮಕ್ಕಿ ವಿದ್ಯುದಾಗಾರ ಹಾಗೂ ಗೇರುಸೊಪ್ಪಾ ವಿದ್ಯುದಾಗಾರ ಇನ್ನೆರಡು ವಿದ್ಯುದಾಗಾರಗಳು. ಗೇರುಸೊಪ್ಪಾ ಹೊನ್ನಾವರ ತಾಲೂಕು ವ್ಯಾಪ್ತಿಯಲ್ಲಿದೆ.
ಲಿಂಗನಮಕ್ಕಿ ಅಣೆಕಟ್ಟು 59.13 ಮೀಟರ್ ಎತ್ತರವಾಗಿದ್ದು, 2749 ಮೀಟರ್ ಉದ್ದವಿದೆ. 1992 ಚದರ ಕಿ. ಮೀ. ಗಳಷ್ಟು ಜಲಾನಯನ ಪ್ರದೇಶವನ್ನು ಹೊಂದಿದೆ. ಹೆಚ್ಚುವರಿ ನೀರಿನ ಬಿಡುಗಡೆಗಾಗಿ 11 ರೇಡಿಯಲ್ ಗೇಟುಗಳನ್ನು ಅಳವಡಿಸಲಾಗಿದೆ. ಮಳೆಗಾಲದಲ್ಲಿ ಜಲಾಶಯ ನಿಗದಿತ ಮಟ್ಟ ತುಂಬುತ್ತಿದ್ದಂತೆಯೇ ಈ ಗೇಟುಗಳನ್ನು ತೆರೆಯಲಾಗುತ್ತದೆ. ಆಗ ಜಲಾಶಯ ಭೋರ್ಗರೆಯುವ ರೀತಿ, ಹಾಲಿನ ಹೊಳೆಯೇ ಉಕ್ಕುತ್ತಿದೆಯೇನೋ ಎನ್ನುವಂತೆ ಭಾಸವಾಗುವ ರೀತಿಯಲ್ಲಿ ನೀರಿನ ಧಾರೆ ಧುಮ್ಮಿಕ್ಕುವುದು ಅವರ್ಣನಿಯ. ಇದರ ವೀಕ್ಷಣೆ ಸಹ ಒಂದು ಅಪೂರ್ವ ಅವಕಾಶ.  
ರಾಜ್ಯದ ಪ್ರಮುಖ ಜಲ ವಿದ್ಯುತ್ ಉತ್ಪಾದನಾ ಕೇಂದ್ರವಾದ, ರಾಜ್ಯದ ವಿದ್ಯುತ್ ಬೇಡಿಕೆಯಲ್ಲಿ ಶೇ. 30 ರಷ್ಟು ವಿದ್ಯುತ್ ಪೂರೈಕೆ ಮಾಡುವ ಹಾಗೂ ಏಷ್ಯಾ ಖಂಡದಲ್ಲಿಯೇ ಅತ್ಯಂತ ಕಡಿಮೆ ವೆಚ್ಚದಲ್ಲಿ ವಿದ್ಯುತ್ ಉತ್ಪಾದಿಸುವ ಹೆಗ್ಗಳಿಕೆಗೆ ಪಾತ್ರವಾದ  ಲಿಂಗನಮಕ್ಕಿ ಜಲಾಶಯದಲ್ಲಿ ಸದ್ಯ ನೀರಿನ ಪ್ರಮಾಣ 1740.08 ಅಡಿಯಷ್ಟಿದೆ. 1715 ಅಡಿ ತಲುಪಿದೊಡನೆ ನೀರು ಹರಿವನ್ನು ಸ್ಥಗಿತಗೊಳಿಸಲಾಗುತ್ತದೆ. ಕಳೆದ ವರ್ಷ ಇದೇ ಅವಧಿಗೆ 1768.45ರಷ್ಟಿತ್ತು. ಅಂದರೆ ಕಳೆದ ಮಳೆಗಾಲದಲ್ಲಿ ಕಡಿಮೆ ಮಳೆ ಬಿದ್ದ ಪರಿಣಾಮ ನೀರಿನ ಪ್ರಮಾಣವು ಕುಸಿತವಾಗಿತ್ತು.  2016ರಲ್ಲಿ ಡ್ಯಾಂನಲ್ಲಿ ನೀರು  1800 ಅಡಿಯನ್ನೂ ದಾಟಿಲ್ಲ. ಇದರಿಂದಾಗಿ ಆಗಲೇ ನೀರಿನ ಕೊರತೆಯನ್ನು ಅಂದಾಜಿಸಲಾಗಿತ್ತು.
ಡ್ಯಾಂನಲ್ಲಿ ನೀರಿನ ಸಂಗ್ರಹ ಕಡಿಮೆಯಿರುವುದನ್ನರಿತ ಇಂಧನ ಇಲಾಖೆಯು, ಲಿಂಗನಮಕ್ಕಿ ವಿದ್ಯುದಾಗಾರ ಸೇರಿದಂತೆ ರಾಜ್ಯದ ಜಲ ವಿದ್ಯುತ್ ಉತ್ಪಾದನಾ ಕೇಂದ್ರಗಳಿಂದ ಉತ್ಪಾದಿಸುವ ವಿದ್ಯುತ್‌ನ ಪ್ರಮಾಣವನ್ನು ಕಡಿಮೆ ಮಾಡಿದೆ. ಉಷ್ಣ ವಿದ್ಯುತ್ ಸ್ಥಾವರಗಳಿಂದ ಹೆಚ್ಚಿನ ಪ್ರಮಾಣದಲ್ಲಿ ವಿದ್ಯುತ್ ಉತ್ಪಾದನೆ ಮಾಡುತ್ತಿದೆ.
ಸದ್ಯ ಡ್ಯಾಮ್‌ನ ತಗ್ಗು ಪ್ರದೇಶದಲ್ಲಿ ಮಾತ್ರ ನೀರಿದೆ. ಅದನ್ನೇ ಕಾಲುವೆಗಳ ಮೂಲಕ ಹರಿಸಲಾಗುತ್ತಿದೆ. ಈಗ ಇದು ನೋಡಲು ರಮಣೀಯ ಸ್ಥಳ. ಅಲ್ಲಲ್ಲಿ ಖಾಲಿಜಾಗದಲ್ಲಿ ಹುಲುಸಾಗಿ ಹುಲ್ಲುಗಳು ಬೆಳೆದಿದ್ದು, ಸುತ್ತಮುತ್ತಲ ಗ್ರಾಮದ ದನಕರುಗಳು ಮೇಯುತ್ತಿವೆ. ಅಣೆಕಟ್ಟು ನಿರ್ಮಾಣವಾಗುವ ಮುನ್ನ ಇದ್ದ ಕೆಲವು ಗಿಡಮರಗಳು ಇಂದಿಗೂ ತಮ್ಮ ಅಸ್ಥಿಪಂಜರವನ್ನು ಉಳಿಸಿಕೊಂಡಿವೆ. ಬೆಳ್ಳಕ್ಕಿಗಳು ಬೇಟೆಗೆ ಸಿದ್ಧವಾಗಿ ಕುಳಿತಿರುವ ದೃಶ್ಯಗಳು ಮನಸೂರೆಗೊಳ್ಳುತ್ತವೆ.
 ಒಟ್ಟಾರೆ, ಅಣೆಕಟ್ಟಿನ  ಭವ್ಯತೆಯನ್ನು, ಸುಂದರ ದೃಶ್ಯವನ್ನು, ಸುತ್ತಮುತ್ತಲಿನ ಮನಮೋಹಕ ದೃಶ್ಯ, ಪರಿಸರವನ್ನು ಮನದಣಿಯೆ ಸವಿಯಬಹುದಾಗಿದೆ. ಅಣೆಕಟ್ಟು ತುಂಬಿದಾಗ ಎಲ್ಲೆಡೆ ನೀರೇ ಗೋಚರಿಸುವುದರಿಂದ ಸಂಪೂರ್ಣ ಸಮುದ್ರದಂತೆ ಗೋಚರಿಸುತ್ತದೆ. ಆದರೆ ಅದರ ತಳಭಾಗವನ್ನು, ಒಡಲಲ್ಲಿರುವ ಪ್ರದೇಶವನ್ನು ಈಗ ಕಾಣುವ ಅವಕಾಶ ಎದುರಾಗಿದೆ.

ಭರದಿಂದ ಸಾಗಿದೆ ಕಾಮಗಾರಿ
ಲಿಂಗನಮಕ್ಕಿ ಅಣೆಕಟ್ಟಿನಲ್ಲಿ ನೀರು ಸೋರಿಕೆಯಾಗುವುದನ್ನು ತಡೆಗಟ್ಟುವ ಕಾಮಗಾರಿ ನಡೆದಿದೆ. ಸುಮಾರು 18.41 ಕೋಟಿ ರೂ. ವೆಚ್ಚದ ಈ ಕಾಮಗಾರಿಯನ್ನು ಮುಂಬೈನ ಮೆ. ಐಟಿಡಿ ಇಂಡಿಯಾ ಎಂಬ ಕಂಪನಿಗೆ ವಹಿಸಲಾಗಿದೆ. ಈ ಕಂಪನಿಯು ದೇಶದ ಬಹುತೇಕ ಅಣೆಕಟ್ಟುಗಳಲ್ಲಿ ಕೆಲಸ ಮಾಡಿದ ಅನುಭವ ಹೊಂದಿದೆ.
 ವಾರ್ಷಿಕ ಸುಮಾರು 11.97  ಕ್ಯೂಸೆಕ್ಸ್‌ನಷ್ಟು ನೀರು ಇಲ್ಲಿಂದ ಸೋರಿಕೆಯಾಗುತ್ತಿತ್ತು. ವಿಶೇಷವೆಂದರೆ, ಸೋರಿಕೆಯಾಗುವ ನೀರನ್ನೂ ಸಹ ಲೆಕ್ಕ ಹಾಕುವ ಕೆಲಸ ಇಲ್ಲಿ ನಡೆಯುತ್ತದೆ. ಸೋರಿಕೆಯಿಂದ ನಷ್ಟ ಹೆಚ್ಚುತ್ತಿರುವುದನ್ನು ಮನಗಂಡು ಯೋಜನೆ ತಯಾರಿಸಿ ಕಾಮಗಾರಿಗೆ ಗುತ್ತಿಗೆ ನೀಡಲಾಗಿದೆ. ನೀರಿನ ಅಡಿಯಲ್ಲಿರುವ ಏಡಿಗಳು ಒಳಗಿಂದೊಳಗೆಯೇ ತೂತು ಮಾಡಿರುವುದರಿಂದ ನೀರು ಸೋರಿಕೆಯಾಗುತ್ತಿತ್ತು. ಸುಮಾರು 53ರ ಹರಯದ ಈ ಡ್ಯಾಮ್‌ನ ನಿರ್ಮಾಣ ತಂತ್ರಜ್ಞಾನ ಹಳೆಯದಾಗಿರುವುದರಿಂದಲೂ ನೀರು ಸೋರಿಕೆಯಾಗುತ್ತಿತ್ತು. ಕಂಪನಿಯವರು ಅಣೆಕಟ್ಟೆಯ ಗೋಡೆಗೆ ತಂತಿಯ ತೆಳುವಾದ ಮೆಷ್ ಅಳವಡಿಸಿ ಸಂದಿಗಳಿಗೆ ಸಿಮೆಂಟನ್ನು ಉಪಕರಣಗಳಿಂದ ಶೂಟ್ ಮಾಡುತ್ತಾರೆ. ಖಾಲಿ ಇರುವ ಜಾಗಗಳಲ್ಲಿ ಅ ದು ಭದ್ರವಾಗಿ ಕುಳಿತುಕೊಳ್ಳುತ್ತದೆ. ಜೊತೆಗೆ ಇನ್ನು ಮುಂದೆ ಏಡಿ ಅಥವಾ ಯಾವುದೆ ಜಲಚರಗಳಿಗೆ ಅಲ್ಲಿ ಪ್ರವೇಶಿಸಲಾರದಂತಾಗುತ್ತದೆ. ನಂತರ ಮೆಷ್ ಕಾಣದಂತೆ ತೆಳುವಾಗಿ ಸಿಮೆಂಟ್ ಪ್ಲಾಸ್ಟರ್ ಮಾಡುತ್ತಾರೆ. ಇದರಿಂದ ಗೋಡೆ ಹೊಸದಾಗಿ ನಿರ್ಮಾಣವಾದಂತೆ ಕಾಣುತ್ತಿದೆ.
ಈಗ ನೀರಿನ ಪ್ರಮಾಣ ಕಡಿಮೆ ಇರುವದರಿಂದ ದುರಸ್ತಿಗೆ ಅನುಕೂಲವಾಗಿದೆ. ಎರಡು ವರ್ಷಗಳಿಂದ ಈ ಕಾಮಗಾರಿ ನಡೆಯುತ್ತಿದೆ. ಆದರೆ ಬೇಸಿಗೆಯ ದಿನದಲ್ಲಿ ನೀರು ಕಡಿಮೆಯಾದಾಗ ಮಾತ್ರ ಮಾಡುವ ಕೆಲಸ ಇದಾಗಿದೆ. ಅಣೆಕಟ್ಟೆಯ ಗೋಡೆಯ ಭಾಗದಲ್ಲಿ ನೀರನ್ನು ಕಡಿಮೆಮಾಡಿಕೊಂಡು ಅಲ್ಲಿಗೆ ಸಣ್ಣ ಬಾರ್ಜ್ ತರಹದ ಯಂತ್ರದ ಮೂಲಕ ತೆರಳಿ ತೀರ ಕ್ಲಿಷ್ಟಕರ ಮತ್ತು ಅಷ್ಟೇ ಸೂಕ್ಷ್ಮವಾದ ಈ ಕೆಲಸ ಮಾಡಲಾಗುತ್ತಿದೆ ಎಂದು ಇಂಜಿನಿಯರ್‌ಗಳು ವಿವರಿಸುತ್ತಾರೆ.  

 ವಿದ್ಯುದಾಗಾರಗಳ ತಾಯಿ  ಲಿಂಗನಮಕ್ಕಿ

ಲಿಂಗನಮಕ್ಕಿ ನೀರಿನಿಂದ ನಾಲ್ಕು ಪ್ರತಿಷ್ಠಿತ ವಿದ್ಯುದಾಗಾರಗಳು ನಡೆಯುತ್ತಿವೆ. ಇವುಗಳಲ್ಲಿ  ರಾಜ್ಯದ ಅತ್ಯಂತ ಜನಪ್ರಿಯವಾದ ಮಹಾತ್ಮಾ ಗಾಂಧಿ ವಿದ್ಯುದಾಗಾರವೂ ಒಂದು.
 ಜೋಗ ಜಲಪಾತದಿಂದ ಶರಾವತಿ ಕಣಿವೆ ರಸ್ತೆಯಲ್ಲಿ, ಹಾವಿನಂತೆ ಸಾಗುವ ರಸ್ತೆಯಲ್ಲಿ  7  ಕಿಮೀ ದೂರ ಸಾಗಿದಾಗ ಮಹಾತ್ಮಾ ಗಾಂಧಿ ವಿದ್ಯುದಾಗಾರ ಕಣ್ಮನ ಸೆಳೆಯುತ್ತದೆ. ಈ ರಸ್ತೆಯಲ್ಲಿ ಸಾಗುವಾಗ ಆಗುಂಬೆ ಘಾಟ್ ನೆನೆಪಿಗೆ ಬರುತ್ತದೆ. ಅಷ್ಟೊಂದು ಸಮೃದ್ಧವಾದ, ನೆರಳಿನ ಕಾಡು ಇಲ್ಲಿದೆ. ಅತ್ಯಂತ ಕೆಳಪ್ರದೇಶದಲ್ಲಿ ಇರುವ ಶರಾವತಿ ನದಿಯ ಸ್ವಲ್ಪ ನೀರನ್ನು ಬಳಸಿ ವಿದ್ಯುತ್ ಉತ್ಪಾದಿಸಲು ಒಟ್ಟು 8 ಘಟಕಗಳಿರುವ ಮಹಾತ್ಮಾಗಾಂಧಿ ಜಲವಿದ್ಯುತ್ ಕೇಂದ್ರವನ್ನು 1948ರಲ್ಲಿ ಸ್ಥಾಪಿಸಲಾಗಿದೆ. ಇದರ ಸಾಮರ್ಥ್ಯ 139.2 ಮೆಗಾವ್ಯಾಟ್‌ಗಳು.
  ಲಿಂಗನಮಕ್ಕಿ ಅಣೆಕಟ್ಟಿನ ಎಡದಂಡೆಯಲ್ಲಿ 27.5 ಮೆಗಾವ್ಯಾಟ್‌ನ ಎರಡು ಘಟಕಗಳು 1980ರಲ್ಲಿ ಆರಂಭವಾಗಿವೆ, ಇವುಗಳ ಒಟ್ಟು ಉತ್ಪಾದನಾ ಸಾಮರ್ಥ್ಯ 55 ಮೆಗಾವ್ಯಾಟ್‌ಗಳು. ಲಿಂಗನಮಕ್ಕಿ ವಿದ್ಯುದಾಗರದಲ್ಲಿ ವಿದ್ಯುತ್ ಉತ್ಪಾದನೆಯ ನಂತರ ಹೊರಬಂದ ನೀರು ಮಳಲಿ ಸುರಂಗ ಹಾಗೂ ಹೆಚ್ಚುವರಿ ನೀರುವಾಹಕ  ವ್ಯವಸ್ಥೆ ಮೂಲಕ ತಲಕಳಲೆ ಅಣೆಕಟ್ಟನ್ನು ಸೇರುತ್ತದೆ. ತಲಕಳಲೆ ಜಲಾಶಯದಿಂದ ವಡನ್‌ಬೈಲ್ ಸುರಂಗಮಾರ್ಗ, ಸರ್ಜಾ ಟ್ಯಾಂಕ್ ಹಾಗೂ ಕೊಳವೆ ಮೂಲಕ ಶರಾವತಿ ವಿದ್ಯುದಾಗಾರಕ್ಕೆ ನೀರನ್ನು ಪೂರೈಸಲಾಗುತ್ತದೆ.
ಶರಾವತಿ ವಿದ್ಯುದಾಗಾರದಲ್ಲಿ  ಒಟ್ಟು 10 ಘಟಕಗಳಿವೆ. ಇವುಗಳ ಒಟ್ಟು ಉತ್ಪಾದನಾ ಸಾಮರ್ಥ್ಯ 1035 ಮೆಗಾವ್ಯಾಟ್. ಈ ವಿದ್ಯುದಾಗಾರದಲ್ಲಿ ವಿದ್ಯುತ್ ಉತ್ಪಾದನೆ ಮಾಡಿ ಬಿಡುಗಡೆಯಾದ ನೀರನ್ನು ಗೇರುಸೊಪ್ಪ ಅಣೆಕಟ್ಟಿನಲ್ಲಿ ಸಂಗ್ರಹಿಸಿ ಅಲ್ಲಿಯೂ ನಿರ್ಮಿಸಲಾಗಿರುವ ವಿದ್ಯುದಾಗಾರದ 4 ಘಟಕಗಳಿಂದ ಒಟ್ಟು 240 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆ ಮಾಡಲಾಗುತ್ತಿದೆ. ಗೇರುಸೊಪ್ಪಾ ವಿದ್ಯುದಾಗಾರದಿಂದ ಬಿಡುಗಡೆಯಾದ ನೀರು ಹೊನ್ನಾವರದ ಬಳಿ  ಅರಬ್ಬಿ ಸಮುದ್ರವನ್ನು ತಲುಪುತ್ತದೆ.      
 ಶರಾವತಿ ನದಿಯು ಇವೆಲ್ಲದಕ್ಕ್ಕೂ ಮೂಲ. ಅಂಬುತೀರ್ಥದ ಬಳಿ 730 ಅಡಿ ಎತ್ತರದ ಪ್ರದೇಶದಲ್ಲಿ ಹುಟ್ಟುವ ನದಿ ಆನಂತರ ಸುಮಾರು 132 ಕಿ. ಮೀ. ಉದ್ದವಾಗಿ ಹರಿಯುತ್ತದೆ. ಈ ನದಿಯು ತನ್ನ ಹರಿವಿನ 80ನೆಯ ಕಿ. ಮೀ. ಬಳಿ ಜೋಗ ಜಲಪಾತವಾಗಿ 293 ಮೀಟರ್ ಎತ್ತರದಿಂದ ಧುಮುಕುತ್ತದೆ. ಇಲ್ಲಿಂದ ನೀರು ಶರಾವತಿ ವಿದ್ಯುದಾಗಾರಕ್ಕೂ ಪೂರೈಕೆಯಾಗುತ್ತದೆ.  


ನಂ. ವಿದ್ಯುತ್ ಉತ್ಪಾದನಾ ಘಟಕಗಳು   ಒಟ್ಟು ಘಟಕಗಳು  ಸಾಮರ್ಥ್ಯ ಒಟ್ಟೂ ಸ್ಥಾಪಿತ ಸಾಮರ್ಥ್ಯ (ಮೆಗಾವ್ಯಾಟ್‌ನಲ್ಲಿ)
1.  ಶರಾವತಿ ವಿದ್ಯುದಾಗಾರ              10            103.5       1035.00
2.  ಮಹಾತ್ಮಾ ಗಾಂಧಿ ವಿದ್ಯುದಾಗರ          8             43.63       139.30
3.  ಲಿಂಗನಮಕ್ಕಿ ವಿದ್ಯುದಾಗರ             2              13.20       55.00
4.  ಗೇರುಸೊಪ್ಪ ವಿದ್ಯುದಾಗರ              4               60           240.00
                            ವಿದ್ಯುತ್ ಉತ್ಪಾದನಾ ಒಟ್ಟು ಸಾಮರ್ಥ್ಯ  1469.20 ಮೆ.ವ್ಯಾಟ್


ಶರಾವತಿ ವಿದ್ಯುದಾಗಾರದ ದಾಖಲೆಗಳು
* 2007-08ರ ಸಾಲಿನಲ್ಲಿ ವಾರ್ಷಿಕ 5825 ಮಿಲಿಯನ್ ಯುನಿಟ್ ವಿದ್ಯುತ್ ಉತ್ಪಾದನೆ.
* ಕಾರ್ಯಕ್ಷಮತೆಗೆ ರಾಷ್ಟ್ರೀಯ ಮಟ್ಟದಲ್ಲಿ ನೀಡುವ ಪ್ರತಿಷ್ಠಿತ ಐಇಇಎಂಎ ಪವರ್ ಅವಾರ್ಡ್ 2009ರಲ್ಲಿ ಇದರ ಪಾಲು.
* 2013ರ ಮಾರ್ಚ್ ತಿಂಗಳೊಂದರಲ್ಲೇ 665.825 ಮಿಲಿಯನ್ ಯುನಿಟ್ ವಿದ್ಯುತ್ ಉತ್ಪಾದನೆ.
* 2012ರ ಮಾ. 13ರಂದು ಒಂದೇ ದಿನ 23.461 ಮಿಲಿಯನ್ ಯುನಿಟ್ ವಿದ್ಯುತ್ ಉತ್ಪಾದನೆ.

ವಿದ್ಯುತ್ ಅವಘಡ ಮತ್ತು ಪುನಃಶ್ಚೇತನ
ಶರಾವತಿ ವಿದ್ಯುದಾಗಾರದಲ್ಲಿ 2015ರ ಡಿ. 18ರಂದು  ಶಾರ್ಟ್ ಸರ್ಕ್ಯೂಟ್ ಆಗಿ ಅಗ್ನಿ ದುರಂತ ಸಂಭವಿಸಿತ್ತು. ಇದರಿಂದ ನಿಯಂತ್ರಣ ಕೊಠಡಿಯ ಕೇಬಲ್ ಪ್ರೊಟೆಕ್ಷನ್ ಮತ್ತು ಕಂಟ್ರೋಲ್ ಪ್ಯಾನೆಲ್ ಸಂಪೂರ್ಣ ಭಸ್ಮವಾಗಿತ್ತು. ಅಗ್ನಿ ಅವಘಡ ಸಂಭವಿಸಿದಾಕ್ಷಣ 9 ಘಟಕಗಳನ್ನು ಸುರಕ್ಷಿತವಾಗಿ ಸ್ಥಗಿತಗೊಳಿಸಲಾಗಿತ್ತು. ಇದರಿಂದ ಹೆಚ್ಚಿನ ಅನಾಹುತ ತಪ್ಪಿತು.್ತ 
ಈ ಅಗ್ನಿ ಅವಘಡದಿಂದ ಪ್ರಮುಖ ಉಪಕರಣಗಳಾದ ಟರ್ಬೈನ್, ಜನರೇಟರ್, ಟ್ರಾನ್ಸ್‌ಫಾರ್ಮರ್ ಮತ್ತು ಬ್ರೇಕರ್‌ಗಳಿಗೆ ಯಾವುದೇ ಹಾನಿ ಸಂಭವಿಸಿರಲಿಲ್ಲ. ರಾಜ್ಯ ಸರ್ಕಾರ ಕರ್ನಾಟಕ ವಿದ್ಯುತ್ ಅಧಿನಿಯಮ (ಎ) ಪ್ರಕಾರ ತುರ್ತು ಪರಿಸ್ಥಿತಿ ಎಂದು ಘೋಷಿಸಿ ವಿದ್ಯುದಾಗಾರವನ್ನು ಪೂರ್ವಸ್ಥಿತಿಗೆ ತರಲು ನಿರ್ದೇಶಿಸಿತ್ತು. ಇದಕ್ಕನುಗುಣವಾಗಿ ಸುಟ್ಟುಹೋಗಿದ್ದ ಉಪಕರಣಗಳ ಸರಬರಾಜಿಗೆ ಮುಂಬೈನ ಮೆ. ಎ.ಬಿ.ಬಿ. ಲಿಮಿಟೆಡ್ ಕಂಪನಿಯೊಂದಕ್ಕೆ ಕಾರ್ಯಾದೇಶ ನೀಡಿತ್ತು. ಆದೇಶ ನೀಡಿದ 8 ದಿನದಲ್ಲೇ ಅದನ್ನು ತರಿಸಿಕೊಂಡು ಪುನರ್ಜೋಡಣೆ ನಡೆಸಲಾಗಿತ್ತು. ಇದರಿಂದಾಗಿ ಕೇವಲ  34 ದಿನದಲ್ಲಿ (ಒಟ್ಟೂ 10 ಘಟಕಗಳ ಪೈಕಿ) 7ನೆಯ ಘಟಕವನ್ನು ಮೊಟ್ಟಮೊದಲನೆಯದನ್ನಾಗಿ ಪುನರಾರಂಭಿಸಲು ಸಾಧ್ಯವಾಯಿತು.
 ನಂತರ ಒಟ್ಟೂ 178 ದಿನದಲ್ಲಿ  ಎಲ್ಲ 10 ಘಟಕವನ್ನು ಕಾರ್ಯಾರಂಭ ಮಾಡಲಾಯಿತು. ಇದು ನಿಗಮದ ಇತಿಹಾಸದಲ್ಲಿ ಹೊಸ ಮುನ್ನುಡಿ ಬರೆದಿದೆ. 
 - ವಿದ್ಯುದಾಗಾರದ ಮುಖ್ಯ ಇಂಜಿನಿಯರ್ ರವಿಚಂದ್ರ ಶಿರಾಲಿ.
.................................

Monday, 1 May 2017

ಮಾನ ಹರಾಜು ಹಾಕುತ್ತಿದೆ ಖಾಸಗಿ ಬಸ್ ನಿಲ್ದಾಣ
  ದಂಧೆಕೋರರ ತಾಣ, ಪುಂಡರ ಆಡುಂಬೊಲ, ಮಾನವಂತರಿಗೆ ಇಲ್ಲಿಲ್ಲ ರಕ್ಷಣೆ   









ರಾಜ್ಯದಲ್ಲೇ  ಮಾದರಿಯಾದ ಖಾಸಗಿ ಬಸ್ ನಿಲ್ದಾಣವನ್ನು ಶಿವಮೊಗ್ಗದಲ್ಲಿ ಬಿ ಎಸ್ ಯಡಿಯೂರಪ್ಪ ಮುಖ್ಯಮಂತ್ರಿಯಾದ ಕಾಲದಲ್ಲಿ 2010ರಲ್ಲಿ ಉದ್ಘಾಟಿಸಲಾಗಿದೆ. ಕೆಎಸ್ಸಾರ್ಟಿಸಿ ಬಸ್ ನಿಲ್ದಾಣಕ್ಕೆ ಹೊಂದಿಕೊಂಡೇ ಇರುವುದರಿಂದ ಪ್ರಯಾಣಿಕರಿಗೆ ಅತಿ ಉಪಯುಕ್ತವೂ ಇದು ಆಗಿದೆ. ನಗರಕ್ಕೆ ಕಲಶಪ್ರಾಯವಿಟ್ಟಂತೆ ಈ ಬಸ್ ನಿಲ್ದಾಣ ಎಂದು ಕೊಂಡಾಡಲಾಗಿತ್ತು. ಆನಂತರ  ಬಸ್ ನಿಲ್ದಾಣವನ್ನು ಯಾವತ್ತು ಪಾಲಿಕೆಗೆ ವಹಿಸಲಾಯಿತೋ ಅಂದಿನಿಂದ ಇದು ಸಂಪೂರ್ಣ ಕುಲಗೆಟ್ಟು ಹೋಗಿದೆ. ಕಲಶಪ್ರಾಯವಾಗುವ ಬದಲು ನಗರದ ಮಾನ ಹರಾಜು ಹಾಕುವ ಕೆಲಸಗಳು ಇಲ್ಲಿ ಹಾಡಹಗಲೇ ನಡೆಯುತ್ತಿವೆ. ಆದರೂ ತನಗೂ ಇದಕ್ಕೂ ಸಂಬಂಧ ಇಲ್ಲ ಎಂಬಂತೆ ಪಾಲಿಕೆ ಸುಮ್ಮನಿದೆ. ಇನ್ನೂ ವಿಶೇಷವೆಂದರೆ, ಹಾಲಿ ಮೇಯರ್ ಏಳುಮಲೈ ಅವರಿಗೆ ಸೇರಿದ ವಾರ್ಡಿನಲ್ಲಿ ಈ ಬಸ್ ನಿಲ್ದಾಣವಿದೆ. ದಿನಬೆಳಗಾದರೆ ಅವರೂ ಈ ಮಾರ್ಗದಲ್ಲೇ ಪಾಲಿಕೆಗೆ ಬರುತ್ತಾರೆ. (ಅವರ ಮನೆ ಇರುವುದು ಬಸ್ ನಿಲ್ದಾಣದಿಂದ ಕೂಗಳತೆಯ ದೂರದಲ್ಲಿ ) ಸಮಸ್ಯೆ ಅವರಿಗೆ ಗೊತ್ತಿದೆ. ಆದರೆ ಇನ್ನೂ ನಗರದ ಜೊತೆಗೆ ಪಾಲಿಕೆಯ ಮಾನವನ್ನೂ ಸಹ  ಉಳಿಸುವ ಕೆಲಸಕ್ಕೆ ಮುಂದಾಗಿಲ್ಲ.



* ಹಲವು ತಿಂಗಳಿನಿಂದ ರಾತ್ರಿ ಬೆಳಕೇ ಇಲ್ಲದೆ ಅಕ್ಕಪಕ್ಕದ ಅಂಗಡಿ, ಹ್ಯಾಲೊಜಿನ್ ಲೈಟಿನಲ್ಲಿ ಕಾಕಲಳೆಯುತ್ತಿರುವ ರಾಜ್ಯದ ಏಕೈಕ ಖಾಸಗಿ ಬಸ್ ನಿಲ್ದಾಣ.
* ಶಿಸ್ತು, ಸ್ವಚ್ಛತೆ, ಇಲ್ಲ. ಗಬ್ಬು ನಾರುತ್ತಿವೆ ಚರಂಡಿ.
*  ಬೈಕ್ ಸವಾರರ ಆಟಾಟೋಪ, ಒಂದೆಡೆಯಿಂದ ಇನ್ನೊಂಡೆದೆ ಸಾಗಲು ಅವರಿಗೂ ಬಸ್ ನಿಲ್ದಾಣನವೇ ರಹದಾರಿ. 
* ಪ್ರಯಾಣಿಕರಿಗೆ ರಕ್ಷಣೆ ಇಲ್ಲ, ಮಹಿಳೆ, ಯುವತಿಯರಿಗೆ ಪುಂಡರ ಕಾಟ. ಸರಗಳ್ಳತನ. ಪಿಕ್‌ಪಾಕೆಟ್ ಸಂಭವಿಸಿದರೆ ಪೊಲೀಲಿಸರಿಲ್ಲ.
* ಉಪಯೋಗವಿಲ್ಲದೆ ಹಾಳುಬಿದ್ದಿದೆ ಸಿಸಿ ಕ್ಯಾಮರಾ 
* ಪ್ರತಿ ಕಂಬಗಳಿಗೂ ಜಾಹೀರಾತು ಪತ್ರ ಅಂಟಿಸಿ ಇವು ಕಂಬಗಳೇ ಎನ್ನುವ ಸಂಶಯ ಬರುವಂತೆ ವಿರೂಪಗೊಳಿಸಲಾಗಿದೆ.
* ಬಸ್ ಆಗಮನ, ನಿರ್ಗಮನದಲ್ಲಿ ಶಿಸ್ತಿಲ್ಲ. ಎಲ್ಲಿ ಬೇಕಾದರೂ ಬರಬಹುದು, ಹೋಗಬಹುದು, ನಡೆದಾಡುವವರ ಸ್ಥಿತಿ ಅಯೋಮಯ
* ಕ್ಯಾಂಟೀನ್ ಬಾಗಿಲು, ಮೀಟರ್ ಬೋರ್ಡ, ಸ್ವಿಚ್ ಬೋರ್ಡ್ ಮುರಿಯಲಾಗಿದೆ. ಕಿಟಕಿ ಗಾಜು ಒಡೆಯಲಾಗಿದೆ. 
* ಸಂಜೆಯಾಯಿತೆಂದರೆ ಗಿರಾಕಿಗಳನ್ನು ಹುಡುಕುವವರೇ ಜಾಸ್ತಿ. ಕುಡುಕರ ಕಾಟ, ಮಾನವಂತರಿಗಿದು ಸ್ಥಳವಲ್ಲ.
* ತಿಂಡಿಗಾಡಿಗಳ ಕಾಟ, ಬಸ್ ನಿಲ್ದಾಣದೊಳಕ್ಕೆಯೇ ನುಗ್ಗಿ ಅಂಚಿನಲ್ಲಿ ಸಾಲಾಗಿ ನಿಲ್ಲುತ್ತಾರೆ. ಪ್ರಯಾಣಿಕರನ್ನು ಬಲವಂತವಾಗಿ ಅಡ್ಡಗಟ್ಟಿ ಕರೆಯುವ ಪದ್ದತಿ.
* ಪೊಲಿಸರು ಮತ್ತು ಸೆಕ್ಯೂರಿಟಿಗಳಿಲ್ಲದಿರುವ ರಾಜ್ಯದ ಏಕೈಕ ಬಸ್ ನಿಲ್ದಾಣ.
 
 
ಶಿವಮೊಗ್ಗ:  ಇಲ್ಲಿ ಕುಡಿದು ಬಂದು ಹಾಯಾಗಿ ಮಲಗಬಹುದು, ಭಿಕ್ಷುಕರು ಭಿಕ್ಷೆ ಬೇಡಬಹುದು, ಅಂಗವಿಕಲರು, ಮಾನಸಿಕ ಅಸ್ವಸ್ಥರು ಅಲ್ಲಿಯೇ ಗಲೀಜು ಮಾಡುತ್ತ ತಂಗಬಹುದು, ಅಂಗಡಿ ಇಟ್ಟುಕೊಂಡು ಬಳೆ, ಕರ್ಚೀಫ್, ರೋಲ್ಡ್‌ಗೋಲ್ಡ್ ಆಭರಣ, ಪರ್ಸ್, ಬೆಲ್ಟ್ , ತಿಂಡಿ-ತಿನಿಸು, ಹಣ್ಣುಗಳನ್ನು ಮಾರಬಹುದು. ಇವರ ಮಧ್ಯದಲ್ಲಿ ಬಸ್‌ಗೆ ಹೋಗುವವರು ಕುಳಿತುಕೊಳ್ಳಬೇಕು. ಇದು ಶಿವಮೊಗ್ಗ ಖಾಸಗಿ ಬಸ್ ನಿಲ್ದಾಣದ ದಯನೀಯ ಸ್ಥಿತಿ.
ಇಲ್ಲಿಯವರೆಗೆ ಯಾವ ಮೇಯರ್ ಕೂಡ ಇದರ ಬಗ್ಗೆ ತಲೆಕೆಡಿಸಿಕೊಂಡಿಲ್ಲ. ಸುವ್ಯವಸ್ಥೆ ಕಲ್ಪಿಸುವ ಗೋಜಿಗೆ ಬರಲೇ ಇಲ್ಲ. ಇಲ್ಲಿನ ಅನೈತಿಕ ವ್ಯವಹಾರ ತಡೆಗಟ್ಟಲಿಲ್ಲ. ಪೊಲೀಸ್ ಠಾಣೆ ಪಕ್ಕದಲ್ಲೇ ಇದ್ದರೂ ಅವರಿಗೆ ಇನ್ನೂ ವಿಷಯವೇ ಗೊತ್ತಿಲ್ಲ. ಇಲ್ಲಿನ  ಬಳೆ, ಕರ್ಚಿಫ್, ಇತರೆ ವಸ್ತುಗಳ  ವ್ಯಾಪಾರಸ್ಥರಿಗೂ ಹೇಳುವವರು- ಕೇಳುವವರು ಇಲ್ಲ.  ಒಟ್ಟಿನಲ್ಲಿ  ಅಪ್ಪ- ಅಮ್ಮ ಇಲ್ಲದ ಮಕ್ಕಳ ಸ್ಥಿತಿಯಲ್ಲಿದೆ ಬಸ್ ನಿಲ್ದಾಣ. ಹೋಗಲಿ, ಕನಿಷ್ಠ ಸೆಕ್ಯೂರಿಟಿಗಳೂ ಇಲ್ಲ.
 ಈ ಬಸ್ ನಿಲ್ದಾಣದ ದುರ್ಗತಿ, ಕೊಳಕು, ಇಲ್ಲಸಲ್ಲದ ವ್ಯವಹಾರ, ಸಂಜೆಯಾದರೆ ಅನೈತಿಕ ವ್ಯವಹಾರ  ಇದನ್ನೆಲ್ಲ ನೋಡಿದವರು ಯಾರೂ ಇಲ್ಲಿಗೆ ಮರಳಿ ಬರುವುದಿಲ್ಲ.  ಬಸ್ ನಿಲ್ದಾಣದ ಒಳಹೊಕ್ಕರೆ ಕನಿಷ್ಠ 10 ಭಿಕ್ಷುಕರು, ಅಸ್ವಸ್ಥರು ಕಾಣುತ್ತಾರೆ. ಪುಂಡ ಯುವಕರ ತಂಡ ಅಲಲೇ ಠಳಾಯಿಸಿರುತ್ತದೆ. ಬಸ್ ನಿಲ್ದಾಣದ ಗಲೀಜಿನಲ್ಲಿ ಅರ್ಧದಷ್ಟು ಪಾಲು ಇವರದ್ದೇ ಇರುತ್ತದೆ. ಗಲೀಜು ಮಾಡುತ್ತಾ, ಬಂದು ಹೋಗುವವರಿಗೆ ಕಿರಿಕಿರಿಯುಂಟು ಮಾಡುತ್ತಿದ್ದಾರೆ. ಅವರವರಲ್ಲೇ  ಗಲಾಟೆ ಮಾಡುವುದು, ದಾರಿಹೋಕರಿಗೆ ಬಯ್ಯುವುದನ್ನೂ ರೂಢಿಮಾಡಿಕೊಂಡಿದ್ದಾರೆ.
ಸಂಜೆಯಾಯಿತೆಂದರೆ ಮಾನವಂತರು ಇಲ್ಲಿಗೆ ಬರುವಂತಿಲ್ಲ. ಯುವಕರೇ ಕುಡಿದುಕೊಂಡು ಹೆಂಗಸರೊಂದಿಗೆ ಅನೈತಿಕವಾಗಿ ವರ್ತಿಸುವುದನ್ನು ಕಾಣಬಹುದು. ಕೆಲಸ ಮುಗಿಸಿ ಮನೆಗೆ ತೆರಳುವ ಯುವತಿ, ವಿವಾಹಿತ ಮಹಿಳೆಯರಿಗೂ ಇವರ ಕಾಟ. ಈ ಪುಂಡರನ್ನು ನಿಗ್ರಹಿಸುವ ಬಗ್ಗೆ ಯಾರೂ ಗಮನಹರಿಸಿಲ್ಲ. ಕಂಡು ಸುಮ್ಮನೆ ಹೋಗುತ್ತಾರೆ. ಇವರೊಟ್ಟಿಗೆ ಅಲ್ಲಿಯೇ ಕಾಲಕಳೆಯುವ ಒಂದಷ್ಟು ನಿರ್ಗತಿಕರು ಸೇರಿಕೊಳ್ಳುತ್ತಾರೆ. ಮಾನ-ಮರ್ಯಾದೆ ಬಿಟ್ಟು ಬಹಿರಂಗವಾಗಿಯೇ ಇವರ ಚೆಲ್ಲಾಟ ಆರಂಭವಾಗುತ್ತದೆ. ಇನ್ನೂ ಮೀಸೆ ಮೂಡದ ಯುವಕರ ಹಾವಳಿ ಇಲ್ಲಿ ಹೆಚ್ಚು.    
ಪ್ರಯಾಣಿಕರಿಗೂ ಕಾಳಜಿ ಇಲ್ಲ:
ಕನಿಷ್ಠ ಜ್ಞಾನವೂ ಇಲ್ಲದಂತೆ ಪ್ರಯಾಣಿಕರೂ ಸಹ ಇಲ್ಲಿ ಕೊಳಕು ಮಾಡುತ್ತಿದ್ದಾರೆ. ಕಂಡಕಂಡಲ್ಲಿ ಉಗುಳುವುದು, ತಿಂಡಿ ತಿಂದ ಪೇಪರ್, ಉಳಿದ ತಿಂಡಿಗಳನ್ನು ಎಸೆಯುತ್ತಾರೆ, ಗುಟ್ಕಾ ತಿನ್ನುವವರಿಂದಲೇ ಅರ್ಧದಷ್ಟು ಬಸ್ ನಿಲ್ದಾಣ ಕೆಂಪಾಗಿದೆ. ಕುಳಿತಲ್ಲೇ ಹಿಂದುಮುಂದೆ ನೋಡದೆ ಪಿಚಕ್ಕನೆ ಉಗಿಯುತ್ತಾರೆ. ಹಣ್ಣಿನ ಸಿಪ್ಪೆ, ಚಾಕಲೇಟ್, ತಿಂಡಿಗಳ ಕವರ್ ಎಸೆಯುತ್ತಾರೆ. ಬಸ್  ನಿಲ್ದಾಣವನ್ನು ಶುಚಿಯಾಗಿಡಬೇಕೆಂಬ ಅರಿವೇ ಇಲ್ಲದಂತೆ ವರ್ತಿಸುತ್ತಿದ್ದಾರೆ.
ಕತ್ತಲ ಕೂಪ:
ನಂಬಲಸಾಧ್ಯವಾದರೂ ನಂಬಲೇ ಬೇಕಾದ ವಿಚಾರ ಇದು. ಈ ಬಸ್ ನಿಲ್ದಾಣಕ್ಕೆ ಕೆಲವು ತಿಂಗಳಿಂದ ವಿದ್ಯುತ್ ದೀಪವಿಲ್ಲ. ವಿದ್ಯುತ್ ದೀಪದ ಸೌಕರ್ಯವಿದೆ. ಆದರೆ ದೀಪಗಳು ಉರಿಯುವುದಿಲ್ಲ. ಇಡಿ ಬಸ್ ನಿಲ್ದಾಣದೊಳಕ್ಕೆ ಒಂದೇ ಒಂದು ಟ್ಯೂಬ್‌ಲೈಟ್ ಅಥವಾ ಇನ್ನಿತರ ಲೈಟ್ ಬೆಳಗುವುದಿಲ್ಲ. ಅಕ್ಕಪಕ್ಕದ ಅಂಗಡಿಗಳು ಮತ್ತು ಹ್ಯಾಲೊಜಿನ್ ಲೈಟ್‌ಗಳೇ ಬಸ್ ನಿಲ್ದಾಣದ ದೀಪಗಳು. ಇಷ್ಟೊಂದು ಅವ್ಯವಸ್ಥೆ ತಾಂಡವವಾಡುತ್ತಿದ್ದರೂ, ಸಾವಿರಾರು ನಾಗರಿಕರು ಹಗಲು - ಸಂಜೆ ಎನ್ನದೆ ಬಸ್‌ಗೆ ಬರುತ್ತಿದ್ದರೂ ಕನಿಷ್ಠ ಮೂಲಸೌಕರ್ಯವೂ ಇಲ್ಲದೆ ಅವರು ತೆರಳುವಂತಾಗಿದೆ.
ಹೆಂಗಸರ ಶೌಚಾಲಯಕ್ಕೆ ಅಡ್ಡವಾಗಿ ಗೋಡೆ ಇಲ್ಲ. ಇದರಿಂದ ಒಳಗೆ ಹೋಗುವವರು ಮತ್ತು ಬರುವವರು ಮುಕ್ತವಾಗಿಯೇ ಕಾಣುತ್ತಾರೆ.ಇದು ಪುಂಡರಿಗೆ ಇನ್ನಷ್ಟು ಅನುಕೂಲ ಕಲ್ಪಿಸಿದೆ. ಅಕ್ಕಪಕ್ಕದಲ್ಲಿ ಅಂಗಡಿಗಳಿದ್ದರೂ ಅವರ‌್ಯಾರೂ ಕನಿಷ್ಠ ಅಡೆತಡೆ ನಿರ್ಮಿಸಿಕೊಳ್ಳಲು ಯೋಚಿಸಿಲ್ಲ. ಇನ್ನು ಬಸ್ ಬರುವ ಮತ್ತು ಹೋಗುವ ಮಾರ್ಗವನ್ನು ನಿಗದಿಗೊಳಿಸಿದ್ದರೂ ಅದನ್ನು ಅನುಸರಿಸುವವರು ವಿರಳ.  ಬಸ್ ನಿಲ್ದಾಣದ ಎದುರಿರುವ ಅಶೋಕ ಸರ್ಕಲ್‌ನಲ್ಲಿ ಪೊಲೀಸರು ಇಲ್ಲವೆಂದಾದಲ್ಲಿ ಸರ್ಕಲ್‌ನಲ್ಲೇ ನುಗ್ಗಿಸುತ್ತಾರೆ. ಬೈಕ್ ಸವಾರ ಉಪಟಳ ಮಿತಿಮಿರಿದೆ. ಕಂಡಕಂಡಲ್ಲೆಲ್ಲ ತಂದು ನಿಲ್ಲಿಸುತ್ತಾರೆ. ಮಿಳಘಟ್ಟ ರಸ್ತೆಯಿಂದ ಮುಖ್ಯರಸ್ತೆಗೆ  ಬರುವವರು ಬಸ್ ನಿಲ್ದಾಣದೊಳಕ್ಕೆಯೇ ಬೈಕ್‌ನಲ್ಲಿ ಬರುತ್ತಾರೆ.
ಸ್ವಚ್ಛತೆ ಇಲ್ಲಿ ಮರೀಚಿಕೆ, ನಗರದ ವಿವಿಧ ವಾರ್ಡುಗಳಲ್ಲಿ ಸಂಘಟನೆಯವರು ಸ್ವಚ್ಛಗೊಳಿಸುವ ಕಾರ್ಯಕ್ಕೆ ಮುಂದಾಗುತ್ತಾರೆ. ಅದರೆ ಬಸ್ ನಿಲ್ದಾಣದ ಕೊಳಕಿನ ಕೊಂಪೆಯೇ ಇದ್ದರೂ ಅದರ ಬಳಿ ಸುಳಿದಾಡುವವರೇ ಇಲ್ಲ. ಇಲ್ಲಿನ ಚರಂಡಿಗಳು ನಾರುತ್ತಿವೆ. ನೀರು ಹರಿಯದೆ ರೋಗರುಜಿನುಗಳ ತಾಣವಾಗಿವೆ. ಕಸಗಳ ರಾಶಿಯೇ ಹರಡಿದೆ. ಪ್ರತಿ ಕಂಬಗಳಿಗೂ ಜಾಹಿರಾತು ಪತ್ರ ಅಂಟಿಸಿ ಕೊಳಕು ಮಾಡಲಾಗಿದೆ. ಕಂಡಕಂಡಲ್ಲೆಲ್ಲ ಕರಪತ್ರ ಅಂಟಿಸಲಾಗಿದೆ. ಕುಳಿತುಕೊಳ್ಳುವ ಸ್ಥಳದಲ್ಲೇ ಮಾರಾಟದ ವಸ್ತುಗಳನ್ನು ಹರಡಿ ಇಟ್ಟುಕೊಂಡಿದ್ದರೂ ಅದನ್ನು ತಪ್ಪಿಸುವವರಿಲ್ಲ.
 ನಿರ್ಗತಿಕರ ಕೇಂದ್ರ!:
ಅನಾಥರು ಮತ್ತು ಭಿಕ್ಷುಕರು ಹಗಲಿಡಿ ಕಂಡಲ್ಲೆಲ್ಲ ಭಿಕ್ಷೆ ಬೇಡಿ ರಾತ್ರಿಯಾಯಿತೆಂದರೆ ಮಲಗಲು ಬಸ್ ನಿಲ್ದಾಣಕ್ಕೆ ಬರುತ್ತಾರೆ. ವಿಶಾಲವಾಗಿರುವ ಇಲ್ಲಿನ ಜಾಗದಲ್ಲಿ ಏನು ಮಾಡಿದರೂ ಕೇಳುವವರು ಹೇಳುವವರು ಇಲ್ಲದಿರುವುದರಿಂದ ಇವರ ಪಾಲಿಗೆ ಖಾಯಂ ಆಶ್ರಯತಾಣವಾಗುತ್ತಿದೆ.
  ಪಾಲಿಕೆ ಇಂತಹವರನ್ನು ನಿರ್ಗತಿಕ ತಾಣಕ್ಕೆ ಅಥವಾ ಭಿಕ್ಷುಕರ ಕೇಂದ್ರಕ್ಕೆ ಕಳುಹಿಸುವಲ್ಲಿ ವಿಫಲವಾಗಿದೆ. ಪ್ರತಿ ತಿಂಗಳು ಸುಮಾರು 100ರಷ್ಟು ಭಿಕ್ಷುಕರು ಖಾಸಗಿ ಬಸ್ ನಿಲ್ದಾಣಕ್ಕೆ ಬರುತ್ತಾರೆ ಎಂದು ಅಲ್ಲಿನ ಬಸ್ ಏಜೆಂಟರೊಬ್ಬರು ಹೇಳುತ್ತಾರೆ. ಮಾನಸಿಕ ಅಸ್ವಸ್ಥರನ್ನು ಕೆಲವರು ಇಲ್ಲಿಗೆ ತಂದುಬಿಡುವುದೂ  ಇದೆ. ಕೆಲವು ವೃದ್ಧರನ್ನು ಅವರ ಕುಟುಂಬದವರು ತಂದು ಭಿಕ್ಷೆಗೆ ಇಳಿಸಿದ ಉದಾಹರಣೆಯೂ ಇದೆ. ಪಾಲಿಕೆ ಇದನ್ನೆಲ್ಲ ತಡೆಗಟ್ಟದಿದ್ದರೆ ಇದೇ ಭಿಕ್ಷುಕರ ಮತ್ತು ಮಾನಸಿಕ ಅಸ್ವಸ್ಥರ, ನಿರ್ಗತಿಕರ ಕೇಂದ್ರವಾದರೂ ಆಶ್ಚರ್ಯವೇನಿಲ್ಲ.    
ಪಾಲಿಕೆಗೆ ಹೊಸ ಆಯುಕ್ತರು ಬಂದಿದ್ದಾರೆ. ಮೇಯರ್ ಸಹ ಇದೇ ವಾರ್ಡಿನವರಾಗಿರುವುದರಿಂದ ಅವರೊಡಗೂಡಿ ತಮ್ಮ ಕಾಲದಲ್ಲಾದರೂ ಇದು ಇನ್ನಷ್ಟು ಹೆಸರು ಗಳಿಸುವಂತಾಗಬೇಕಿದೆ. ಈಗಿರುವ ಅವ್ಯವಸ್ಥೆಯನ್ನೆಲ್ಲ ತೊಡೆದಹಾಕಿ ನಾಲ್ಕಾರು ಸೆಕ್ಯುರಿಟಿ ಗಾರ್ಡ್‌ಗಳನ್ನು ನೇಮಿಸಿ ನಿರ್ದಾಕ್ಷಿಣ್ಯವಾಗಿ ಸಣ್ಣಪುಟ್ಟ ವ್ಯಾಪಾರಸ್ಥರನ್ನು ದಂಧೆಕೋರರನ್ನು, ಪುಂಡರನ್ನು ಹೊರಹಾಕುವ ಕೆಲಸ ಮಾಡಬೇಕು. ಹೊರಊರಿನಿಂದ ಬರುವ ಪ್ರಯಾಣಿಕರಿಗೆ ತಂಗಲು, ಸೂಕ್ತ ಅವಕಾಶ ಕಲ್ಪಿಸಬೇಕು. ಮಳಿಗೆ ಇಟ್ಟುಕೊಂಡಿರುವ ವ್ಯಾಪಾರಸ್ಥರೂ ಸಹ ಹೆಚ್ಚು ದರ ವಿಧಿಸುತ್ತಿರುವ ಬಗ್ಗೆಯೂ  ದೂರು ಸಾಕಷ್ಟಿದೆ. ಅವರೂ ಸಹ ಬಸ್ ನಿಲ್ದಾಣದೊಳಕ್ಕೆಯೇ ತಮ್ಮ ಅಂಗಡಿಯ ವಸ್ತುಗಳನ್ನಿಡುತ್ತ  ಜಾಗವನ್ನು ಅತಿಕ್ರಮಿಸುತ್ತಿದ್ದಾರೆ. ಇದನ್ನೆಲ್ಲ ತಡೆಗಟ್ಟುವಂತಾಗಬೇಕು.
 ಸ್ಮಾರ್ಟ್ ಸಿಟಿಯಾಗುವ ಸಂದರ್ಭದಲ್ಲಿ ಇರುವಂತಹ ಮಾದರಿ ಬಸ್ ನಿಲ್ದಾಣವನ್ನೇ ನಾವು ಸ್ಮಾರ್ಟ್ ಮಾಡಿಕೊಳ್ಳದೇ ಇದ್ದರೆ ಸ್ಮಾರ್ಟ್ ಕಲ್ಪನೆಯೇ ನಮಗಿಲ್ಲ ಎನ್ನುವ ಸಂದೇಶ ನೀಡುತ್ತದೆ. ಮೊದಲು ಖಾಸಗಿ ಬಸ್ ನಿಲ್ದಾಣವನ್ನು ಪಾಲಿಕೆ ಸ್ಮಾರ್ಟ್ ಮಾಡಬೇಕಿದೆ.    
ಬಸ್ ನಿಲ್ದಾನ ಕೊನೆಯ ಭಾಗದಲ್ಲಿ ಕ್ಯಾಂಟಿನ್ ನಿರ್ಮಿಸಲಾಗಿದೆ. ಸದ್ಯ ಆ ಜಾಗ ಖಾಲಿ ಇರುವುದರಿಂದ ಅಲ್ಲಿ ಅನೈತಿಕ ವ್ಯವಹಾರಗಳೇ ನಡೆಯುತ್ತಿವೆ. ರಾತ್ರಿಯಂತೂ ಇಲ್ಲಿ ತಿರುಗಾಡುವಂತಿಲ್ಲ.  ಕ್ಯಾಂಟೀನಿನ ಬಾಗಿಲು ಮುರಿಸುಹಾಕಲಾಗಿದೆ. ಒಳಗೆಲ್ಲ ಗಲೀಜು ಮಾಡಲಾಗಿದೆ. ಮೀಟರ್ ಬೋರ್ಡ್, ಸ್ವಿಚ್  ಬೋರ್ಡುಗಳನ್ನೆಲ್ಲ ಮುರಿದಿರುವುದರಿಂದ  ವೈರ್‌ಗಳೆಲ್ಲ ಜೋತುಬಿದ್ದಿವೆ. ಇಲ್ಲಿ ಪೊಲೀಸರು ಸುಳಿಯುವುದಿಲ್ಲ. ಇದರಿಂದ ಪುಂಡರಿಗೆ- ಕಾಮುಕರಿಗೆ ಪ್ರಶಸ್ತ ಸ್ಥಳವಾಗಿದೆ.
,,,,,,,,,,,,,,,,,,,,,,,,,,,,,,,,,,,,,,,,,,

Wednesday, 26 April 2017


ಜಗದ ಕುರುಡಿಗೆ ಸಾಕ್ಷಿಯಾದ ‘ಅಂಧಯುಗ’



ಅಂಧಯುಗ ಮರಳಿ ಮರಳಿ ಬರುತಲಿದೆ, ಅಂಧಯುಗ ನಿರಂತರ ಎನ್ನುವ ಸಂದೇಶ ಸಾರುವ ಮಹಾಭಾರತದ ಕೆಲವು ಘಟನೆಗಳನ್ನು ಆಧರಿಸಿ ಪ್ರದರ್ಶಿಸಲ್ಪಟ್ಟ ಅಂಧಯುಗ ಕನ್ನಡ  ರೂಪಾಂತರದ ನಾಟಕ ಒಂದು ಹೊಸತನವನ್ನು ಬಿಂಬಿಸಲು ಯತ್ನಿಸಿದೆ. ನಗರದ ಕಮಲಾ ನೆಹರು ಕಾಲೇಜಿನ ಒಳಾಂಗಣದಲ್ಲಿ ಸೊಂಪಾಗಿ ಬೆಳೆದ ಗಿಡಮರಗಳ ಮಧ್ಯೆ, ಬಯಲು ರಂಗಮಂದಿರದಲ್ಲಿ ನಡೆದ ಈ ಪ್ರದರ್ಶನ ವಿಶೇಷವಾಗಿ ಆಧುನಿಕ ತಾಂತ್ರ್ರಿಕತೆಗೆ ಒತ್ತು ನೀಡಿತು. ಇದಕ್ಕಾಗಿ ಪರದೆ ಮತ್ತು ವೇದಿಕೆ ಎರಡನ್ನೂ ರಚಿಸಲಾಗಿತ್ತು. 80 ಅಡಿ ಉದ್ದದ ಮೂರು ವೇದಿಕೆಯನ್ನು ಅಷ್ಟೊಂದು ಪರಿಣಾಮಕಾರಿಯಾಗಿ ನಾಟಕ ಬಳಸಿಕೊಳ್ಳಲಿಲ್ಲ. ಹೊಸತನ ಮತ್ತು ತಾಂತ್ರಿಕತೆ ಜನರಿಗೆ ಇನ್ನೂ ಹತ್ತಿರವಾಗಬೇಕಿದೆ. ಆ ನಿಟ್ಟಿನಲ್ಲಿ ನಿರ್ದೇಶಕರು ಯತ್ನ ಮಾಡಬೇಕಿದೆ.


ಕಣ್ಣಿದ್ದೂ ಕುರುಡರಾಗುವುದು, ಕಿವಿಯಿದ್ದೂ ಕಿವುಡರಾಗುವುದು, ಬಾಯಿಯಿದ್ದೂ ಮೂಗರಾಗುವುದು ನಮ್ಮ ಜನರ ಹಾಡು-ಪಾಡು. ಕೆಲವರು ಕಣ್ಗುರುಡರಾದರೆ, ಮತ್ತೆ ಕೆಲವರು ಬಗೆಗುರುಡರಾಗಿರುವುದು ಈ ಜಗತ್ತಿನ ವಿಪರ್ಯಾಸವೇ ಸರಿ. ಮಹಾಭಾರತದ ಕಥೆ ನಮಗೆ ಹತ್ತಿರವಾಗುವುದೇ ಅಲ್ಲಿಯ ಪಾತ್ರಗಳ ಗುಣ ನಮ್ಮಲ್ಲಿಯೂ ಹುದುಗಿರುವುದರಿಂದಲೇ. ದಾಯಾದಿ ಕಲಹ, ವಾರಗಿತ್ತಿಯರ ಅಸೂಯೆ, ರಾಜಕೀಯ ಪಕ್ಷಪಾತಿತನ, ಸ್ವಾಮಿನಿಷ್ಠೆಯ ಅತಿರೇಕ, ಹೆಣ್ಣು ಕಾಲುಜಾರುವುದು ಇವೆಲ್ಲ ಅಂದೂ- ಇಂದೂ, ಮುಂದೂ ಇರುತ್ತದೆ ಎನ್ನುವುದಕ್ಕೆ ಮಹಾಭಾರತದ ಕಥೆ ಒಂದು ಜ್ವಲಂತ ಸಾಕ್ಷಿ. ಅಲ್ಲಿಯ ಕಣ್ಗುರುಡುತನ, ಬಗೆಗುರುಡುತನದ ದುಷ್ಪರಿಣಾಮಗಳೇನು ಎನ್ನುವುದನ್ನು ಎಳೆಎಳೆಯಾಗಿ ತೆರೆದಿಡುವ ವಿನೂತನ ಪ್ರಯತ್ನವೇ ಶಿವಮೊಗ್ಗ್ಗದ ‘ನಮ್ ಟೀಮ್’ ಎಪ್ರಿಲ್ 22 ಮತ್ತು 23ರಂದು ರಂಗದಲ್ಲಿ ಅಭಿನಯಿಸಿದ ‘ಅಂಧಯುಗ’ ನಾಟಕ!
ನಮ್ಮದು ಅಂಧ ಪರಂಪರೆ ಎನ್ನುವುದನ್ನು  ಮತ್ತೆ ಮತ್ತೆ ಪುನರುಚ್ಛರಿಸುವುದೇ ಈ ನಾಟಕ ತಿರುಳು. ನುರಿತ ಕಲಾವಿದರಿಂದಲೇ ಪ್ರದರ್ಶನಗೊಂಡ ಈ ನಾಟಕ ಬಹುತೇಕ ಸಹೃದಯರ ಮೆಚ್ಚುಗೆಗೆ ಪಾತ್ರವಾಯಿತು. ನಾಟಕದಲ್ಲಿ ಬರುವ ಪ್ರತಿಯೊಂದು ಪಾತ್ರವೂ ಒಂದೊಂದು ರೀತಿಯ ಅಂಧತ್ವದಿಂದ ವ್ಯವಹರಿಸುವುದು ನಾಟಕದ ವಿಶೇಷತೆ. ಹುಟ್ಟು ಕುರುಡನಾದ ಧೃತರಾಷ್ಟ್ರ ಒಂದೆಡೆಯಾದರೆ, ಗಂಡನಿಗಿಲ್ಲದ ಭಾಗ್ಯ ತನಗೇಕೆ ಎಂದು ಮೂಢಳಾಗಿ ಅಂಧತ್ವ ಒಪ್ಪಿಕೊಳ್ಳುವ, ಅಪ್ಪಿಕೊಳ್ಳುವ ಗಾಂಧಾರಿ, ತನ್ನ ಸ್ವಾಮಿಯ ಸಾವಿನ ಸೇಡಿನಿಂದ ಕೃದ್ಧನಾದ ಅಶ್ವತ್ಥಾಮನ ಬಗೆಗುರುಡುತನ, ಸಂಶಯದ ಮೊಟ್ಟೆಗೆ ಕಾವು ಕೊಡುತ್ತಲೇ ಹೋಗುವ ಸಂಜಯನ ಅಂಧತ್ವ ರಂಗದಲ್ಲಿ ಅತ್ಯಂತ ಯಶಸ್ವಿಯಾಗಿ ಮೂಡಿಬಂದಿದೆ.
ಧರ್ಮವೀರ್ ಭಾರತಿ ಅವರ  ‘ಅಂಧಯುಗ್’ ಹಿಂದಿ ನಾಟಕವನ್ನು ಕನ್ನಡಕ್ಕೆ ಅನುವಾದಿಸಿದವರು ಪ್ರೊ. ಸಿದ್ದಲಿಂಗ ಪಟ್ಟಣಶೆಟ್ಟಿ. ಈ ಕಥೆಯನ್ನು ರಂಗಭೂಮಿಗೆ ತಕ್ಕಂತೆ ಮಾರ್ಪಾಟು ಬೇರ್ಪಾಟುಗಳನ್ನು ಮಾಡಿ ರಂಗಕ್ಕೆ ತಂದ ಹಿರಿಮೆ ಬೆಳ್ಳಿಮಂಡಲದ ಸಂಚಾಲಕ ವೈದ್ಯ ಅವರದ್ದು. ರಂಗಕಲಾವಿದ ಡಿ.ಎಂ ರಾಜಕುಮಾರ ಅವರು ಅಶ್ವತ್ಥಾಮನ ಪಾತ್ರದೊಳಕ್ಕೆ ಪರಕಾಯ ಪ್ರವೇಶ ಮಾಡಿದರೋ ಎನ್ನುವಂತೆ ಅಭಿನಯಿಸಿದ ಸಿಟ್ಟು, ಸೆಡವು, ಅಸಹನೆ, ವೀರಾವೇಶ ಆ ಪಾತ್ರ ಕಳೆಗಟ್ಟುವಂತೆ ಮಾಡಿತು. ಧ್ವನಿಯ ಏರಿಳಿತದೊಂದಿಗೆ, ಸ್ಫುಟವಾದ ಮಾತಿನೊಂದಿಗೆ ಸಂಜಯನ ಪಾತ್ರಕ್ಕೆ ಜೀವ ತುಂಬಿದವರು ಪ್ರಾಧ್ಯಾಪಕ ಎಚ್,ಎಸ್, ನಾಗಭೂಷಣ ಅವರು. ಈ ನಾಟಕದ ಮತ್ತೊಂದು ಮುಖ್ಯಪಾತ್ರವಾಗಿ ಎಲ್ಲರ ಗಮನ ಸೆಳೆದವರು ಗಾಂಧಾರಿಯ ಪಾತ್ರಧಾರಿ ಡಾ. ಪ್ರಕೃತಿ ಮಂಚಾಲೆ ಅವರು. ತನ್ನ ಮಕ್ಕಳ ಸಾವಿನಿಂದ ದುಃಖಿಸುವ ಆಕೆಯಲ್ಲಿ ಕೃಷ್ಣನ ಕುರಿತಾಗಿ ಮೂಡುವ ರೋಷ, ಕೃಷ್ಣನಿಗೆ ಶಾಪ ನೀಡುವ ಆಕೆಯ ದ್ವೇಷ, ಅಸಹಾಯಕಳಾದ ಆಕೆ ಅಸಹನೆಯಿಂದ ಕೊತಕೊತ ಕುದಿಯುವ ಪರಿಯನ್ನು ಮನೋಜ್ಞ ಅಭಿನಯದಿಂದ ತೋರಿಕೊಟ್ಟರು ಪ್ರಕೃತಿ ಅವರು.
ಕೃಪಾಚಾರ್ಯ ಪಾತ್ರದಲ್ಲಿ  ಜಿಲ್ಲಾ ವಾರ್ತಾಧಿಕಾರಿ ಜಿ. ಹಿಮಂತರಾಜು, ವಿದುರನಾಗಿ ಸುಧೀಂದ್ರರಾವ್ ತಮ್ಮ ತಾತ್ವಿಕ, ಸಾತ್ವಿಕ ಮಾತುಗಳಿಂದ ಪ್ರೇಕ್ಷಕರನ್ನು ತಲುಪುವಲ್ಲಿ ಯಶಸ್ವಿಯಾದರು. ಉಪನ್ಯಾಸಕ ಜಿ.ಆರ್. ಲವ, ಆರ್.ಎಸ್. ದಿನೇಶ್, ಪತ್ರಕರ್ತ ಹೊನ್ನಾಳಿ ಚಂದ್ರಶೇಖರ್, ನಾಗರಾಜ ತಮ್ಮ ಪಾತ್ರಗಳಿಗೆ ನ್ಯಾಯ ಒದಗಿಸಿದರು. ತೆರೆಯ ಮೇಲೆ ನಾಟ್ಯವಿದೂಷಿಯರಾದ ಡಾ. ಪವಿತ್ರಾ, ಡಾ. ಶುಭ್ರತಾ ಅವರ ನೃತ್ಯ ಅಳವಡಿಕೆ ನಾಟಕ ಇನ್ನಷ್ಟು ಕಳೆಗಟ್ಟುವಂತೆ ಮಾಡಿತು. ಇಲ್ಲಿ ಛಾಯಾಗ್ರಾಹಕ ಶಿವಮೊಗ್ಗ ನಂದನ್  ಅವರ ಛಾಯಾಗ್ರಹಣದ ಛಾಯೆ ಛಾಪು ಒತ್ತಿತ್ತು. ವಿಶೇಷ ಪಾತ್ರದಲ್ಲಿ (ವ್ಯಾಸ) ಕಾಣಿಸಿಕೊಂಡವರು ಅಪರ ಜಿಲ್ಲಾಧಿಕಾರಿ ಕೆ. ಚನ್ನಬಸಪ್ಪ ಅವರು.
  ಮೂರು ಅರ್ಥದ ವಿಶೇಷ ವೇದಿಕೆಯ ನಿರ್ಮಾಣ ಈ ನಾಟಕದ ಮತ್ತೊಂದು ವಿಶೇಷತೆ ಹೌದಾದರೂ ಅದನ್ನು ಸಮರ್ಥವಾಗಿ ಬಳಸದೇ ಇರುವುದು ನಿಜಕ್ಕೂ ನ್ಯೂನತೆ ಎಂದೇ ಹೇಳಬೇಕು. ಧ್ವನಿವರ್ಧಕದ ಸಣ್ಣಪುಟ್ಟ ಲೋಪಗಳು, ಬೆಳಕಿನ ಅಸಮರ್ಪಕ ನಿರ್ವಹಣೆ, ಕೆಲವು ಸಂದರ್ಭದ ನೀರಸ ರಂಗಗೀತೆಗಳು, ರಂಗಪರಿಕರಗಳನ್ನು ಬಳಸುವಾಗ ಅಲ್ಲಿನ ಸೂಕ್ಷ್ಮತೆಗೆ ಒತ್ತುಕೊಡದಿರುವುದು ನಾಟಕದ ಮೈನಸ್ ಪಾಯಿಂಟ್‌ಗಳು.
ವಿನೂತನ ಮಾದರಿಯಲ್ಲಿ 80 ಅಡಿ ಉದ್ದದ ವೇದಿಕೆ ರಚಿಸಲಾಗಿತ್ತಾದರೂ ಅದರ ಸಮರ್ಪಕ ಬಳಕೆ ಆಗಲಿಲ್ಲ. ಒಂದೊಂದು ದೃಶ್ಯವನ್ನು ಒಂದೊಂದು ವೇದಿಕೆಯಲ್ಲಿ ಅಭಿನಯಿಸಲಾಯಿತು. ಆದರೆ ಅದೇಕೋ ಪ್ರೇಕ್ಷಕರಿಗೆ ಇಷ್ಟವಾದಂತೆ ಕಂಡುಬರಲಿಲ್ಲ. ಹೊಸತನವನ್ನು ಅಳವಡಿಸುವಾಗ ಅದರ ಪರಿಣಾಮವನ್ನೂ ಗಮನಿಸಬೇಕು. ಒಂದೇ ದೊಡ್ಡ ವೇದಿಕೆಯನ್ನು ಅಂದರೆ ಎರಡನೆಯ ವೇದಿಕೆಯನ್ನೇ ಇನ್ನಷ್ಟು ಉತ್ತಮವಾಗಿ ಬಳಸಿಕೊಂಡು ನಾಟಕಕ್ಕೆ  ಮೆರುಗು ಸಿಗುವಂತೆ ಮಾಡಬಹುದಿತ್ತೇನೋ. ಪ್ರಾಕೃತಿಕ ಸನ್ನಿವೇಶವುಳ್ಳ  ಕಮಲಾ ನೆಹರೂ ಕಾಲೇಜಿನ ಒಳಾಂಗಣದಲ್ಲಿ ನಾಟಕವನ್ನು ತೆರೆದ ಬಯಲುರಂಗಮಂದಿರದಲ್ಲಿ ಅಭಿನಯಿಸಿದ್ದು ಎಲ್ಲರಿಗೂ ಖುಷಿ ಕೊಟ್ಟಿತು.
 ಇನ್ನೊಂದು ಮಹತ್ವದ ಅಂಶವೆಂದರೆ, ಪರದೆಯ ಮೇಲೆ ಕೆಲವು ಸನ್ನಿವೇಶಗಳನ್ನು ಮತ್ತು ಪಾತ್ರಗಳನ್ನು ತರುವ ಮೂಲಕ ಡಿಜಿಟಲೈಸೇಶನ್‌ಗೆ ನಾಟಕ ಮೊರೆ ಹೋದಂತೆ ಕಂಡುಬಂದಿತು. ಆದರೆ ಇದು ಹೆಚ್ಚು ರುಚಿಸಲಿಲ್ಲ. ಇದೇ ಪಾತ್ರವನ್ನು ರಂಗದ ಮೇಲೆ ತಂದಿದ್ದರೆ ಚೆನ್ನಾಗಿರುತ್ತಿತ್ತು. ಪರದೆಯ ಮೇಲೆ ಪಾತ್ರಗಳು ಮಾತನಾಡುವಾಗ ಕಲಾವಿದರು ರಂಗವೇದಿಕೆಯಲ್ಲಿ ಸುಮ್ಮನೆ ನಿಂತುಕೊಳ್ಳುವಂತಹ ಸನ್ನಿವೇಶ ಸೃಷ್ಟಿಯಾಯಿತು. ಇದು, ಅಷ್ಟೊಂದು ದೊಡ್ಡ ವೇದಿಕೆ ಸೃಜಿಸಿ ಅದಕ್ಕೆ ತಕ್ಕ ನ್ಯಾಯ ಕೊಡಲಿಲಲ್ಲ ಎನ್ನುವುದಕ್ಕೆ ಸಾಕ್ಷಿಯಾಯಿತು.
ಹೊಸತನವನ್ನು ಪ್ರಯೋಗ ಮಾಡುವುದು ಇಂದಿನ ಬಹುತೇಕ ನಿರ್ದೇಶಕರ ಕನಸು. ಈ ಸಂದರ್ದಲ್ಲಿ ಅವರು ಪ್ರೇಕ್ಷಕನನ್ನು ಮತ್ತು ಕಥೆಯ ಸೂಕ್ಷ್ಮತೆಯನ್ನೂ ಮರೆಯಬಾರದು.  ಅದು ಪ್ರೇಕ್ಷಕನನ್ನು ಎಷ್ಟರ ಮಟ್ಟಿಗೆ ಪರಿಣಾಮಕಾರಿಯಾಗಿ ತಲುಪಬಹುದು, ಅವರು ಅದನ್ನು ಹೇಗೆ ಸ್ವೀಕರಿಸಬಹುದು ಎನ್ನುವುದನ್ನು ಮೊದಲೇ ಚಿಂತನೆ ನಡೆಸಿ ಇಂತಹ ಸಾಹಸಕ್ಕೆ ಇಳಿದರೆ ಒಳ್ಳೆಯದು. ಇಲ್ಲದಿದ್ದರೆ ಹೊಸತನದ ಹೆಸರಿನಲ್ಲಿ ಉತ್ತಮ ನಾಟಕವೂ ಪ್ರದರ್ಶನದಲ್ಲಿ ಅಚ್ಚೊತ್ತದಂತಾಗಬಹುದು.
.......................................  

Friday, 21 April 2017

ಇದು ಬರಿ ಕಾಲೇಜಲ್ಲ, 
ಬದುಕು ರೂಪಿ(ಸಿದ)ಸುವ ವಿದ್ಯಾಮಂದಿರ



ಮಲೆನಾಡು ಮೊದಲಿನಿಂದಲೂ ವಿದ್ಯೆಯ ತವರೂರು. ಈ ವ್ಯಾಪ್ತಿಯಲ್ಲಿ ಬರುವ ನಾಲ್ಕಾರು ಜಿಲ್ಲೆಯ ಜನರು ಬುದ್ಧಿವಂತರೆಂದು ಗುರುತಿಸಲ್ಪಟ್ಟವರು. ಏಕೆಂದರೆ ಬಹುಹಿಂದಿನಿಂದಲೂ ಇಲ್ಲಿ ಉತ್ತಮ ಶಿಕ್ಷಣ ಕೇಂದ್ರಗಳಿವೆ. ಎಷ್ಟೇ ಕಷ್ಟವಾದರೂ, ಎಷ್ಟೇ ದೂರವಿದ್ದರೂ ಕಾಲ್ನಡಿಗೆಯಲ್ಲೇ ಹತ್ತಾರಿ ಕಿಲೋಮೀಟರ್ ನಡೆದು ಕಾಲೇಜು ಕಲಿಕೆಗೆ ಮುಂದಾಗುತ್ತಿದ್ದರು. ತಾಲೂಕಿಗೊಂದು ಕಾಲೇಜು ಆಗಿಲ್ಲದಿದ್ದರೂ ಜಿಲ್ಲಾ ಕೇಂದ್ರದಲ್ಲಿ ಹೆಸರಾಂತ ಸರ್ಕಾರಿ ಅಥವಾ ಖಾಸಗಿ ವಿದ್ಯಾಕೇಂದ್ರಗಳು ಇದ್ದು, ಅಕ್ಷರಜ್ಞಾನ ನೀಡುತ್ತಿದ್ದವು. ಅಂದಿನಿಂದ ಇಂದಿನವರೆಗೂ ಅವು ತಮ್ಮ ಗುಣಮಟ್ಟವನ್ನು ಹೆಚ್ಚಿಸಿಕೊಳ್ಳುತ, ರಾಜ್ಯ, ರಾಷ್ಟ್ರಮಟ್ಟದಲ್ಲಿ ತಮ್ಮ ಹೆಸರನ್ನು ಬೆಳಗುತ್ತ ್ತ ಬಂದಿವೆ. ಇಂತಹ ಕಾಲೇಜುಗಳೆಲ್ಲ ಬಹುತೇಕ ಶತಮಾನೋತ್ಸವ ಆಚರಿಸುತ್ತಿವೆ. ಆ ಪೈಕಿ ಶಿವಮೊಗ್ಗದ ಸಹ್ಯಾದ್ರಿ ಕಾಲೇಜು ಸಹ ಒಂದಾಗಿದ್ದು, ಸಾವಿರಾರು ಶಿಕ್ಷನತಜ್ಞರನ್ನು, ವಿಜ್ಞಾನಿ, ನ್ಯಾಯವಾದಿಗಳನ್ನು ,ವಿಚಾರವಂತರನ್ನು, ಸಾಹಿತಿಗಳನ್ನು, ಕಲಾವಿದರನ್ನು, ಚಿಂತಕರನ್ನು ನಾಡಿಗೆ ನೀಡಿದ ಕೀರ್ತಿ ಇದರದ್ದು. ಅದು ಈಗ ಸುವರ್ಣಮಹೋತ್ಸವದ ಹೊಸ್ತಿಲಲ್ಲಿದೆ.  


‘ಸಹ್ಯಾದ್ರಿ ಕಾಲೇಜು’ ಎಂಬ ಹೆಸರು ಹೇಳಿದರೆ ಮೈ ಪುಳಕಗೊಳ್ಳುತ್ತದೆ. ಏಕೆಂದರೆ ಇದು ಕೇವಲ ಕಾಲೇಜಲ್ಲ, ಇದೊಂದು ಚಿಂತನೆಯ, ಶೈಕ್ಷಣಿಕ, ಸಾಂಸ್ಕೃತಿಕ, ನೆಲೆವೀಡು. ಅನೇಕ ಹೋರಾಟಗಳಿಗೆ ಕಾರಣವಾದ, ಸ್ಫೂರ್ತಿ ನೀಡಿದ, ಚೈತನ್ಯ ಚಿಲುಮೆಯ ಸ್ಥಳ. ಅನೇಕರ ಜೀವನಕ್ಕೆ ಬೆಳಕು ಚೆಲ್ಲಿದ, ದಾರಿದೀಪವಾದ ರಾಜ್ಯದ ಅತ್ಯಂತ ಪ್ರತಿಷ್ಠಿತ ಕಾಲೇಜಾಗಿ ಸಾವಿರಾರು ಮಕ್ಕಳು ಪ್ರತಿವರ್ಷ ಪದವಿ ಪಡೆದು ಸದಾ ಸ್ಮರಣೆ ಮಾಡುವ ವಿದ್ಯಾ ಕ್ಷೇತ್ರ.
ನೂರಾರು ಎಕರೆ ವಿಸ್ತೀರ್ಣದಲ್ಲಿ ನಗರದ ಹೊರಭಾಗದಲ್ಲಿ ಮೈದಳೆದು ನಿಂತಿರುವ, ಅತ್ಯಾಧುನಿಕ ಬೃಹತ್ ಕಟ್ಟಡಗಳಿಂದ ಆಕರ್ಷಿಸುತ್ತಿರುವ, ಸಹ್ಯಾದ್ರಿ ಎಂಬ ಹೆಸರಿಗೆ ಮೆರುಗು ತಂದುಕೊಡುವಂತೆ ಸುತ್ತಮುತ್ತ ಹಸಿರಿನಿಂದ, ಉದ್ಯಾನವನದಿಂದ ಶಿಕ್ಷಣಪ್ರಿಯರನ್ನು ಕೈಬೀಸಿ ಕರೆಯುತ್ತಿದೆ ಈ ಜ್ಞಾನದೇಗುಲ. ಅನೇಕ ಬಡವರಿಗೆ ಆಶಾಕಿರಣವಾಗಿ, ಮಲೆನಾಡಿನ ಹಿರಿಮೆಯನ್ನು ಹೆಚ್ಚಿಸಿದ ಈ ವಿದ್ಯಾಮಂದಿರ ಮುಕುಟಪ್ರ್ರಾಯವಾಗಿ ಶೋಭಿಸುತ್ತಿದೆ. ರಾಷ್ಟ್ರಕವಿ ಕುವೆಂಪು ಆಗಾಗ ಭೇಟಿಕೊಡುತ್ತಿದ್ದ ಅಕ್ಷರಮಂದಿರ ಇದಾಗಿದೆ, ಇದರ ಪ್ರತಿಷ್ಠೆ, ಘನತೆ, ಜ್ಞಾನವೈಭವವನ್ನು ನಾವು ಗಮನಿಸಬಹುದಾಗಿದೆ.
  ಸಹ್ಯಾದ್ರಿ ಕಾಲೇಜು 75ರ ಹರಯದಲ್ಲಿದೆ. ಮಲೆನಾಡಿನ ಮಡಿಲಲ್ಲಿ ತಲೆಎತ್ತಿ ನಿಂತಿರುವ ಈ ಕಾಲೇಜಿಗೆ ರಾಜ್ಯದಲ್ಲಿ ವಿಶೇಷ ಸ್ಥಾನಮಾನವಿದೆ. ಕರ್ನಾಟಕದ ಯಾವ ಮೂಲೆಗೆ ಹೋಗಿ ಇದರ ಹೆಸರು ಹೇಳಿದರೂ ಪರಿಚಿತವಿದೆ. ಕರ್ನಾಟಕದ ನಾಲ್ಕಾರು ಎ ಗ್ರೇಡ್ ಕಾಲೇಜುಗಳಲ್ಲಿ ಇದೂ ಸಹ ಒಂದು ಎನ್ನುವುದು ಹೆಮ್ಮೆಯ ವಿಷಯ.
  1941ರಲ್ಲಿ ಮೈಸೂರು ಸಂಸ್ಥಾನದ ಮಹಾರಾಜ ಜಯಚಾಮರಾಜೇಂದ್ರ ಒಡೆಯರ್ ಅವರಿಂದ ಇಂಟರ್‌ಮೀಡಿಯೆಟ್ ಕಾಲೇಜಾಗಿ ಸ್ಥಾಪನೆಗೊಂಡು ಹಂತಹಂತವಾಗಿ ಬೆಳೆಯುತ್ತ 1956ರಲ್ಲಿ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಆಗಿ ಉನ್ನತೀಕರಣಗೊಂಡಿದೆ. ಈ ಕಾಲೇಜಿನ ಭವ್ಯತೆಯನ್ನು ಕಂಡು ರಾಷ್ಟ್ರಕವಿ ಕುವೆಂಪು 1962ರಲ್ಲಿ ತಾವು ಮೈಸೂರು ವಿವಿಯ ಕುಲಪತಿಯಾಗಿದಾಗ ಅರ್ಥಪೂರ್ಣವಾಗಿ ಸಹ್ಯಾದ್ರಿ ಕಾಲೇಜು ಎಂದು ಮರು ನಾಮಕರಣ ಮಾಡಿದ್ದಾರೆ.
ಅಲ್ಲಿಂದ ಇನ್ನೂ ಎತ್ತರಕ್ಕೆ ಬೆಳೆದು ಸಹ್ಯಾದ್ರಿ ಕಾಲೇಜು ತನ್ನ ಶೈಕ್ಷಣಿಕ ಮತ್ತು ಪ್ರಾಕೃತಿಕ ಸೆಳೆತದಿಂದ ಶಿವಮೊಗ್ಗ ಜಿಲ್ಲೆ ಮಾತ್ರವಲ್ಲದೆ, ಸುತ್ತಮುತ್ತಲಿನ ಅನೇಕ ಜಿಲ್ಲೆಗಳ ವಿದ್ಯಾರ್ಥಿಗಳನ್ನು ಸೂಜಿಗಲ್ಲಿನಂತೆ ತನ್ನತ್ತ ಸೆಳೆದು ಬೃಹತ್ ಮತ್ತು ಮಹತ್ ಎರಡರಲ್ಲೂ  ರಾಜ್ಯದ ಆಕರ್ಷಕ ಕಾಲೇಜೆನಿಸಿದೆ. 1984ರಲ್ಲಿ ಸಹ್ಯಾದ್ರಿ ಕಲಾ ಕಾಲೇಜು ಮತ್ತು ವಿಜ್ಞಾನ ಕಾಲೇಜು ಬೇರ್ಪಟ್ಟು 1992ರಲ್ಲಿ ಕುವೆಂಪು ವಿವಿಯ ಘಟಕ ಕಾಲೇಜಾಗಿ ಪರಿವರ್ತನೆಯಾಯಿತು. ಇದರಿಂದ ಇನ್ನಷು ವಿದ್ಯಾರ್ಥಿಗಳ ಪ್ರವೇಶಕ್ಕೆ ಅವಕಾಶವಾಯಿತು. ಇಂತಹ ಮಹತ್ವದ ಸಹ್ಯಾದ್ರಿ ಕಾಲೇಜು ಪ್ರಸ್ತುತ 75ನೆಯ ವರ್ಷದಲ್ಲಿದೆ.
ಸಹ್ಯಾದ್ರಿ ಕಾಲೇಜು ಎಂದರೆ ಅಲ್ಲಿನ ವಿಚಾರಸಂಕಿರಣಗಳು, ಕಾರ್ಯಾಗಾರಗಳು ಇಂದಿಗೂ ಹೆಸರುವಾಸಿಯಾಗಿವೆ. ಈ ವಿಚಾರಸಂಕಿರಣಗಳಿಗೆ ರಾಷ್ಟ್ರೀಯ ಮಟ್ಟದಲ್ಲಿ ಹೆಸರುಗಳಿಸಿದ ಪ್ರಾಧ್ಯಾಪಕರು, ಸಂಪನ್ಮೂಲ ವ್ಯಕ್ತಿಗಳು ಆಗಮಿಸುತ್ತಾರೆ. ಗ್ರಾಮ್ಷಿಯಂತಹ ಇಟಲಿಯ ವಿಚಾರವಾದಿಯ ಬಗ್ಗೆ ಇಲ್ಲಿ ಚಿಂತನೆ ನಡೆಯುತ್ತದೆ. ಕಲಿಯಲು ಆಸಕ್ತಿ ಉಳ್ಳವರಿಗೆ ಇದೊಂದು ಜ್ಞಾನದ ಆಗರ. ಇಲ್ಲಿ ನಡೆಯುವ ಪ್ರತಿ ಕಾರ್ಯಕ್ರಮಗಳೂ ಒಂದಿಲ್ಲೊಂದು ಹೊಸ ವಿಚಾರದ ಮೇಲೆ ಬೆಳಕು ಚೆಲ್ಲುವಂತಹವಾಗಿವೆ. ಜಿಲ್ಲೆಯ ಮತ್ತು ಅಕ್ಕಪಕ್ಕದ ಎಷ್ಟೋ ವಿಚಾರವಂತರು ಇಂತಹ ಕಾರ್ಯಾಗಾರಗಳಿಗೆ ತಪ್ಪದೇ ಬರುತ್ತಾರೆ. ಎಂದೂ ಮರೆಯಲಾಗದ ಜ್ಞಾನದ ಬುತ್ತಿಯನ್ನು ಇವು ನೀಡುತ್ತಿವೆ. ಜೊತೆಗೆ ಇಲ್ಲಿನ ಅಧ್ಯಾಪಕ ವೃಂದ ಸಹ ಅಪಾರ ಅನುಭವದಿಂದ ಕೂಡಿದೆ. ಬಹುತೇಕ ಹಿರಿಯ ಪ್ರಾಧ್ಯಾಪಕರೆಲ್ಲ ತಮ್ಮ ಜ್ಞಾನದ ಬಲದಿಂದಲೇ ಹೆಸರುವಾಸಿಯಾಗಿದ್ದಾರೆ. ಅಷ್ಟೇ ಏಕೆ, ನಾಡಿನ ಮೂಲೆಮೂಲೆಗೂ ಸಂಪನ್ಮೂಲ ವ್ಯಕ್ತಿಗಳಾಗಿ ತೆರಳುತ್ತಾರೆ.
ಇಂದಿಗೂ ಗುಣಮಟ್ಟದಲ್ಲಿ ಸಾಕಷ್ಟು ಬೆಳೆದು ಕೇವಲ ರಾಜ್ಯಮಟ್ಟದಲ್ಲಿ ಮಾತ್ರವಲ್ಲದೆ ರಾಷ್ಟ್ರಿಯ, ಅಂತಾರಾಷ್ಟ್ರಿಯ ಮಟ್ಟದಲ್ಲಿ ಹೆಸರಾಗಿದೆ. ಕುವೆಂಪು ವಿವಿಗೆ ಸೇರಿದ ನಂತರ ತನ್ನ ಬೆಳವಣಿಗೆಯ ವೇಗವನ್ನು ಇನ್ನಷ್ಟು ಹೆಚ್ಚಿಸಿಕೊಂಡಿದೆ. ಇಂತಹ ದೀರ್ಘ ಪರಂಪರೆಯ ಕಾಲೇಜು ಶ್ರೇಷ್ಠ ಸಾಧನೆಯನ್ನೂ ಮಾಡಿದೆ. ಶ್ರೇಷ್ಠ ಸಾಧಕರನ್ನು ಈ ನಾಡಿಗೆ ನೀಡಿದೆ. ರಾಷ್ಟ್ರೀಯ- ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಸಿದ್ಧಿ ಪಡೆದ ಹಲವರನ್ನು ಸೃಜಿಸಿದ ಕೀರ್ತಿ ಇದರದದ್ದು.
 ಅವರಲ್ಲಿ ಕೆಲವರೆಂದರೆ-ವಿಜ್ಞಾನ ಕ್ಷೇತ್ರದಲ್ಲಿ ಭಾರತ ರತ್ನ ಪಡೆದ ಪ್ರೊ. ಸಿಎನ್‌ಆರ್ ರಾವ್, ಡಾ. ಕೆ.ಎ. ಅಶೋಕ್ ಪೈ, ಪದ್ಮಶ್ರೀ ಡಾ. ಬಿ.ಎನ್. ಸುರೇಶ್, ಪ್ರಸಿದ್ಧ ಸಾಹಿತಿಗಳಾದ ಪ್ರೊ. ಯು.ಆರ್. ಅನಂತಮೂರ್ತಿ, ಪತ್ರಿಕೋದ್ಯಮದಲ್ಲಿ ಹೆಸರು ಮಾಡಿದ ಪಿ. ಲಂಕೇಶ್,  ಹಾ.ಮಾ. ನಾಯಕ್, ಕೆ.ಪಿ.ಪೂರ್ಣಚಂದ್ರ ತೇಜಸ್ವಿ,  ಗಿರೀಶ್ ಕಾಸರವಳ್ಳಿ, ಚಿಂತಕ ಪ್ರೊ. ರಾಮದಾಸ್, ಮ್ಯಾಗ್ಸೆಸ್ಸೆ ಪುರಸ್ಕೃತ ಕೆ.ವಿ.ಸುಬ್ಬಣ್ಣ, ನಾಡಿನ ಹೆಸರಾಂತ ಗಾಯಕಿ ಬಿ.ಕೆ. ಸುಮಿತ್ರಾ, ರೈತ ಹೋರಾಟಗಾರ ಕಡಿದಾಳು ಶಾಮಣ್ಣ, ರಾಜಕೀಯ ಮುತ್ಸದ್ದಗಳಾದ ಶಾಂತವೇರಿ ಗೋಪಾಲಗೌಡ, ಎಚ್.ಜಿ. ಗೋವಿಂದೇಗೌಡ, ನಾಯಕರಾದ ಡಿ.ಎಚ್.ಶಂಕರಮೂರ್ತಿ, ಆಯನೂರು ಮಂಜುನಾಥ, ಕೊಣಂದೂರು ಲಿಂಗಪ್ಪ, ನ್ಯಾಯಾಂಗ ಕ್ಷೇತ್ರದಲ್ಲಿ ಹೆಸರು ಮಾಡಿದ ನ್ಯಾಯಮೂರ್ತಿ ರಾಮಾ ಜೋಯಿಸ್, ಇತ್ತೀಚೆಗಷ್ಟೇ ನಿಧನರಾದ ನ್ಯಾಯಮೂರ್ತಿ ಎನ್.ಡಿ. ವೆಂಕಟೇಶ್, ಉದ್ಯಮ ಕ್ಷೇತ್ರದ ಸಾಧಕರಾದ ಕೆ.ಜಿ. ಸುಬ್ರಹ್ಮಣ್ಯ,  ಬಿ.ಆರ್.ಅಶ್ವತ್ಥನಾರಾಯಣ ಶ್ರೇಷ್ಠಿ, ಗಿರಿಮಾಜಿ ಗೋಪಾಲ್, ಟಿ.ವಿ. ನಾರಾಯಣ ಶಾಸ್ತ್ರಿ,  ಕ್ರೀಡಾ ಕ್ಷೇತ್ರದ  ಸಾಧಕರಾದ ಎಂ.ಸಿ. ಮುತ್ತಯ್ಯ, ಮ್ಯಾಥ್ಯೂ ಗಿಬ್ಸನ್ ಮುಂತಾದವರು ತಾವು ಬೆಳೆದು ತಮ್ಮ ಗೌರವವನ್ನು ಹೆಚ್ಚಿಸಿಕೊಳ್ಳುವುದರ ಜೊತೆಗೆ ತಾವು ಓದಿದ ಕಾಲೇಜಿನ ಗೌರವವನ್ನೂ ಹೆಚ್ಚಿಸಿದ್ದಾರೆ.  
ಇಲ್ಲಿ ಪಾಠ ಮಾಡಿದ ಪ್ರಮುಖ ಅಧ್ಯಾಪಕರು:
ಕವಿ ಕೆ.ಎಸ್. ನಿಸಾರ್ ಅಹಮದ್, ದೇ. ಜವರೇಗೌಡ, ಪಿ. ಲಂಕೇಶ್,  ಜಿ. ಬ್ರಹ್ಮಪ್ಪ,  ಓ. ಎಲ್. ನಾಗಭೂಷಣಸ್ವಾಮಿ, ರಾಜೇಂದ್ರ ಚೆನ್ನಿ, ರಹಮತ್ ತರಿಕೆರೆ, ಹೂವಯ್ಯ ಗೌಡ ಮೊದಲಾದವರು.


ಸುವಣ ಮಹೋತ್ಸವದ ನಿಮಿತ್ತ ವರ್ಷವಿಡೀ ಶೈಕ್ಷಣಿಕ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನಡೆಸಲಾಗುವುದು. ಇದಕ್ಕಾಗಿ ವಿವಿಧ ಸಮಿತಿಗಳನ್ನು ರಚಿಸಲಾಗಿದೆ. ಅಮೃತ ಮಹೋತ್ಸವ ಭವನ ನಿರ್ಮಾಣ, ಬಯಲು ರಂಗಮಂದಿರ ನಿರ್ಮಾಣ, ಅಮೃತ ಮಹೋತ್ಸವ ದ್ವಾರ ಮತ್ತು ರಸ್ತೆಯ ವಿಸ್ತರಣೆ ಅತಿಥಿ ಗೃಹ ನಿರ್ಮಾಣ, ಜ್ಞಾನ ಕೇಂದ್ರದ ಮಾನ್ಯತೆ ಪಡೆಯುವುದು, ಹೆರಿಟೇಜ್ ಕಾಲೇಜು ಎಂಬ ಮಾನ್ಯತೆ ಪಡೆಯುವುದು, ಕ್ಯಾಂಪಸ್‌ಗೆ ವೈ-ಫೈ ಸೌಲಭ್ಯ ಒದಗಿಸುವುದು ಮುಂದಿನ ಗುರಿಯಾಗಿದೆ.
 - ಪ್ರೊ. ಬಿ.ಸಿ. ಗೌಡರ ಶಿವಣ್ಣನವರ್, ಪ್ರಾಚಾರ್ಯ


ಅಮೃತ ಮಹೋತ್ಸವವನ್ನು ಎ.22ರ ಬೆಳಗ್ಗೆ 10:30ಕ್ಕೆ ಕಾಲೇಜು ಆವರಣದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಉದ್ಘಾಟಿಸುವರು. ಅಧ್ಯಕ್ಷತೆಯನ್ನು ಉನ್ನತ ಶಿಕ್ಷಣ ಸಚಿವ ಬಸರಾಜ ರಾಯರೆಡ್ಡಿ ವಹಿಸುವರು. ವಿಧಾನಪರಿಷತ್ ಸಭಾಪತಿ ಡಿ.ಹೆಚ್. ಶಂಕರಮೂರ್ತಿ, ಉಸ್ತುವಾರಿ ಸಚಿವ ಕಾಗೋಡು ತಿಮ್ಮಪ್ಪ, ಗೃಹ ಸಚಿವ ಪರಮೇಶ್ವರ, ಸ್ಥಳೀಯ ಶಾಸಕರು ಅತಿಥಿಯಾಗಿರುತ್ತಾರೆ. ಚಿಕ್ಕಮಗಳೂರು ಹಾಗೂ ಶಿವಮೊಗ್ಗ ಜಿಲ್ಲೆಯ ಎಲ್ಲಾ ಜನಪ್ರತಿನಿಧಿಗಳು ಅತಿಥಿಯಾಗಿರುವರು. ಅಂದು ಬೆಳಗ್ಗೆ 9 ಗಂಟೆಯಿಂದ ಸುಗಮ ಸಂಗೀತ ಹಾಗೂ ಜನಪದ ಗೋಷ್ಠಿ ನಡೆಯಲಿದೆ. ಸಂಜೆ 5 ಗಂಟೆಗೆ ಕರ್ನಾಟಕದ ಜನಪದ ಕಲಾತಂಡಗಳ ವಿವಿಧ ಕಲಾ ಪ್ರದರ್ಶನ ಏರ್ಪಡಿಸಲಾಗಿದೆ.
.......................----

Thursday, 20 April 2017

ಆರಕ್ಷಕರ ಪಾಲಿಗಿವರು ಭಗೀರಥರು


  ತನ್ನ ಪೂರ್ವಜರ ಮೋಕ್ಷಕ್ಕಾಗಿ ಭಗೀರಥ ಸ್ವರ್ಗದಿಂದ ದೇವಗಂಗೆಯನ್ನು ಹರಿಸಿದ ಕಥೆಯನ್ನು ಪುರಾಣದಲ್ಲಿ  ಕೇಳಿದ್ದೇವೆ. ಕಾಲ ಕೆಟ್ಟಿದೆ ಎನ್ನುವ ಈ ಕಲಿಗಾಲದಲ್ಲೂ ಪರೋಪಕಾರ, ಸಚ್ಚಾರಿತ್ರ್ಯ, ಎಲ್ಲಕ್ಕಿಂತ ಮಿಗಿಲಾಗಿ  ಮಾನವಿಯತೆಮತ್ತು ಇಚ್ಛಾಶಕ್ತಿ ಹೊಂದಿದ  ರಾಜಕಾರಣಿಗಳು, ಅಧಿಕಾರಿಗಳು ಕೆಲವು ಪ್ರಮಾಣದಲ್ಲಿ ಇದ್ದಾರೆ. ಮಾಳೂರು ಪೊಲೀಸರು ನೀರಿಲ್ಲದೆ ಪರಿತಪಿಸುವಾಗ ಅವರ ನೆರವಿಗೆ ಬಂದವರು ಒಬ್ಬ ಜನಪ್ರತಿನಿಧಿ, ಮತ್ತೊಬ್ಬ ಅವರದೇ ಇಲಾಖೆಯ ಹಿರಿಯ ಅಧಿಕಾರಿ.  ಶಾಸಕ ಕಿಮ್ಮನೆ ರತ್ನಾಕರ ಮತ್ತು ಜಿಲ್ಲಾ ಪೊಲೀಸ್ ವರಿಷ್ಠ ಅಭಿನವ್ ಖರೆ ಅವರೇ ಈ ಪೊಲೀಸರ ಪಾಲಿಗೆ ಭಗೀರಥರು. ಇವರನ್ನೆಂದೂ ತಮ್ಮ ಸೇವಾವಧಿಯಲ್ಲಿ ಮರೆಯಲಾಗದು ಎನ್ನುತ್ತಾರೆ ಅಲ್ಲಿನ ಪೊಲಿಸ್ ಸಿಬ್ಬಂದಿಗಳು ಮತ್ತು ಅವರ ಕುಟುಂಬದವರು.  





ಪೊಲೀಸ್ ವಸತಿಗೃಹಗಳಿಗೆ  ಕೆಲವು ವರ್ಷಗಳಿಂದ ಸಮರ್ಪಕ ನೀರಿಲ್ಲದೆ ಪರಿತಪಿಸುತ್ತಿದ್ದುದನ್ನು ಪೊಲೀಸರ ಮೂಲಕ ಅರಿತ ಶಾಸಕರು ಮತ್ತು  ಜಿಲ್ಲಾ ಪೊಲೀಸ್ ವರಿಷ್ಠರು ಮುಂದಾಗಿ ಸಂಪೂರ್ಣ ಸಮಸ್ಯೆಯಿಂದ ಮುಕ್ತರಾಗುವಂತೆ ಮಾಡುವ ಮೂಲಕ ಮಾನವಿಯತೆ ಮೆರೆದಿದ್ದಾರೆ.
ತೀರ್ಥಹಳ್ಳಿ ತಾಲೂಕಿನ ಮಾಳೂರಿನಲ್ಲಿ ಪೊಲೀಸ್ ಠಾಣೆಯಿದೆ. ಇದಕ್ಕೆ ಸಂಬಂಧಿಸಿ 25 ವಸತಿಗೃಹ ಸಹ ಇದೆ. ಸುಮಾರು 9 ವರ್ಷದ ಹಿಂದೆ ಇಲ್ಲಿ ಸುಸಜ್ಜಿತ ಕಟ್ಟಡವಾಗಿದೆ. ಆದರೆ ಠಾಣೆಗೆ ಮತು ವಸತಿಗೃಹಕ್ಕೆ ನೀರಿನ ತೊಂದರೆ ಎದುರಾಗಿತ್ತು. ಇದರಿಂದಾಗಿ ಎಸ್‌ಐ ಮತ್ತು ಅನೇಕ ಸಿಬ್ಬಂದಿಗಳು ಈ ಠಾಣೆಗೆ ವರ್ಗವಾಗಿ ಬರಲು ಹಿಂಜರಿಯುತ್ತಿದ್ದರು. ಎರಡು- ಮೂರು ದಿನಕ್ಕೊಮ್ಮೆ ನೀರು ಬರುವ ಸ್ಥಿತಿ ಕಳೆದೆರಡು ವರ್ಷಗಳಿಂದ ಇತ್ತು.
ಸ್ಥಳೀಯ ಗ್ರಾಪಂನವರು ಠಾಣೆ ಮತ್ತು ವಸತಿಗೃಹಕ್ಕೆ ಪ್ರತ್ಯೇಕ ನೀರಿನ ವ್ಯವಸ್ಥೆ ಮಾಡಿರಲಿಲ್ಲ. ಗ್ರಾಪಂನವರು ಬಿಡುವ ನೀರನ್ನೇ ಸಂಪ್ ಮೂಲಕ ಸಂಗ್ರಹಿಸಿಟ್ಟುಕೊಂಡು ಬಳಸುವ ಸ್ಥಿತಿ ಇತ್ತು. ಆದರೆ ಇದು ಅಲ್ಲಿರುವ 25 ವಸತಿಗೃಹ ಮತ್ತು ಠಾಣೆಗೆ ಯಾತಕ್ಕೂ ಸಾಲುತ್ತಿರಲಿಲ್ಲ. ಇದರಿಂದ ಬೇಸತ್ತಿದ್ದ ಪೊಲೀಸರು ಶಾಶ್ವತ ಪರಿಹಾರ ಕಂಡುಹಿಡಿಯಲು ನಿರ್ಧರಿಸಿದರು. ಇದಕ್ಕಾಗಿ ಸಬ್ ಇನ್ಸ್‌ಪೆಕ್ಟರ್ ಗುರುರಾಜ, ಎಎಸ್‌ಐ ಶಂಕರಮೂರ್ತಿ ಮತ್ತು ದಫೇದಾರ್ ವೆಂಕಟೇಶ್ ಈ ಮೂವರು ಸ್ಥಳೀಯ ಶಾಸಕ ಕಿಮ್ಮನೆ ರತ್ನಾಕರ ಅವರನ್ನು ಭೇಟಿ ಮಾಡಿ ಸಮಸ್ಯೆಯನ್ನು ಆಗ್ರಹಿಸಿದರು. ಇದಕ್ಕೆ ಸ್ಪಂದಿಸಿದ ಶಾಸಕರು ಕೊಳವೆ ಬಾವಿಯನ್ನು ಕೊರೆಯಿಸಿಕೊಡುವ ಆಶ್ವಾಸನೆಯನ್ನು ಸ್ಥಳದಲ್ಲಿಯೇ  ನೀಡಿದ್ದರು. ಆ ಪ್ರಕಾರ ಅದನ್ನು ಅತಿ ಶೀಘ್ರದಲ್ಲೇ ಕೊರೆಯಿಸಿಕೊಟ್ಟಿದ್ದರು. ವಿಶೇಷವೆಂದರೆ, ಈ ಕೊಳವೆಬಾವಿಯಲ್ಲಿ ಸರಾಗವಾಗಿ  ಐದೂವರೆ ಇಂಚಿನಷ್ಟು ನೀರು ಬಿದ್ದಿದ್ದು, ಇದು ಎಲ್ಲ ಸಿಬ್ಬಂದಿಗಳ ಸಂತೋಷಕ್ಕೆ ಕಾರಣವಾಗಿತ್ತು.
ಇದಾದ ಬಳಿಕ ಇನ್ನೊಂದು ಸಮಸ್ಯೆ ಎದುರಾಯಿತು. ಅದೇನೆಂದರೆ ಪಂಪ್ ಅಳವಡಿಸುವುದು. ಮಾಳೂರು ಗ್ರಾಪಂನ ರಾಜಕೀಯದಿಂದಾಗಿ  ಪಂಪ್ ಅಳವಡಿಸಲು ಎನ್‌ಒಸಿ ಕೊಡಲು ನಿರಾಕರಿಸಲಾಯಿತು. ಆಗ ಮತ್ತೆ ಚಿಂತೆಗೀಡಾದ ಪೊಲೀಸರು ಜಿಲ್ಲಾ ಪೊಲೀಸ್ ವರಿಷ್ಠರನ್ನು ಕಂಡು ಸಮಸ್ಯೆಯನ್ನು ಅರುಹಿದರು. ಪರಿಹಾರ ಹುಡುಕಿಕೊಡುವಂತೆ ಕೋರಿದರು. ತಮ್ಮ ಇಲಾಖೆಯ ಸಿಬ್ಬಂದಿಗಳು ನೀರಿಗಾಗಿ ಪಡುತ್ತಿರುವ ಕಷ್ಟ ಕೇಳಿ ಬೇಸರಗೊಂಡ ಎಸ್‌ಪಿ ಸ್ಥಳದಲ್ಲೇ ಮನವಿಗೆ ಸ್ಪಂದಿಸಿದರು. ಮೋಟಾರ್ ಹಾಗೂ ಅದಕ್ಕೆ ಸಂಬಂಧಿಸಿದ ಸಾಮಗ್ರಿಗಳನ್ನು ತಾನೇ ಸ್ವತಃ ನೀಡುವುದಾಗಿ ಭರವಸೆ ನೀಡಿ ಆ ಪ್ರಕಾರ ಕೊಡುಗೆಯಾಗಿ ನೀಡಿದರು. ಇದರಿಂದಾಗಿ ಈಗ ನೀರಿನ ಸಮಸ್ಯೆ ಸಂಪೂರ್ಣ ಬಗೆಹರಿದಿದ್ದು, ಸಾಕಷ್ಟು ನೀರು ಲಭ್ಯವಾಗುತ್ತಿದೆ.
  ಈಗ  ಮಾಳೂರಿನ ಪೊಲೀಸ್ ಸಿಬ್ಬಂದಿಗಳು ನೆಮ್ಮದಿಯಿಂದಿರುವಂತಾಗಿದೆ. ಮುಂದೆ ಇಲ್ಲಿಗೆ ಬರಲು ಯಾವ ಪೊಲೀಸರೂ ಚಿಂತೆಪಡಬೇಕಾಗಿಲ್ಲ ಎಂದು ಖುಷಿಯಿಂದ ಹೇಳುತ್ತಾರೆ ಅಲ್ಲಿನ ಸಿಬ್ಬಂದಿಗಳು. ಜೊತೆಗೆ ಸ್ಥಳೀಯ ಗ್ರಾಪಂ ಸದಸ್ಯರಾದ ಉದಯ್ ಮತ್ತು ಉಮೇಶ್ ಅವರೂ ಸಹ ಈ ಕಾರ್ಯದಲ್ಲಿ ನೆರವಾಗಿದ್ದನ್ನು ಸ್ಮರಿಸುತ್ತಾರೆ.
ಒಟ್ಟಿನಲ್ಲಿ ಎಲ್ಲರೂ ಸೇರಿ ನೀರಿನ ಸಮಸ್ಯೆ ಬಗೆಹರಿಸಿದ್ದಾರೆ. ಶಾಸಕರು ಮತ್ತು ಅಧಿಕಾರಿಗಳು ಮನಸ್ಸು ಮಾಡಿದರೆ ಎಂತಹ ಸಮಸ್ಯೆಯನ್ನಾದರೂ ಅತಿ ಶೀಘ್ರದಲ್ಲಿ ಬಗೆಹರಿಸಲು ಸಾಧ್ಯವಿದೆ. ಜನಪ್ರತಿನಿಧಿಗಳಲ್ಲಿ ಜನಪರ ಕಾಳಜಿ ಮತ್ತು ಅಧಿಕಾರಿಗಳಲ್ಲಿ ಸಹೃದಯತೆ, ಮಾನವೀಯತೆ ಇದ್ದರೆ ಜೊತೆಗೆ ಅವರೆಲ್ಲ ಹೇಗೆ ಸ್ಮರಣೀಯರಾಗುತ್ತಾರೆ ಎನ್ನುವುದಕ್ಕೆ ಇದೊಂದು ಉದಾಹರಣೆ.
................................

Wednesday, 12 April 2017

 ಬಿಪಿಎಲ್ ಕಾರ್ಡಿಗೆ ಡಿಮಾಂಡಪ್ಪೋ ಡಿಮಾಂಡು 
   ಬಿಪಿಎಲ್‌ಗೆ 32 ಸಾವಿರ ಅರ್ಜಿಗಳು ಸಲ್ಲಿಕೆ * 
ಎಪಿಎಲ್ ಕಾರ್ಡಿಗೆ  ಕೇವಲ 2553 ಅರ್ಜಿ *



ಇತ್ತೀಚೆಗೆ ರಾಜ್ಯ ಸರ್ಕಾರ ಹೊಸದೊಂದು ಆದೇಶ ಹೊರಡಿಸಿ, ಬಿಪಿಎಲ್ ಕಾರ್ಡ್ ಪಡೆಯಲು 1.20 ಲಕ್ಷ ರೂ. ಆದಾಯ ಮಿತಿ ನಿಗದಿ ಮಾಡಿದೆ. ಈ ಹಿನ್ನೆಲೆಯಲ್ಲಿ ಆಹಾರ ಇಲಾಖೆ ಅಧಿಕಾರಿಗಳು ಕಂದಾಯ ಇಲಾಖೆ ಹಾಗೂ ತಮ್ಮ ಇಲಾಖೆಯ ದತ್ತಾಂಶಗಳ ಜೋಡಣೆ ಕಾರ್ಯನವನ್ನು ಭರದಿಂದ ನಡೆಸುತ್ತಿದ್ದಾರೆ. ಇದರಿಂದ ಈಗಾಗಲೇ ಕಾರ್ಡ್ ಕೋರಿ ಸಲ್ಲಿಕೆಯಾಗಿರುವ ಅರ್ಜಿಗಳ ಪರಿಶೀಲನೆ ಕಾರ್ಯವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದ್ದಾರೆ. 
-- ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯ  ಜಿಲ್ಲಾ ಉಪ ನಿರ್ದೇಶಕ ಟಿ.ಕೆ.ಲಕ್ಷ್ಮೀನಾರಾಯಣ ರೆಡ್ಡಿ. 

ಶಿವಮೊಗ್ಗ,  : ಜಿಲ್ಲೆಯಲ್ಲಿ ಜನರ ಆದಾಯ ಕಡಿಮೆಯಾಗುತ್ತಿದೆಯೇ, ಅಥವಾ ಜನರು ಬಡವರಾಗುತ್ತಿದ್ದಾರೆಯೇ ಎಂಬ ಪ್ರಶ್ನೆ ಈಗ ಆಹಾರ  ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯ  ಅಧಿಕಾರಿಗಳಿಗೆ ಕಾಡತೊಡಗಿದೆ. ಕಾರಣವೇನೆಂದರೆ ಬಿಪಿಎಲ್ ಕಾರ್ಡು ಬೇಕೆಂದು 32 ಸಾವಿರ ಜನರು ಅರ್ಜಿ ಸಲ್ಲಿಸಿದ್ದಾರೆ. ಇದು ಅಧಿಕಾರಿಗಳ ತಲೆತಿನ್ನತೊಡಗಿದೆ. ಬಿಪಿಎಲ್ ಕಾರ್ಡು ಪಡೆಯಲಿಷ್ಟು ಡಿಮಾಂಡ್ ಏಕೆ ಎಂಬ ಪ್ರಶ್ನೆಯೂ ಎದುರಾಗಿದೆ.
ಸರ್ಕಾರದ ವಿವಿಧ ಯೋಜನೆಗಳ ಲಾಭ ಪಡೆಯಲು ಈ ಕಾರ್ಡು ಅನುಕೂಲವಾಗುತ್ತದೆ. ಜೊತೆಗ ಅನ್ನಭಾಗ್ಯದ ಲಾಭ, ಪಡಿತರದಲ್ಲಿ ಏರಿಕೆ ಎಲ್ಲವೂ ಲಭ್ಯವಾಗಲಿದೆ. ಇದರಿಂದಾಗಿ ಅರ್ಜಿ ಸಲ್ಲಿಸುವವರು ಹೆಚ್ಚತೊಡಗಿದ್ದಾರೆ. ಆದರೆ ಅಧಿಕಾರಿಗಳು ಸರಿಯಾಗಿ ಪರಿಶೀಲನೆ ಮಾಡುವ ಜವಾಬ್ದಾರಿ ಎದುರಾಗಿದೆ. ಕಂಡಕಂಡವರೆಲ್ಲ ಬಿಪಿಎಲ್ ಕಾರ್ಡು ಪಡೆದರೆ ನೈಜ ಬಡವರು ಇದರಿಂದ ವಂಚನೆಗೊಳಗಾಗಬೇಕಾಗುತ್ತದೆ. ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು  ಸೂಕ್ಷ್ಮವಾಗಿ ಪರಿಶೀಲಿಸತೊಡಗಿದ್ದಾರೆ.
ಬಡತನ ರೇಖೆಗಿಂತ ಕೆಳಗಿನ (ಬಿಪಿಎಲ್) ಹಾಗೂ ಬಡತನ ರೇಖೆಗಿಂತ ಮೇಲ್ಪಟ್ಟ (ಎಪಿಎಲ್) ಪಡಿತರ ಚೀಟಿ ವಿತರಣೆಗೆ ನಿಗದಿಪಡಿಸಲಾಗಿದ್ದ ಮಾನದಂಡಗಳನ್ನು ರಾಜ್ಯ ಸರ್ಕಾರ ಸರಳೀಕರಣಗೊಳಿಸಿದೆ. ಈ ಪ್ರಕಾರ ಬಿ.ಪಿ.ಎಲ್. ಪಡಿತರ ಚೀಟಿ ಪಡೆಯಲು 1.20 ಲಕ್ಷ ರೂ. ಆದಾಯ ಮಿತಿ ನಿಗದಿಗೊಳಿಸಲಾಗಿದೆ. ಜೊತೆಗೆ ಫೆಬ್ರವರಿ ತಿಂಗಳಿನಿಂದ ಹೊಸದಾಗಿ ಪಡಿತರ ಚೀಟಿಗೆ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಲು ಸಾರ್ವಜನಿಕರಿಗೆ ಅವಕಾಶ ಕೂಡ ಕಲ್ಪಿಸಿದೆ.
 ಜಿಲ್ಲೆಯಲ್ಲಿ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಿದ ದಿನದಿಂದ ಎ. 10 ರವರೆಗೆ ಬಿಪಿಎಲ್ ಕಾರ್ಡ್ ಕೋರಿ ಆನ್‌ಲೈನ್ ಮೂಲಕ ಹೊಸದಾಗಿ ಅರ್ಜಿ ಸಲ್ಲಿಸಿದವರ ಸಂಖ್ಯೆ 32,141 ಆಗಿದೆ! ಆದರೆ ಎಪಿಎಲ್ ಕಾರ್ಡ್ ಕೋರಿ ಅರ್ಜಿ ಸಲ್ಲಿಸಿದವರ ಸಂಖ್ಯೆ ಕೇವಲ 2553 ಆಗಿದೆ ಎಂದು ಸ್ಥಳೀಯ ಆಹಾರ ಇಲಾಖೆ ತಿಳಿಸಿದೆ.  ಬಿಪಿಎಲ್ ಕಾರ್ಡ್‌ಗೆ ಸಂಬಂಧಿಸಿದಂತೆ ಆನ್‌ಲೈನ್ ಮೂಲಕ ಜಿಲ್ಲೆಯಲ್ಲಿ ಸ್ವೀಕತವಾಗಿರುವ 32,141 ಅರ್ಜಿಗಳಲ್ಲಿ ಶಿವಮೊಗ್ಗ ತಾಲೂಕಿನಲ್ಲಿ ಅತ್ಯದಿಕ 8544 ಅರ್ಜಿಗಳು ಸಲ್ಲಿಕೆಯಾಗಿವೆ. ಉಳಿದಂತೆ ಭದ್ರಾವತಿಯಲ್ಲಿ 6075, ಹೊಸನಗರದಲ್ಲಿ 2703, ಸಾಗರದಲ್ಲಿ 3635, ಶಿಕಾರಿಪುರದಲ್ಲಿ 5028, ಸೊರಬದಲ್ಲಿ 4606 ಹಾಗೂ ತೀರ್ಥಹಳ್ಳಿ ತಾಲೂಕಿನಲ್ಲಿ 1550 ಅರ್ಜಿಗಳು ಸಲ್ಲಿಕೆಯಾಗಿವೆ.
ಇದರಲ್ಲಿ 86 ಅರ್ಜಿಗಳಿಗೆ ಸಂಬಂಧಿಸಿದಂತೆ ಸ್ಥಳ ಪರಿಶೀಲನೆಯನ್ನು ಅಧಿಕಾರಿಗಳು ನಡೆಸಿದ್ದಾರೆ. 73 ಅರ್ಜಿಗಳಿಗೆ ಕಾರ್ಡ್ ನೀಡಲು ಅನುಮೋದನೆ ಕೂಡ ದೊರಕಿದ್ದು, 4 ಅರ್ಜಿಗಳು ತಿರಸ್ಕೃತವಾಗಿವೆ. 691 ಜನ ಸಲ್ಲಿಸಿದ್ದ ಅರ್ಜಿ ವಾಪಾಸ್ ಪಡೆದುಕೊಂಡಿದ್ದಾರೆ. 31,373 ಅರ್ಜಿಗಳ ವಿಲೇವಾರಿ ಬಾಕಿಯಿದೆ. ಬಿಪಿಎಲ್‌ಗೆ ಹೋಲಿಕೆ ಮಾಡಿದರೆ ಎಪಿಎಲ್ ಕಾರ್ಡ್ ಕೋರಿ ಅರ್ಜಿ ಸಲ್ಲಿಸಿದವರ ಸಂಖ್ಯೆ ಕಡಿಮೆಯಿದ್ದು, 2553 ಅರ್ಜಿಗಳು ಮಾತ್ರ ಸಲ್ಲಿಕೆಯಾಗಿವೆ. ಜಿಲ್ಲೆಯ ಇತರೆ ತಾಲೂಕುಗಳಿಗೆ ಹೋಲಿಕೆ ಮಾಡಿದರೆ ಶಿವಮೊಗ್ಗ ತಾಲೂಕಿನಲ್ಲಿಯೇ ಅತ್ಯಧಿಕ 1212 ಅರ್ಜಿಗಳು ಸಲ್ಲಿಕೆಯಾಗಿವೆ.
ಉಳಿದಂತೆ ಭದ್ರಾವತಿಯಲ್ಲಿ 444, ಹೊಸನಗರದಲ್ಲಿ 206, ಸಾಗರದಲ್ಲಿ 293, ಶಿಕಾರಿಪುರದಲ್ಲಿ 194, ಸೊರಬದಲ್ಲಿ 73 ಹಾಗೂ ತೀರ್ಥಹಳ್ಳಿ ತಾಲೂಕಿನಲ್ಲಿ 131 ಅರ್ಜಿಗಳು ಸಲ್ಲಿಕೆಯಾಗಿವೆ. 31 ಅರ್ಜಿಗಳು ತಿರಸ್ಕೃತಗೊಂಡಿದ್ದು, 156 ಅರ್ಜಿದಾರರು ವಾಪಾಸ್ ಪಡೆದುಕೊಂಡಿದ್ದಾರೆ. 2268 ಅರ್ಜಿಗಳು ವಿಲೇವಾರಿ ಬಾಕಿಯಿದೆ.  ಆಹಾರ ಇಲಾಖೆ ಸಚಿವ ಯು.ಟಿ.ಖಾದರ್ ಹಾಗೂ ಆ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಹರ್ಷ ಗುಪ್ತಾ ಬಿಪಿಎಲ್ ಕಾರ್ಡ್ ವಿತರಣೆ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳಲು ಹಾಗೂ ಅನರ್ಹರಿಗೆ ಕಾರ್ಡ್ ಲಭ್ಯವಾಗದಂತೆ ಮಾಡುವ ನಿಟ್ಟಿನಲ್ಲಿ ವ್ಯಾಪಕ ಕ್ರಮಗಳನ್ನು ಕೈಗೊಂಡಿದ್ದಾರೆ. ಈ ಹಿಂದೆ ನಿಗದಿ ಮಾಡಿದ್ದ ಮಾನದಂಡಗಳಲ್ಲಿ ಬದಲಾವಣೆ ತಂದಿದ್ದಾರೆ.